Tuesday, July 31, 2012

Phoonk


രാം ഗോപാല്‍ വര്‍മ സംവിധാനം  ചെയ്ത്  സുദീപ്, അമൃത  ഖന്‍വില്‍കാര്‍ , അശ്വിനി കല്‍സേകര്‍  തുടങ്ങിയവര്‍ പ്രധാന വേഷങ്ങില്‍ അഭിനയിച്ച് 2008 ഇല്‍ റിലീസ് ആയ  ഒരു ഹൊറര്‍ സിനിമയാണ് Phoonk. 

പതിവ് രാം ഗോപാല്‍ സിനിമകളില്‍ നിന്നും ഒരല്‍പം വ്യത്യസ്തത ഈ സിനിമക്കുണ്ട് എന്ന് വേണമെങ്കില്‍ പറയാം. കാരണം ഈ സിനിമയില്‍ പ്രേതമോ ഭൂതമോ അല്ല പ്രശ്നക്കാരായി വരുന്നത്, മറിച്ച് കൂടോത്രവും ആഭിചാരവും മറ്റ് അനുബന്ധ സംഭവങ്ങളുമാണ് കേന്ദ്ര വിഷയം. അതില്‍ തന്നെ മനശാസ്ത്രപരമായി ഇത്തരം വിഷയങ്ങള്‍ക്കുള്ള വ്യാഖ്യാനവും സിനിമയില്‍ കൊണ്ട് വരാന്‍ എഴുത്തുകാരനും സംവിധായകനും വളരെ നല്ല രീതിയില്‍ തന്നെ ശ്രമിച്ചിരിക്കുന്നു. 

ഒരു നിരീശ്വര വാദിയും സിവില്‍ എന്ജിനീയരുമായ രാജീവ്  (സുദീപ്) ഭാര്യയും മക്കളും വയസ്സായ തന്‍റെ അമ്മയോടും കൂടി സന്തുഷ്ടമായി ജീവിച്ചു വരുന്നതിനിടയില്‍  ബിസിനസ്‌ ശത്രുക്കളില്‍ ആരൊക്കെയോ ചേര്‍ന്ന് തന്‍റെ ജീവിതത്തില്‍ താളപ്പിഴകള്‍ സൃഷ്ടിക്കുന്നു. പൊതുവേ നിരീശ്വര വാദിയായിരുന്ന രാജീവ് ആദ്യം കൂടോത്രത്തെയും മറ്റ് അന്ധവിശ്വാസങ്ങളെയും എതിര്‍ത്തു കൊണ്ടിരുന്നുവെങ്കിലും, പിന്നീട്  ഇത്തരം വിശ്വാസങ്ങള്‍ ശരിയാണെന്ന ചിന്താഗതിയില്‍ എത്തിച്ചേരുന്നു. അതിനു തക്ക വിശ്വസനീയമായ ന്യായീകരണങ്ങള്‍ ഈ സിനിമയില്‍ തന്നെ പങ്കു വക്കപ്പെടുന്നു. 

മണിച്ചിത്രത്താഴ് എന്ന മലയാളം സിനിമയില്‍ സയന്‍സും മന്ത്രവാദവും കൂടിപ്പിണഞ്ഞു കൊണ്ട് കഥ പറയുന്ന ഒരു രീതി ഈ സിനിമയിലും പ്രകടമാണ്. സിനിമയുടെ അവസാന ഭാഗത്തില്‍,  സയന്‍സ് വിജയിച്ചു എന്നര്‍ത്ഥത്തില്‍ ഒരു വിഭാഗം അവകാശപ്പെടുമ്പോഴും, ചില അന്ധവിശ്വാസങ്ങള്‍ക്ക് പിന്നില്‍ ചില സത്യങ്ങള്‍ കൂടിയുണ്ട് എന്ന് മൌനമായി നമുക്ക് തന്നെ സമ്മതിക്കേണ്ട ഒരു സ്ഥിതിവിശേഷമാണ് സംവിധായകനും എഴുത്തുകാരനും കൂടി സൃഷ്ട്ടിച്ചെടുത്തിരിക്കുന്നത്  എന്ന് പറയാതെ വയ്യ. 

ആകെ മൊത്തം ടോട്ടല്‍ = അവസാന രംഗങ്ങളിലെ ചില പാളിച്ചകള്‍ ഒഴിവാക്കിയാല്‍ കണ്ടിരിക്കാവുന്ന  ഒരു  ഹൊറര്‍ സിനിമ. 
*വിധി  മാര്‍ക്ക്‌ = 6/10 
-pravin- 

Monday, July 30, 2012

ശകുനി


ശങ്കര്‍ ദയാല്‍ ആദ്യമായി രചനയും സംവിധാനവും നിര്‍വഹിച്ച സിനിമയാണ് ശകുനി. കാര്‍ത്തി നായകവേഷത്തില്‍ എത്തുന്ന ഈ സിനിമ ഒരു രാഷ്ട്രീയ സിനിമയാണോ എന്ന് ചോദിച്ചാല്‍ അതെ എന്നോ അല്ല എന്നോ ഒറ്റവാക്കില്‍ പറയാന്‍ പറ്റില്ല. കാരണം, സിനിമ ആ തലങ്ങളില്‍ ഒന്നും തന്നെ കാര്യമായ ആസ്വാദനം പ്രേക്ഷകന് കൊടുക്കുന്നില്ല. 

തന്‍റെ വീട് ഇടിച്ചു പൊളിച്ച് സബ് വേ ആക്കാനുള്ള സര്‍ക്കാര്‍ ഉത്തരവിനെ രാഷ്ട്രീയപരമായി നേരിടാന്‍ എന്ന നിലയില്‍ ചെന്നൈയില്‍ എത്തുകയാണ് കമലക്കണ്ണന്‍ (കാര്‍ത്തി ) എന്ന ഗ്രാമീണ യുവാവ്. തുടര്‍ന്നങ്ങോട്ട് രാഷ്ട്രീയക്കാരുമായുള്ള വിയോജിപ്പുകള്‍ മൂലം തന്‍റെ ആഗമനോദ്ദേശ്യം നടക്കില്ല എന്നുറപ്പാകുന്ന നായകന്‍ ബുദ്ധിപരമായി നീങ്ങുന്നു. 

 അതിനു മുന്നോടിയായി  നായകന്‍ രാഷ്ട്രീയത്തില്‍ കാലെടുത്തു വക്കുന്നു. രാഷ്ട്രീയത്തിലെ  വമ്പന്മാരുമായുള്ള സമ്പര്‍ക്കം മൂലം നിലവിലെ രാഷ്ട്രീയ സ്ഥിതികളെ പൊളിച്ചെഴുതാന്‍ നായകന്‍  ആഹ്വാനം ചെയ്യുന്ന രീതിയില്‍  കഥ അരോചകമായി തന്നെ പറഞ്ഞു പോകുന്നു. പിന്നെ പെട്ടെന്ന് പെട്ടെന്നുണ്ടാകുന്ന തിരഞ്ഞെടുപ്പുകള്‍ , നായകന്‍ വിചാരിക്കുന്ന ആളുകള്‍ മാത്രം തിരഞ്ഞെടുപ്പില്‍ വിജയിക്കുന്ന കുറെ അസംഭവ്യ അവസ്ഥകള്‍, അതിനടിയിലെ പ്രണയം , ഒടുക്കം എല്ലാം ശുഭം.  

കാര്‍ത്തി എന്ന നടന്‍ ഇനിയും ഇത്തരം അഭിനയ സാഹസങ്ങള്‍ക്ക്‌ മുതിരാതിരിക്കട്ടെ. സിനിമയില്‍ ആകെ ആസ്വദനീയമായ കാര്യം കാര്‍ത്തി - സന്താനം എന്നിവര്‍ക്കിടയിലെ നര്‍മ സംഭാഷണങ്ങള്‍ മാത്രം. 

ആകെ മൊത്തം ടോട്ടല്‍ = രാഷ്ട്രീയ പശ്ചാത്തലത്തില്‍ കഥ പറഞ്ഞു പോകുന്ന ഒരു ബിലോ ആവറേജ് സിനിമ. 

*വിധി മാര്‍ക്ക്‌ = 3/10 
-pravin- 

Sunday, July 29, 2012

Hachi - A dog's tale


1987 ഇല്‍ ഇറങ്ങിയ Hachiko Monogatari എന്ന ജാപ്പനീസ് സിനിമ പുനരാവിഷ്ക്കരിച്ചു കൊണ്ട് 2009 ഇല്‍ ഇറങ്ങിയ അമേരിക്കന്‍ സിനിമയാണ് Hachi - A Dog's Tale. 

സിനിമ തുടങ്ങുന്നത് ഒരു സ്കൂള്‍ ക്ലാസ് റൂമില്‍ നിന്നാണ്. ഓരോ കുട്ടികളും അവരവരുടെ മനസ്സിലെ ഹീറോ സങ്കല്പം മറ്റുള്ളവരുടെ മുന്നില്‍ വിവരിച്ചു കൊടുത്ത് കൊണ്ടിരിക്കുന്നു. പല കുട്ടികളും പല ഹീറോകളെ കുറിച്ച് സംസാരിച്ചു കഴിഞ്ഞിരിക്കുന്നു. അതില്‍ നിന്നും വിഭിന്നമായ ഒരു ഹീറോയെ കുറിച്ചുള്ള കഥ പറഞ്ഞു കൊണ്ട് ഒരു കുട്ടി മറ്റുള്ളവരുടെ ശ്രദ്ധയാകര്‍ഷിക്കുന്നു. ആ കുട്ടിയുടെ മുത്തച്ഛന്റെ നായ്ക്കുട്ടിയാണ് കഥയിലെ ഹീറോ. അങ്ങനെ ആ കുട്ടിയുടെ വിവരണത്തിലൂടെ കഥയിലേക്ക്‌ നമ്മള്‍ കടക്കുന്നു. 

Parker Wilsan എന്ന പ്രൊഫസര്‍ ഒരിക്കല്‍ ജോലി കഴിഞ്ഞു വരുന്ന വഴി റെയില്‍വേ സ്റ്റേഷനില്‍ വച്ച് ഒരു നായ്ക്കുട്ടിയെ കാണുന്നു. ആരുടെയോ ശ്രദ്ധയില്ലായ്മ കൊണ്ട് ഒറ്റപ്പെട്ടു പോയ നായ്ക്കുട്ടിയെ പ്രൊഫസര്‍ സ്റ്റേഷനില്‍ ഏല്‍പ്പിക്കാന്‍ ശ്രമിക്കുന്നുവെങ്കിലും സ്റ്റേഷന്‍ മാസ്റ്റര്‍ സമ്മതിക്കാത്തത് കൊണ്ട് അതിനെ തന്‍റെ കൂടെ വീട്ടിലേക്കു കൊണ്ട് പോകാന്‍ അദ്ദേഹം നിര്‍ബന്ധിതനാകുന്നു.  

ആദ്യ കുറച്ചു ദിവസങ്ങളില്‍ നായ്ക്കുട്ടിയെ വീട്ടില്‍ താമസിപ്പിക്കുന്നതുമായി  ഭാര്യയില്‍ നിന്ന് ചില്ലറ വിസമ്മതം കാണുന്നത് കൊണ്ട് നായ്ക്കുട്ടിയുടെ യഥാര്‍ത്ഥ യജമാനനെ അന്വേഷിക്കാന്‍ പ്രൊഫസര്‍ പല വഴി നോക്കി കൊണ്ടിരുന്നു.  ആ കാലയളവിനുള്ളില്‍ നായ്ക്കുട്ടി എല്ലാവരോടും വളരെ ഇണങ്ങുകയും , എല്ലാവര്‍ക്കും അതിനോടുള്ള പ്രിയമേറി  വരുകയും ചെയ്തത് കാരണം തന്‍റെ വീട്ടിലെ ഒരംഗമായി തന്നെ അതിനെ വളര്‍ത്താന്‍ പ്രൊഫസര്‍ തീരുമാനിക്കുന്നു. പ്രൊഫസറിന്റെ   ജാപ്പനീസ് സുഹൃത്ത് വഴി നായ്ക്കുട്ടിയുടെ യഥാര്‍ത്ഥ ദേശം ജപ്പാന്‍ ആണെന്ന് മനസിലാകുകയും  നായ്ക്കുട്ടിക്കു ജാപ്പനീസ് ഭാഷയില്‍  ഹാച്ചി എന്ന് നാമകരണം ചെയ്യുകയും  ചെയ്യുന്നു. 

പിന്നീടങ്ങോട്ട് , പ്രൊഫസറും നായയും തമ്മിലുള്ള ബന്ധം ദൃഡപ്പെടുന്നു. എന്നും  രാവിലെ പ്രൊഫസറെ റെയില്‍വേ സ്റ്റേഷന്‍ വരെ യാത്രയാക്കാന്‍ പോകുകയും വൈകീട്ട് അദ്ദേഹത്തെ കാത്തു കൊണ്ട് സ്റ്റേഷനില്‍ കാത്തിരിക്കുകയും ചെയ്യുന്ന ഹാച്ചി എല്ലാവര്‍ക്കും ആദ്യം കൌതുക കാഴ്ചയും പിന്നീട് എല്ലാവരുടെയും സ്ഥിരം കാഴ്ചയുമായി മാറുന്നു. അത് കൊണ്ട് തന്നെ ഹാച്ചി എല്ലാവരുടെയും പ്രിയപ്പെട്ടവനും ആകുന്നു. 

 ഒരിക്കല്‍ പതിവ് പോലെ പ്രൊഫസറെ കാത്തിരിക്കുന്ന ഹാച്ചിക്ക് അദ്ദേഹത്തെ അന്ന് കാണാന്‍ സാധിക്കുന്നില്ല. അദ്ദേഹത്തിന്‍റെ അവിചാരിതമായ മരണം ഹാച്ചി ഉള്‍ക്കൊള്ളുന്നില്ല. എന്നത്തെയും പോലെ ഹാച്ചി വീണ്ടും തന്‍റെ കാത്തിരുപ്പ് തുടരുന്നു. ആ നീണ്ട  കാത്തിരിപ്പിനിടയില്‍ നടക്കുന്ന സംഭവ വികാസങ്ങളും   മറ്റ് ഹൃദയ സ്പര്‍ശിയായ രംഗങ്ങളെല്ലാം തന്നെ   ഇടയ്ക്കിടെ പ്രേക്ഷകന്‍റെ കണ്ണ് നനയിപ്പിക്കാന്‍ തരത്തില്‍ ആര്‍ദ്രമാണ്. ആ ആര്‍ദ്രതയാണ്‌ ഈ സിനിമയുടെ വിജയം. 

സിനിമ കാണുന്ന പ്രേക്ഷകർക്ക്   പോലും ആ നായ്ക്കുട്ടിയുമായ് ഒരു ആത്മബന്ധം ഉണ്ടായി പോകും  തരത്തില്‍  ഓരോ രംഗവും സംവിധായകന്‍ അതിമനോഹരമായി തന്നെ ചിത്രീകരിച്ചിരിക്കുന്നു. മറ്റൊരു എടുത്തു പറയേണ്ട കാര്യം സിനിമയിലെ മനോഹരമായ പശ്ചാത്തല സംഗീതമാണ്. വളരെയധികം പ്രശംസനീയം തന്നെയാണ് ഇതെല്ലാം തന്നെ. 

ഓരോ അഭിനേതാക്കളും അവരവര്‍ക്ക് കിട്ടിയ കഥാപാത്രങ്ങളെ മികവുറ്റതാക്കിയതിനേക്കാള്‍ പതിന്മടങ്ങ്‌ പൂര്‍ണതയോട് കൂടി ഹാച്ചിയായി അഭിനയിച്ച നായക്കുട്ടി തന്‍റെ കഥാപാത്രം അനശ്വരമാക്കിയിരിക്കുന്നു. ഇതൊരു സംഭവ കഥയാണ് എന്ന് അറിഞ്ഞു കൊണ്ട് കണ്ടാലും , അറിയാതെ കണ്ടാലും ഈ സിനിമ കണ്ടു കഴിയുമ്പോഴേക്കും നിങ്ങളുടെ  കണ്ണുകള്‍ നിറഞ്ഞിട്ടില്ല എങ്കില്‍ നിങ്ങള്‍  ഒരു മനുഷ്യനോ മൃഗമോ അല്ല എന്ന് നിസ്സംശയം പറയാം. അത്ര മേല്‍ മനസ്സ് വിങ്ങുന്ന രംഗങ്ങള്‍ ഈ സിനിമയിലൂടെ കടന്നു പോകുന്നുണ്ട് . 

ആകെ മൊത്തം ടോട്ടല്‍ = വളരെയധികം മനസ്സിനെ സ്പര്‍ശിക്കുന്ന മികച്ച ഒരു സിനിമ. ഈ സിനിമ കണ്ടില്ലെങ്കില്‍ നിങ്ങളുടെ സിനിമാസ്വാദന ജീവിതത്തിലെ ഒരു നഷ്ടം എന്ന് തന്നെ പറയേണ്ടി വരും. 

*വിധി മാര്‍ക്ക്‌ = 10/10 

Saturday, July 28, 2012

സരോജ


വെങ്കട്ട് പ്രഭു സംവിധാനം ചെയ്ത്, പ്രകാശ് രാജ്, ജയറാം, ശിവ, വൈഭവ് റെഡി, എസ് പി ബി ചരണ്‍, പ്രേംജി അമരേന്‍, വേഗ തുടങ്ങിയവര്‍ പ്രധാനാ വേഷങ്ങളില്‍ അഭിനയിച്ച സിനിമയാണ് സരോജ. 2008 ഇല്‍ ആണ് ഈ സിനിമ റിലീസ് ആയത്. 

വിശ്വനാഥ് (പ്രകാശ് രാജ്) എന്ന വ്യവസായിയുടെ മകളെ ഒരു ദിവസം ആരോ തട്ടിക്കൊണ്ടു  പോകുന്നു, അതിന്‍റെ അന്വേഷണത്തിനായി പോലീസും അയാളുടെ സുഹൃത്തുമായ  രവിചന്ദ്രന്‍ (ജയറാം)  രംഗത്തെത്തുന്നു. അതേ  സമയം ചെന്നൈയില്‍ നിന്നും ഹൈദരബാദിലേക്ക് ക്രിക്കറ്റ്‌ കളി കാണാന്‍ പുറപ്പെടുന്ന ഒരു കൂട്ടം ചങ്ങാതിമാര്‍ക്കു തങ്ങളുടെ  ദീര്‍ഘ യാത്രക്കിടയില്‍ വഴി തെറ്റുകയും, ഇടയില്‍ വച്ച് അജ്ഞാതരില്‍ നിന്ന് ആക്രമണം നേരിടേണ്ടി  വരുകയും ചെയ്യുന്നു. പിന്നീടങ്ങോട്ട് ഇവരുടെ കൂട്ടായ്മയില്‍ രഹസ്യങ്ങളുടെ ചുരുളഴിയുന്നു. 

ആകെ മൊത്തം ടോട്ടല്‍ = ആകാംക്ഷ നിലനിര്‍ത്തിക്കൊണ്ട് കഥ പറയുന്ന ഒരു കോമഡി സസ്പെന്‍സ് ത്രില്ലര്‍ സിനിമ. 

*വിധി മാര്‍ക്ക്‌ = 7/10 
-pravin- 

Thursday, July 26, 2012

കോബ്രയോ അതോ നീര്‍ക്കോലിയോ ?


കോബ്ര  സംവിധാനം ചെയ്തത് കൊണ്ട് ലാല്‍ എന്ത് നേടി എന്നൊരു  പിടിയുമില്ല. കോമഡി എന്ന പേരില്‍ "പ്രമുഖ" നടന്മാര്‍ ഈ സിനിമയില്‍ കാട്ടിക്കൂട്ടിയിരിക്കുന്ന വിരോധാഭാസങ്ങള്‍ പ്രേക്ഷകര്‍ക്ക്‌ സഹിക്കാന്‍ പറ്റുന്നതിലും അപ്പുറമാണ്. തൊമ്മനും മക്കളും, തെങ്കാശിപ്പട്ടണം തുടങ്ങീ സിനിമകളെ അനുസ്മരിപ്പിക്കും വിധം ഒരു സിനിമയായിരുന്നോ ലാല്‍ ഉദ്ദേശിച്ചിരുന്നത് എന്നതറിയില്ല. സിനിമയിലെ പല രംഗങ്ങളിലും ആവര്‍ത്തന വിരസത തോന്നിപ്പിക്കുന്ന കഥാഗതിയും സംഭാഷണവും കുത്തി നിറച്ചിരിക്കുന്നു. തമാശ എന്ന പേരില്‍ കുറെയധികം കോപ്രയിത്തരങ്ങള്‍ വേറെയും .

ഇതെല്ലാം സഹിക്കാന്‍ മാത്രം പ്രേക്ഷകന്‍ എന്ത് തെറ്റ് ചെയ്തു എന്ന് വിചാരിച്ചിരിക്കുമ്പോഴേക്കും രണ്ടു നായികമാരും രണ്ടു വില്ലന്മാരും  കൂടി സിനിമയില്‍ എത്തുന്നു. ഇനിയങ്ങോട്ട് കഥ മെച്ചപ്പെടുമോ  എന്ന് കരുതുമ്പോഴേക്കും സസ്പെന്‍സ് എന്ന പേരില്‍ യഥാര്‍ത്ഥ ഇരട്ട സഹോദരന്‍ എന്ന് പറഞ്ഞു മറ്റൊരു അവതാരം കൂടി സിനിമയില്‍ നുഴഞ്ഞു കയറുന്നു. ഏച്ചു കൂട്ടി ഏച്ചു കൂട്ടി കഥയില്ലാതെ കോമാളിത്തരങ്ങൾ മാത്രം  കാട്ടിക്കൂട്ടാൻ  വിധിക്കപ്പെടുന്നവരായി മാറുന്നു "പ്രമുഖ" താരങ്ങൾ. ജഗതി ലാലു അലക്സ് തുടങ്ങിയവർക്കൊക്കെ  നല്ലൊരു വേഷം കൊടുക്കാൻ പോലും പിശുക്ക് കാണിക്കുന്നു  സംവിധായകൻ.

ആകെ മൊത്തം ടോട്ടല്‍ = നിലാവാരമില്ലാത്ത ഒരു സിനിമ. ഒരു  തല്ലിപ്പൊളി സിനിമ. 

*വിധി മാര്‍ക്ക്‌ = 2/10 
-pravin- 

Sunday, July 22, 2012

Agent Vinod


ശ്രീറാം രാഘവന്‍ സംവിധാനം ചെയ്ത് സൈഫ് അലി ഖാനും കരീനാ കപൂറും പ്രധാന വേഷങ്ങളില്‍ എത്തിയ ഈ സിനിമ റിലീസ് ആകുന്ന സമയത്ത് തന്നെ വിവാദമാകുകയും പാകിസ്താനില്‍ നിരോധിക്കുകയുമുണ്ടായിരുന്നു. 

കിലുക്കം സിനിമയില്‍ ജഗതി പറയുന്ന പോലെ ഒരു വെടിയും പൊകയും മാത്രമേ ഞാന്‍ കണ്ടുള്ളൂ എന്ന പോലെയാണ് ഈ സിനിമ കണ്ടിറങ്ങുന്ന പ്രേക്ഷകന്റെ അവസ്ഥ. കഥയും മറ്റ് നൂലാമാലകളും ചിന്തിച്ചു കഴിഞ്ഞാല്‍ വട്ടായി പോകും എന്നുള്ളത് കൊണ്ട്, സ്ക്രീനില്‍ കാണുന്ന കാഴ്ച കൂടുതല്‍ ചോദ്യങ്ങള്‍ ചോദിക്കാതെയങ്ങു  കാണുക  എന്നത് മാത്രമാണ് പ്രേക്ഷകന് സംവിധായകന്‍ അനുവദിച്ചിട്ടുള്ള ഏക ആസ്വാദന സ്വാതന്ത്ര്യം. 

തുടക്കം മുതല്‍ ഒടുക്കം വരെയുള്ള സീനുകൾ  പല പല രാജ്യങ്ങളിലും ചിത്രീകരിച്ചു കൊണ്ടാണ് കഥ പറയുന്നത്.  Cinematography നന്നായി   എന്നതൊഴിച്ചാല്‍ പല രംഗങ്ങളും മിനിമം യുക്തിക്ക് നിരക്കാനാകാത്തതും നിലവാരം പുലര്‍ത്താത്തതുമാണ് എന്നേ  പറയാന്‍ സാധിക്കുന്നുള്ളൂ. 

ആകെ മൊത്തം ടോട്ടല്‍ = ഒരു ആവറേജ് നിലവാരം പുലര്‍ത്താന്‍ കഷ്ട്ടപ്പെടുന്ന ഒരു കത്തി സിനിമ.

*വിധി മാര്‍ക്ക്‌ = 4 /10

Saturday, July 21, 2012

മാസ്റ്റേഴ്സ് സ്റ്റുഡന്‍സിന്റെ നിലവാരം പോലും കാണിച്ചില്ലേ ?

ജിനു എബ്രഹാം എഴുതി ജോണി ആന്റണി സംവിധാനം ചെയ്ത ഈ സിനിമ ഒരു സസ്പെന്‍സ് ത്രില്ലര്‍ എന്നൊക്കെ കൊട്ടി ഘോഷിച്ചാണ് വന്നത്. നല്ലൊരു കഥ കയ്യിലുണ്ടായിട്ടും അത് മികച്ച ഒരു തിരക്കഥയാക്കി മാറ്റാന്‍ എഴുത്തുകാരന് സാധിച്ചില്ല എന്നതാണ് ഈ സിനിമയുടെ ആദ്യ വീഴ്ച . ജോണി ആന്റണി എന്ന സംവിധായകന് എടുത്തു പൊക്കാന്‍ പറ്റാവുന്ന ഒരു സിനിമ ആയിരുന്നോ മാസ്റ്റേഴ്സ് എന്നതാണ് മറ്റൊരു ചിന്തിക്കെണ്ടിയിരുന്ന കാര്യം. 

സുബ്രഹ്മണ്യപുരം എന്ന തമിഴ് സിനിമയിലൂടെ ആദ്യമായി അഭിനയ രംഗത്തേക്ക് കടന്നു വരുകയും, അതിലൂടെ മോശമില്ലാത്ത പ്രകടനം കാഴ്ച വക്കുകയും ചെയ്ത ശശികുമാര്‍ ഈ സിനിമയില്‍ എന്തിനു അഭിനയിച്ചു അല്ലെങ്കിൽ  എഎന്താണ്  അഭിനയിച്ചത്  എന്നത് ഇപ്പോഴും പിടി കിട്ടാത്ത ഒരു സംഗതിയാണ്. ഇത്രക്കും വഷള് അഭിനയം ഇപ്പോള്‍ അടുത്ത കാലത്തൊന്നും ഒരു നടനില്‍ കണ്ടതായി ഓര്‍ത്തെടുക്കാന്‍ പോലും പറ്റുന്നില്ല. 

എന്തായാലും ചത്ത കുട്ടിയുടെ ജാതകം നോക്കിയിട്ട് ഇനി കാര്യമില്ലല്ലോ, അടുത്ത തവണയെങ്കിലും നല്ലൊരു സിനിമ സംവിധാനം ചെയ്തു കൊണ്ട് ഈ സിനിമയിലൂടെ കേട്ട ചീത്തപ്പേര് മാറ്റാന്‍ ജോണി ആന്റണിക്ക് കഴിയട്ടെ എന്നാശംസിക്കുന്നു. 

ആകെ മൊത്തം ടോട്ടല്‍ = ഒരു സസ്പെന്‍സ് ത്രില്ലര്‍ കഥ പറയാന്‍ പോകുന്ന രീതിയില്‍ കഥ തുടങ്ങുകയും പിന്നീട് എല്ലാ തലങ്ങളിലും മോശം നിലവാരം പുലര്‍ത്തുകയം ചെയ്ത ഒരു ബിലോ ആവറേജ് പടം. 

*വിധി മാര്‍ക്ക്‌ = 3.5/10 
-pravin-

Wednesday, July 18, 2012

22 ഫീമെയില്‍ കോട്ടയം - ആധുനിക സ്ത്രീയെ വരച്ചു കാണിച്ച സിനിമയോ ?


ടെസ്സ എന്ന കോട്ടയംകാരി നഴ്സിംഗ്  വിദ്യാര്‍ഥിയുടെ ജീവിതകഥ സംവിധായകന്‍ ആഷിക് അബു വളരെ നന്നായി തന്നെ സിനിമയില്‍  ആവിഷ്ക്കരിച്ചിരിക്കുന്നു. അഭിനയത്തിന്‍റെ കാര്യത്തില്‍ റീമയും , ഫഹദും, മറ്റ് നടീ നടന്മാരും അഭിനന്ദനം അര്‍ഹിക്കുന്നു.  ടി ജി രവി തനിക്കു കിട്ടിയ രോഗിവേഷം മികവോട് കൂടി അഭിനയിച്ചിരിക്കുന്നു.  കോട്ടയംകാരിയുടെ ഭാഷാ ശൈലി റീമ കല്ലിങ്ങല്‍ വേണ്ട പോലെ സിനിമയില്‍ പ്രതിഫലിപ്പിച്ചില്ല. 

സിനിമയിലെ ടെസ്സ പുതിയ തലമുറയില്‍ പെട്ട പെണ്‍കുട്ടികളെ ആണോ പ്രതിനിധീകരിക്കുന്നത് ? അതോ ബാംഗ്ലൂരില്‍ പോയി പഠിക്കുന്ന , ജോലി ചെയ്യുന്ന ചിലരെ മാത്രമോ? എന്തായാലും, പുത്തന്‍ തലമുറയിലെ പെണ്‍കുട്ടികള്‍ പ്രത്യേകിച്ച് കേരളത്തിനു പുറത്തു പോയി പഠിക്കുന്ന പെണ്‍കുട്ടികള്‍ കള്ള് കുടിക്കാനും , അല്‍പ്പം പോക്കെറ്റ്‌ മണി കിട്ടാന്‍ ഒരാണിന്റെ അല്ലെങ്കില്‍ ഏതെങ്കിലും പടു കിളവന്റെ വരെ കിടക്ക പങ്കിടാന്‍ സന്നദ്ധത കാണിക്കുന്നതായി ഈ ചിത്രം ചൂണ്ടിക്കാണിക്കുന്നു. ഇന്നത്തെ പെണ്‍ സമൂഹത്തിലെ ഒരു പച്ചയായ സത്യം സംവിധായകന്‍ സിനിമയില്‍ തുറന്നു കാണിച്ചിരിക്കുന്നു. 

കൊച്ചിയില്‍ പഠിക്കാന്‍ പോയ അനിയത്തി ടിസ്സ മുടിയെല്ലാം ബോബ് ചെയ്തു  തന്നെ കാണാന്‍  വരുമ്പോള്‍ ടെസ്സ ചോദിക്കുന്ന ഒരു ചോദ്യമുണ്ട്. 

"ഇത്രയും കാലം ബാംഗ്ലൂരില്‍ താമസിച്ച എനിക്കില്ലാത്ത മാറ്റമാണോ കുറച്ചു മാസങ്ങള്‍ കൊച്ചിയില്‍ താമസിച്ച നിനക്ക് സംഭവിച്ചത് "

ഇവിടെ ഇന്നത്തെ ആധുനിക പെണ്‍ സമൂഹത്തിന്റെ,  മാറ്റം എന്ന വാക്കിനോടുള്ള കാഴ്ചപ്പാടാണ് തെളിഞ്ഞു വരുന്നത്. ഇത്തരം ആധുനിക സ്ത്രീ കാഴ്ചപ്പാടുകള്‍  ബാംഗ്ലൂരില്‍ ജീവിക്കുന്ന പെണ്‍കുട്ടികളേക്കാള്‍ കൂടുതല്‍ വേഗത്തില്‍ നമ്മുടെ കൊച്ചിയെന്ന നഗരത്തില്‍ ജീവിക്കുന്ന പെണ്‍കുട്ടികള്‍ക്ക് സംഭവിച്ചു കൊണ്ടിരിക്കുന്നു എന്ന ഒരു സൂചന സംവിധായകന്‍ ഈ ഒരൊറ്റ ഡയലോഗില്‍ കൂടി പ്രേക്ഷകരില്‍ എത്തിച്ചിരിക്കുന്നു. പെണ്ണിന് മുടിയഴകും , ചാരിത്ര്യവും ആവശ്യമില്ല എന്ന നിലപാടുകളില്‍ അല്‍പ്പം പോലും വിട്ടു വീഴ്ച ചെയ്യാന്‍ തയ്യാറല്ലാത്ത ഒരു വിഭാഗം പെണ്‍കുട്ടികളെയാണ് സംവിധായകന്‍ ഈ സിനിമയിലൂടെ പരിചയപ്പെടുത്താന്‍ പ്രധാനമായും ശ്രമിച്ചത് എന്നു തന്നെ പറയാം.  

 ഒരു ഘട്ടത്തില്‍, സിറില്‍ (ഫഹദ് ) വന്നു വിളിക്കുമ്പോള്‍ ഒരു മടിയും കൂടാതെ അയാള്‍ക്കൊപ്പം താമസിക്കാനും  ശാരീരിക ബന്ധം പുലര്‍ത്താനും ടെസ്സ തയ്യാറാകുന്നു.   ഒരു പെണ്ണിന് ഒരാണിന്റെ കൂടെ ജീവിക്കാന്‍ വിവാഹ ബന്ധത്തിന്‍റെ ആവശ്യം ഇല്ല എന്ന ആശയം പറയുന്ന  ഒരു living together style ആണ് ടെസ്സയും സിറിലും ഈ സിനിമയില്‍ നയിക്കുന്നത്.  ചെറുപ്പത്തില്‍ ഒരു ബുദ്ധി മോശം കൊണ്ട് താന്‍ ലൈംഗികമായി മറ്റൊരാളാല്‍ പീഡിപ്പിക്കപെട്ടു എന്ന് അവകാശപ്പെടുന്ന ടെസ്സ സിറിലുമായി ഇത്തരം ഒരു ജീവിത രീതിയിലേക്ക് മാറുന്നതില്‍ നിന്ന് നമ്മള്‍ എന്ത് മനസിലാക്കേണ്ടിയിരിക്കുന്നു ? ഇങ്ങനെ പണ്ടൊരിക്കല്‍ പീഡിപ്പിക്കപ്പെട്ട ഒരു പെണ്‍കുട്ടി  വീണ്ടും അറിഞ്ഞു കൊണ്ട് റെയില്‍ പാളത്തില്‍ തല വച്ച് കൊടുക്കുമെന്ന് തന്നെയാണോ സംവിധായകന്‍ പറയാന്‍ ശ്രമിച്ചത്?

ജയിലിലെത്തിയ ശേഷം  തന്നെ ചതിച്ചവരോട് പ്രതികാരം വീട്ടാന്‍ തീരുമാനമെടുക്കുന്ന നായികക്ക് വില്ലന്മാരെ കുറിച്ച് വിശദീകരിച്ചു കൊടുക്കുന്ന സുബൈദ എന്ന തടവുകാരിക്ക് എങ്ങനെ ഇത്രയേറെ വിവരങ്ങള്‍ പറയാന്‍ സാധിക്കുന്നു എന്നത് സംബന്ധിച്ച് അല്‍പ്പം അതിശയോക്തി നമുക്ക് തോന്നിയേക്കാം. സിനിമാവസാനം, പ്രതികാരബുദ്ധിയുള്ള   നായിക, തന്നെ ചതിച്ച നായകന്‍റെ ലിംഗം ശസ്ത്രക്രിയയാല്‍  മുറിച്ചു മാറ്റിയ ശേഷം ഇവര്‍ക്കിടയില്‍ നടക്കുന്ന സംഭാഷണങ്ങള്‍ വേണ്ടത്ര മികവു പുലര്‍ത്തിയില്ല. പ്രത്യേകിച്ച് നായകന് നായികയോട് മനസ്സില്‍ ഇപ്പോഴും ഒരിഷ്ടം ഉണ്ടെന്നു വെളിവാക്കപ്പെട്ടു കൊണ്ട് സിനിമ അവസാനിപ്പിക്കുന്ന ഒരു രീതി അത്ര നന്നായെന്നു തോന്നിയില്ല, " നീയാണ് പെണ്ണ് " എന്ന് പറഞ്ഞു കൊണ്ട് നായകന്‍ നായികയെ വര്‍ണിക്കുന്നത് എന്ത് അര്‍ത്ഥത്തില്‍ ആണെന്നത് ഇപ്പോഴും പിടി കിട്ടിയിട്ടില്ല. 

എന്തായാലും വളരെ കാലത്തിനു ശേഷം ഇത്തരത്തിലുള്ള സ്ത്രീ പ്രതികാര കഥ പറയുന്ന ഒരു സിനിമ കണ്ടതില്‍. എല്ലാ സ്ത്രീ പ്രേക്ഷകര്‍ക്കും  ആശ്വസിക്കാം, ഇതല്ല യഥാര്‍ത്ഥ പെണ്ണ് എന്ന് അറിഞ്ഞു കൊണ്ട് തന്നെ ഈ സിനിമയെ നല്ലൊരു സ്ത്രീ പക്ഷ സിനിമയായി തന്നെ കണ്ടിരിക്കാം. 

ആകെ മൊത്തം ടോട്ടല്‍  = കണ്ടിരിക്കാന്‍ പറ്റുന്ന ഒരു സിനിമ. 

*വിധി മാര്‍ക്ക്‌ = 7/10 
-pravin- 

Saturday, July 14, 2012

Vicky Donor


ജൂഹി ചതുര്‍വേദി എഴുതി  ഷൂജിത് സിര്‍ക്കാര്‍ സംവിധാനം ചെയ്ത ഈ സിനിമയ്ക്കു വേണ്ടി നിര്‍മാണ ചെലവ് വഹിച്ചത് ബോളിവുഡ് നടനായ ജോണ്‍ എബ്രഹാം ആണ്. 

സിനിമയിലെ  വിക്കി എന്ന നായക കാഥാപാത്രം  തൊഴില്‍ രഹിതനും  ജീവിതത്തോട്  അലസമായ കാഴ്ചപ്പാടുകള്‍ വച്ച് പുലര്‍ത്തി കൊണ്ട് നടക്കുന്നവനുമായാ ഒരു  ചെറുപ്പക്കാരന്‍ ആണ്. ഈ കാരണം കൊണ്ട് തന്നെ സ്വന്തം വീട്ടില്‍ ഇവനൊരു തലവേദനയാണ്. ഒരിക്കല്‍  fertility clinic നടത്തുന്ന ഡോക്റ്റര്‍ ബല്‍ദേവ്നെ പരിചയപ്പെടുന്നു. ബല്‍ദേവ് സ്വന്തം ക്ലിനിക്‌ നടത്തുന്നതോടൊപ്പം ഒരു sperm bank കൂടി നടത്തുന്നുണ്ട്.  കുട്ടികളില്ലാത്ത ഭാര്യാ ഭര്‍ത്താക്കന്മാര്‍ക്ക് ഉന്നതകുലജാതരായ ആളുകളുടെ ബീജം കൊടുക്കുകയും, അത് കൊണ്ട് കുട്ടികള്‍ ഉണ്ടാകുന്ന സന്തുഷ്ടരായ ദമ്പതിമാര്‍ ഡോക്ടർക്ക്  സ്നേഹ സമ്മാനങ്ങളും പണവും നല്‍കി വരുന്നു.  

വിക്കിയെ അത്തരത്തിലൊരു  ബീജ ദാതാവാക്കി മാറ്റുന്നതില്‍ ഡോക്ടർ  വിജയിക്കുന്നു. ആഗ്രഹിക്കുന്ന പണവും മറ്റ് സമ്മാനങ്ങളും കിട്ടിക്കൊണ്ടിരിക്കുന്ന വിക്കി ജീവിതത്തില്‍ സന്തോഷവാനാകുന്നു. ആയിടക്ക് ബാങ്കില്‍ വച്ച് പരിചയപ്പെടുന്ന ഒരു ബംഗാളി യുവതി ആഷിമയുമായി വിക്കി പ്രണയത്തിലാകുന്നു. വീട്ടുകാരുടെ എതിര്‍പ്പുകളെ രണ്ടു പേരും ശക്തമായി നേരിടുന്നു. അവരുടെ സമ്മതപ്രകാരം തന്നെ വിവാഹവും നടക്കുന്നു. ആഷിമക്ക് ഒരു കുഞ്ഞിന്‍റെ അമ്മയാകാന്‍ സാധിക്കില്ല എന്നറിയുമ്പോഴും വിക്കി അവളെ കൈവിടുന്നില്ല. പക്ഷെ, അതിനിടയില്‍ വിക്കിയുടെ ബീജ ദാനത്തെ കുറിച്ച് ആഷിമ അറിയാനിടയാകുന്നു. വിക്കിയുടെ നിലപാടുകളോട് കടുത്ത എതിര്‍പ്പ് പ്രകടിപ്പിക്കുന്നതോടൊപ്പം തന്നെ ആഷിമ വിക്കിയുമായി പിരിയുന്നു. 

തുടര്‍ന്നങ്ങോട്ട് ഡോക്ടറുടെ  മധ്യസ്ഥത്തില്‍ കാര്യങ്ങള്‍ ഒത്തു തീര്‍പ്പാക്കുന്നതോടൊപ്പം വിക്കിയേയും ആഷിമയെയും കുഞ്ഞുങ്ങളില്ലാത്ത അച്ഛനമ്മമാരുടെ ദുഖത്തെ  കുറിച്ച് ഡോക്ടർ പറഞ്ഞു മനസിലാക്കുന്നു. വിക്കിയുടെ ബീജദാനം കൊണ്ട് മാത്രം  ജീവിതത്തില്‍ ഒരു കുഞ്ഞിന്‍റെ അച്ഛനും അമ്മയുമായി തീർന്ന സന്തുഷ്ടരായ ഒരുപാട് ദമ്പതിമാരെ   തന്‍റെ ക്ലിനിക്കിന്റെ വാര്‍ഷിക ദിനത്തില്‍ ഡോക്ടർ  വിക്കിക്കും ആഷിമക്കും കാണിച്ചു കൊടുക്കുന്നുണ്ട്. വിക്കിയുടെ ബീജത്താല്‍ ഉണ്ടായ കുട്ടികളുടെ അച്ഛനമ്മമാരെ  മാത്രമേ ആ വാർഷിക ദിനത്തിൽ സംബന്ധിക്കുന്നതിനായി ക്ഷണിച്ചിരുന്നുള്ളൂ എന്ന് ഡോക്ടർ ആഷിമയോടും വിക്കിയോടും പറയുന്നുണ്ട്. ആ സമയം അവിടെയുണ്ടായിരുന്ന 53 കുഞ്ഞുങ്ങളെയും വിക്കി അതിശയത്തോടെ നോക്കി കാണുമ്പോള്‍  ആഷിമ ആ കുഞ്ഞുങ്ങളെയെല്ലാം  ഒരമ്മയുടെ കണ്ണുകളാൽ  നോക്കി കാണാന്‍ ശ്രമിക്കുകയായിരുന്നു. 

വിക്കിയായി ആയുഷ്മാന്‍ ഖുരാനയും, ഡോക്ടര്‍ ബല്‍ദേവ് ആയി അന്നു കപൂറും, ആഷിമയായി യാമി ഗൌതമും മികച്ച പ്രകടനം കാഴ്ച വച്ചിരിക്കുന്നു.  

ആകെ  മൊത്തം ടോട്ടല്‍ = ഒട്ടും ബോറടിപ്പിക്കാതെ  രസകരമായ ഭാഷയില്‍ ഒരു വ്യത്യസ്ത കഥ അവതരിപ്പിച്ചിരിക്കുന്നു. സിനിമ കൈകാര്യം ചെയ്യുന്ന വിഷയത്തോടുള്ള അനാവശ്യ നിരീക്ഷണങ്ങളും  കാഴ്ചപ്പാടുകളും  വിമര്‍ശനങ്ങളും ഒഴിവാക്കി കൊണ്ട് കാണാന്‍ തയ്യാറെങ്കില്‍  കണ്ടിരിക്കാന്‍ പറ്റിയ ഒരു കൊച്ചു സിനിമ തന്നെയാണിത്. 

*വിധി  മാര്‍ക്ക്‌ = 7.5 /10  
-pravin- 

Thursday, July 12, 2012

ഉസ്താദ് ഹോട്ടല്‍ - സ്വാദിഷ്ടമായ സന്ദേശം വിളമ്പിയ ഹോട്ടല്‍





റസാഖ്‌  (സിദ്ധിഖ്), ഏറെ കാലത്തെ കാത്തിരിപ്പിന് ശേഷമാണ് ഒരു ആണ്‍കുട്ടിയുടെ ബാപ്പയാകുന്നത്. ആ ആണ്‍കുട്ടിയാണ്  ഫൈസി (ദുല്ഖര്‍ സല്‍മാന്‍ ). ചെറുപ്പത്തിലെ, ഉമ്മ മരിച്ചു പോകുന്ന ഫൈസിയെ വളര്‍ത്തുന്നത് അവന്‍റെ നാല് ചേച്ചിമാര്‍ കൂടിയാണ്. ബാപ്പ ഗള്‍ഫില്‍ വലിയ തിരക്കുള്ള ബിസിനസ്സുകാരനായി മാറുകയും, മക്കളെ കൂടെ ഗള്‍ഫിലേക്ക് കൊണ്ട് വരുകയും ചെയ്യുന്നു.  ഒരു വലിയ വീട്ടില്‍ ചേച്ചിമാരുടെ കൂടെ അടുക്കളയില്‍ കളിച്ചു വളരുന്ന, ഫൈസിയുടെ ആഗ്രഹങ്ങള്‍ വളരുന്നത്‌ അതെ വീട്ടിലെ അടുക്കളയില്‍ നിന്നാണ്. ഫൈസി വിദേശത്തു പോയി പഠിച്ചതെല്ലാം വെറും ചെഫ്‌ ആകാനാണ് എന്ന് ബാപ്പ തിരിച്ചറിയുന്ന ദിവസം, ഫൈസിയെ തന്‍റെ വഴിയില്‍ കൊണ്ട് വരാന്‍ ബാപ്പ ശ്രമിക്കുന്നു. ഫൈസിയാകട്ടെ,  ബാപ്പയോട് പറയാതെ വീട് വിട്ടിറങ്ങി  ദൂരെയുള്ള   ഉപ്പൂപ്പയുടെ (തിലകന്‍ ) അടുത്തെത്തുന്നു. ഉസ്താദ് ഹോട്ടല്‍ എന്ന പേരില്‍ ഒരു പഴയ ഹോട്ടല്‍ നടത്തി വരുന്ന ഉപ്പൂപ്പയുമായും, ബാപ്പ പണ്ട് മുതലേ മാനസികമായി പൊരുത്തപ്പെട്ടിരുന്നില്ല എന്നത് ഫൈസിക്ക് ആദ്യമേ അറിയാമായിരുന്നു. തുടര്‍ന്നങ്ങോട്ട് ഫൈസിയുടെ ജീവിതത്തില്‍ നടക്കുന്ന മാറ്റങ്ങള്‍, ഫൈസി മനസിലാക്കുന്ന സത്യങ്ങള്‍, അതിനിടയില്‍ പണ്ട് കല്യാണം ആലോചന വരെ എത്തുകയും, അത് വഴി പരിചയപ്പെടുകയും ചെയ്ത ശഹാന യുമായുള്ള  (നിത്യ മേനോന്‍) നിശബ്ദ  പ്രണയം, നര്‍മം അങ്ങനെ എല്ലാം കൂട്ടിയിണക്കി കൊണ്ട് നല്ല രീതിയില്‍ തന്നെ കഥ പറഞ്ഞു പോകുന്നു. 

തന്‍റെ ആദ്യ സിനിമയില്‍ നിന്നും രണ്ടാമത്തെ സിനിമയിലേക്ക് എത്തിയപ്പോള്‍ ദുല്ഖര്‍ സല്‍മാന്‍ എന്ന നടന്‍ അല്‍പ്പം മെച്ചപ്പെട്ടിരിക്കുന്നു. ഈ സിനിമയിലെ നായകന്‍ തിലകന്‍ തന്നെ എന്നതില്‍ സംശയമില്ല. അദ്ദേഹത്തിന്‍റെ അഭിനയ മികവ് ഈ സിനിമയിലും പ്രകടമാണ്. മറ്റൊരു എടുത്തു പറയേണ്ട കാര്യം ഗോപി സുന്ദറിന്റെ സംഗീതമാണ്. സിനിമക്കും കഥയ്ക്കും അനുസരിച്ചുള്ള സംഗീതമായിരുന്നു  ഗോപി സുന്ദറിന്റേത്. 

സിനിമയില്‍ ഫൈസിയുടെ കഥാപാത്രം ജീവിതത്തില്‍ തന്‍റേതായ വഴി തിരഞ്ഞെടുക്കുന്നത് സംബന്ധിച്ച് സ്വന്തം ബാപ്പയില്‍ നിന്ന് എതിര്‍പ്പ് നേരിടുന്നത്  പോലെ തന്നെ, കുടുംബത്തിലെ ഇടുങ്ങിയ ചിന്താഗതിക്കാരാല്‍ ശഹാനക്ക്  തന്‍റെ ജീവിതത്തില്‍ കിട്ടേണ്ട സ്വാതന്ത്ര്യം ഹനിക്കപ്പെടുന്നതായി സിനിമയില്‍ പറയുന്നുണ്ട്. സ്ത്രീക്ക് യഥാര്‍ഥത്തില്‍  കിട്ടേണ്ട സ്വാതന്ത്ര്യം എന്താണെന്ന് സിനിമയില്‍ വിശദീകരിക്കുന്നില്ല. അതിനു പകരം കാണിക്കുന്നത് പര്‍ദ്ദ വേഷത്തില്‍ കറങ്ങാന്‍ പോകുകയും, വേണ്ട സമയത്ത് പര്‍ദ്ദ ഉപേക്ഷിച്ച് ഏത് പാതിരായിലും  സ്വന്തം വീടിന്‍റെ മതില് ചാടി, കള്ള് കുടിച്ചു ബോധം മറയുന്ന ആണ്‍ സുഹൃത്തുക്കളുടെ കൂടെ കലാപരിപാടികള്‍ (ബാന്‍ഡ്) അവതരിപ്പിക്കാന്‍ പോകുന്ന ഒരു പുത്തന്‍ തലമുറയിലെ പെണ്‍മനസിനെയാണ്. ഇത്തരം ഒരു സ്വാതന്ത്ര്യമാണ് യുവ പെണ്‍തലമുറ ആഗ്രഹിക്കുന്നതെന്ന് ആധികാരികമായി ഇവിടെ പ്രസ്താവിച്ചിരിക്കുന്നു. 

ആദ്യ പകുതിക്ക് ശേഷം  സിനിമ അതിന്‍റെ കര്‍ത്തവ്യത്തിലേക്ക് മടങ്ങി വരുന്ന കാഴ്ചയാണ് കാണാന്‍ സാധിക്കുക. സിനിമ വെറും ഒരു കച്ചവടം മാത്രമാണെന്ന നിലയില്‍ പ്രേക്ഷകര്‍ക്ക്‌ കഴിക്കാന്‍ പഴകിയ ഭക്ഷണം വിളമ്പാതെ, സ്വാദിഷ്ടമായ ഒരു ദം ബിരിയാണി നല്‍കുന്നതോടൊപ്പം നല്ലൊരു   സാമൂഹിക സന്ദേശം കൂടി വിളമ്പിയ ഉസ്താദ് ഹോട്ടലിനെ അഭിനന്ദിക്കാതെ വയ്യ

സമൂഹത്തിലേക്കു തുറന്നു പിടിച്ച ക്യാമറയിലൂടെയാണ് സിനിമയിലെ അവസാനത്തെ അര മുക്കാല്‍ മണിക്കൂറുകള്‍ കടന്നു പോകുന്നത്. ഓരോ ആളുകളുടെയും ജീവിതത്തില്‍ അവരുപോലും അറിയാതെ വന്നെത്തുന്ന ചില നിയോഗങ്ങള്‍, ആ നിയോഗങ്ങളാണ്, സത്യത്തില്‍ ജീവിതത്തെ എങ്ങോ എത്തിക്കുന്നത്. സമൂഹത്തിലെ പലതും നമ്മള്‍ കണ്ടില്ല കേട്ടില്ല എന്ന് നടിച്ചു കൊണ്ട് സുഖമായി ജീവിക്കാന്‍ തീരുമാനിക്കപ്പെട്ടാലും, ചിലപ്പോളൊക്കെ സത്യത്തിലേക്കും യാഥാര്‍ത്ഥ്യത്തിലേക്കും നമുക്ക് മടങ്ങി തന്നെ വരേണ്ടിയിരിക്കും എന്ന മനോഹരമായ സന്ദേശം നല്‍കുന്നതോടൊപ്പം, സമൂഹത്തില്‍ സിനിമ എന്ന കലക്ക്  കിട്ടേണ്ട  പ്രസക്തിയെ  കുറിച്ചും കൂടി ഉസ്താദ് ഹോട്ടല്‍ നമ്മെ ഓര്‍മപ്പെടുത്തുന്നു. 
ഉപ്പൂപ്പ കൊടുക്കുന്ന സുലൈമാനി ഒരു കാവില്‍ കുടിച്ച  ശേഷം എന്തോ പ്രത്യേകത അനുഭവപ്പെട്ട ഫൈസി ഉപ്പൂപ്പായോടു ചോദിക്കുന്നു 

"ന്താ ഇതില്‍ ങ്ങള് ഇട്ടതു, നല്ല ടേസ്റ്റ്..കറുക പട്ട,...ഗ്രാമ്പൂ..അതോ ഏലമോ...പറ ഉപ്പൂപ്പാ.."

സുലൈമാനി കുടിച്ചു കൊണ്ടിരിക്കുന്ന ഉപ്പൂപ്പ പറയുന്നു.

 " ഹ ..ഹ ..അതൊന്നുമല്ല ...ഞാന്‍ അയില് എന്ത് ഇട്ടു എന്നതിനൊക്കെ അപ്പുറം അനക്ക് അത് കുടിച്ചിട്ട് എന്ത് തോന്നുന്നു എന്നതാണ് കാര്യം ".

അതെ അത് തന്നെയാണ് ഈ സിനിമ കാണുന്ന പ്രേക്ഷകരും മനസിലാക്കേണ്ടത്. നിങ്ങള്‍ക്ക് ഈ സിനിമ കണ്ടിട്ട് എന്ത് തോന്നുന്നോ അതാണ്‌ ഈ സിനിമ. 

ആകെ മൊത്തം ടോട്ടല്‍ =  വലിയൊരു  സന്ദേശമുള്ള കണ്ടിരിക്കാന്‍  പറ്റുന്ന  ഒരു കൊച്ചു സിനിമ. 

* വിധി മാര്‍ക്ക്‌ = 7/10
-pravin-

അഭിയും നാനും


പ്രിഥ്വി രാജ്, പ്രകാശ്‌ രാജ്, ഐശ്വര്യ, തൃഷ  എന്നിവര്‍ അഭിനയിച്ച ഈ ചിത്രം ഒരു അച്ഛന്റെയും മകളുടെയും ആത്മബന്ധത്തിന്റെ കഥയാണ്‌ പ്രധാനമായും പറയുന്നത്. ഒരുപാട്  നര്‍മ മുഹൂര്‍ത്തങ്ങളിലൂടെ കഥ പറഞ്ഞു പോകുമ്പോഴും സിനിമ നമ്മുടെ  കണ്ണിനെ ഈറനണിയിക്കുന്നുണ്ട്.   ഓരോ മനുഷ്യരില്‍ നിന്നും അവരുടെ യെല്ലാം ജീവിതത്തില്‍ നിന്നും നമുക്കെല്ലാവര്‍ക്കും  ജീവിതത്തെ കുറിച്ച് ഒരുപാട് പഠിക്കാനും മനസ്സിലാക്കാനുണ്ട് എന്ന് ഈ സിനിമ ഓര്‍മ്മപ്പെടുത്തുന്നു. അവിടെ കുട്ടിയെന്നോ  മുതിര്‍ന്നവരെന്നോ ഇല്ല. എല്ലാവരും വിദ്യാർഥികൾ മാത്രമാണ്. 

 അഭി ഒരിക്കല്‍ തന്റെ വീട്ടിലേക്കു ഒരു ഭിക്ഷക്കാരനെ കൊണ്ട് വരുന്നുണ്ട്. അയാള്‍ക്ക് ജീവിക്കാന്‍ ഒരു ജോലി വീട്ടില്‍ തന്നെ കൊടുക്കണം എന്ന് അച്ഛനോട് പറയുകയും മകളുടെ ഇഷ്ടാനുസരണം അച്ഛൻ അത് സാധിച്ചു കൊടുക്കുകയും ചെയ്യുന്നു. ഭിക്ഷക്കാരന്റെ താടിയും മുടിയും എല്ലാം വെട്ടി ഒരു പുതിയ കുടുംബാംഗം എന്ന നിലയില്‍ അയാള്‍ ആ വീട്ടില്‍ കഴിഞ്ഞു വരുന്നു. ഒരു ദിവസം  മകള്‍ അഭി അയാളെയും കൂടെ തങ്ങള്‍ ഡിന്നര്‍ കഴിക്കാന്‍ പോകുന്ന വലിയ ഹോട്ടലില്‍ കൊണ്ട് പോകണം എന്ന് അച്ഛനോട് പറയുകയും അച്ഛന്‍ അയാളെ കൂടെ കൂട്ടുകയും ചെയ്യുന്നു. തീന്‍ മേശ മര്യാദകള്‍ അറിയാതെ നോക്കിയിരിക്കുന്ന അയാളോട് ഭക്ഷണം കഴിക്കാന്‍ പറയുന്നു. അയാള്‍ കരഞ്ഞു കൊണ്ട് പറയുന്നത്  ആദ്യമായാണ് താൻ  ഇത്രയും കാലത്തിനിടയില്‍ ഒരു ഹോട്ടൽ  മുറിയിലിരുന്നു  ഭക്ഷണം കഴിക്കുന്നത്‌ എന്നാണ്. അഭി അയാളെ ഭക്ഷണം കഴിക്കാന്‍ പഠിപ്പിച്ചു കൊടുക്കുമ്പോള്‍ അയാള്‍ അവളെ നോക്കി  പറയുന്നത്  "ഇത് എന്‍റെ അമ്മയാണ്" എന്നാണ്. ഈ രംഗങ്ങളെല്ലാം തന്നെ വളരെ ഹൃദ്യമായാണ് സംവിധായകൻ  ചിത്രീകരിച്ചിരിക്കുന്നത്. ഇതോടൊപ്പം പ്രകാശ്‌ രാജ് എന്ന നടന്‍റെ അഭിനയ മികവ് എടുത്ത് പറയാതിരിക്കാനാകില്ല. 

ഒരുപാട് നല്ല മുഹൂര്‍ത്തങ്ങള്‍ കോര്‍ത്തിണക്കി കൊണ്ട് പോകുന്ന ഈ സിനിമ പിന്നീട് ചര്‍ച്ച ചെയ്യുന്ന  വിഷയങ്ങള്‍ക്ക് നമ്മുടെയെല്ലാം  ജീവിതത്തില്‍ ഒരുപാട് പ്രസക്തി ഉണ്ട് 


ആകെ മൊത്തം ടോട്ടല്‍ = വളരെ നല്ല സിനിമ.

* വിധി മാര്‍ക്ക്‌ = 8/10 

-pravin- 

Wednesday, July 11, 2012

ഭൂമി മലയാളം


ടി വി ചന്ദ്രന്‍ സംവിധാനം ചെയ്ത്, സുരേഷ് ഗോപി, പത്മ പ്രിയ , സംവൃതാ സുനില്‍, നെടുമുടി വേണു , ലക്ഷ്മി ശര്‍മ , ഇര്‍ഷാദ് തുടങ്ങീ നടീ നടന്മാര്‍ അഭിനയിച്ച സിനിമയാണ് ഭൂമി മലയാളം. 

വളരെ ശക്തമായ സ്ത്രീ കഥാപാത്രങ്ങള്‍  നിറഞ്ഞു നില്‍ക്കുന്ന ഒരു വ്യത്യസ്ത ടി. വി ചന്ദ്രന്‍ സിനിമയാണ് ഇത്. കണ്ണൂര്‍ രാഷ്ട്രീയ കൊലപാതകങ്ങള്‍ക്കെതിരെ സംവിധായകന്‍റെ ഒരു തുറന്ന വീക്ഷണം സിനിമയില്‍ വിസ്തരിക്കപ്പെടുന്നതോടൊപ്പം പഴയ കാല കണ്ണൂര്‍ കമ്മ്യൂണിസ്റ്റ്‌ ചരിത്രവും സിനിമയില്‍ കാണിക്കുന്നു. 

പലപ്പോഴും തന്‍റെ  ഇടതുപക്ഷ ചിന്താഗതികള്‍ സിനിമയില്‍ ഉള്‍ക്കൊള്ളിക്കാന്‍ ശ്രമിക്കാറുള്ള ഒരു സംവിധായകനാണ് ടി. വി ചന്ദ്രന്‍.,. പക്ഷെ , ഈ സിനിമയില്‍ അദ്ദേഹം അത്തരം നിലപാടുകള്‍ സിനിമയില്‍ പ്രകടിപ്പിക്കുന്നുണ്ടെങ്കിലും , രാഷ്ട്രീയ കൊലപാതകം എന്ന വിഷയത്തില്‍ തന്‍റെ രാഷ്ട്രീയത്തെ മറന്നു കൊണ്ട് തികച്ചും മാനുഷികമായ വീക്ഷണത്തിനു കൂടുതല്‍ പ്രസക്തി കൊടുക്കുന്നു. ഏത് പാര്‍ട്ടിയില്‍ പെട്ട ആളുകള്‍ കൊല്ലപ്പെട്ടാലും , അത് നഷ്ടപ്പെടുത്തുന്നത് ഒരു കുടുംബത്തിലെ ഒരംഗത്തെ അല്ലെങ്കില്‍ പ്രതീക്ഷകളും ആഗ്രഹങ്ങളും ഉള്ള ഒരു ജീവനെ തന്നെയാണ് എന്ന് സംവിധായകന്‍ നമ്മെ ഓര്‍മപ്പെടുത്തുന്നു. 

സിനിമയില്‍ നെടുമുടി വേണു അവതരിപ്പിക്കുന്ന കഥാപാത്രം  മകന്‍ നഷ്ടപ്പെട്ട അച്ഛനെ പ്രതിനിധീകരിക്കുന്നു. കുടുംബത്തിനു താങ്ങും തണലുമാകേണ്ട മകന്‍ പോലീസുകാരാലാണ് കൊല്ലപ്പെടുന്നത്. അതിനു നഷ്ടപരിഹാരം കൊടുക്കാമെന്നു പറയുന്ന മന്ത്രി സഭ , പിന്നീട് വാക്ക് പാലിക്കുന്നില്ല. വൃദ്ധനായ അച്ഛന്‍ സെക്രട്ടറിയേറ്റ് പല തവണ കയറി ഇറങ്ങുന്നുവെങ്കിലും കാര്യങ്ങള്‍ നടക്കുന്നില്ല. ഒരു കവല മുഴുവന്‍ അയാളുടെ നിസ്സഹായ അവസ്ഥയെ പരിഹസിച്ചു ചിരിക്കുന്നതായാണ് സംവിധായകന്‍ കാണിച്ചിരിക്കുന്നത്. 

സുരേഷ് ഗോപി രണ്ടു വേഷങ്ങളില്‍ അഭിനയിച്ചിരിക്കുന്നു. സഖാവ് അനന്തനായും ടൈലര്‍ നാരായണന്‍ കുട്ടിയായും സുരേഷ് ഗോപി കഥാപാത്രങ്ങളെ അഭിനയ മിതത്വം കൊണ്ട് പ്രേക്ഷകരുടെ ശ്രദ്ധയാകര്‍ഷിക്കുന്നു. 

സ്ത്രീ അടുക്കളയിലും ഭര്‍ത്താവിന്‍റെ കിടപ്പറയിലും മാത്രം ജീവിക്കാനുള്ള ഒരു ഉപഭോഗ വസ്തുവാണെന്ന് വാദിക്കുന്ന ഭര്‍ത്താക്കന്മാരുടെ പക്ഷത്താണ് ഇര്‍ഷാദ് അവതരിപ്പിക്കുന്ന കഥാപാത്രം. ഒട്ടും വ്യത്യസ്തമല്ല , പത്മപ്രിയ അവതരിപ്പിക്കുന്ന ഫൌസിയ എന്ന media worker ടെ ഗള്‍ഫ് ഭര്‍ത്താവിന്‍റെ കാഴ്ചപ്പാടും. ഈ നിലപാടുകളോട് സ്ത്രീയുടെ ശകതമായ പ്രതികരണവും അതിജീവനവും സിനിമയില്‍ കാണിക്കുന്നുണ്ട്. സമൂഹത്തില്‍ സ്ത്രീ ശാക്തീകരണം ആവശ്യമാണ്‌ എന്ന നിലപാട് പ്രേക്ഷകരിലേക്ക് എത്തിക്കാനുള്ള സംവിധായകന്‍റെ ഈ ശ്രമം അഭിനന്ദനീയം , സ്വാഗതാര്‍ഹം . 

 ഇടിച്ചു നിരത്തപ്പെട്ട ഒരു കുന്ന്, ആ കുന്നിലെ ചെറിയ മണ്‍ കൂനകള്‍ക്ക് മുകളില്‍ കയറി നിന്ന് കൊണ്ട് ഓരോ സ്ത്രീക്കും പറയാനുള്ളത് കുറെയധികം വിലാപങ്ങളുടെ കഥ. അതെ , പല കാരണങ്ങളാല്‍ പീഡിപ്പിക്കപ്പെടുന്ന ഒരു പറ്റം സ്ത്രീകളുടെ വിലാപമാണ്‌ ഈ സിനിമ. അതിലുമപ്പുറം ഈ സിനിമയെ വിലയിരുത്തുകയാണെങ്കില്‍, സാമൂഹ്യ വിഷയങ്ങളും, മനുഷ്യന്‍റെ വേദനകളും രോദനങ്ങളും ഓരോ കൊച്ചു കഥാപാത്രങ്ങളില്‍ നിറച്ചു കൊണ്ട് പ്രേക്ഷകനെന്ന സമൂഹത്തിനു മുന്നിലേക്ക്‌ തുറന്നു വിട്ടിരിക്കുന്നു എന്നും പറയാം. 

ഇത്തരം വിഷയങ്ങളിലേക്ക് തുടരെ തുടരെ എത്തി നോക്കുകയും വിശകലനം ചെയ്യുകയും, അതിലുമുപരി , ഇത്തരം വിഷയങ്ങളെ  സമൂഹ ശ്രദ്ധയിലേക്ക് പറത്തി വിടുകയും ചെയ്യുന്ന ടി. വി ചന്ദ്രന്‍ എന്ന അതുല്യ പ്രതിഭയെ നോക്കി കൊണ്ട് നമുക്ക് ഇക്കാരണങ്ങളാല്‍ നിസ്സംശയം പറയാവുന്ന ചില വാക്കുകളുണ്ട്. അയാള്‍ ഒരു കലാകാരനാണ് , അയാള്‍ ഒരു സാമൂഹ്യ ജീവിയാണ്, അയാള്‍ ഒരു മനുഷ്യനാണ്. 

ആകെ മൊത്തം ടോട്ടല്‍ = സാമൂഹിക പ്രതിബദ്ധതയും വിഷയങ്ങളും  തുളുമ്പി നില്‍ക്കുന്ന ഒരു നല്ല സിനിമ. 

വിധി മാര്‍ക്ക്‌ = 6.5/10 
-pravin- 

Dreams


അകിര കുറസോവയുടെ സിനിമകളെ കുറിച്ച് കേട്ടിട്ടുണ്ട് എന്നല്ലാതെ കണ്ട ഓര്‍മ എനിക്കുണ്ടായിരുന്നില്ല. അടുത്തിടെ ഒരു പഴയ മാതൃഭൂമി പത്രത്തില്‍  (ജപ്പാനില്‍ സുനാമി ഉണ്ടായ സമയത്തുള്ള വിവരണങ്ങളോട് അനുബന്ധിച്ചാണെന്നു തോന്നുന്നു) കുറസോവയെ കുറിച്ച് ഒരു ചെറിയ ലേഖനം വായിക്കാന്‍ ഇടയായി . 

ജപ്പാനില്‍ സുനാമി ഉണ്ടായ സമയത്ത് ആണവ നിലയങ്ങളിലെ പൊട്ടിത്തെറികള്‍ ജനങ്ങളെ ഭീതിയിലാക്കിയിരുന്നു. ഇതേ സംഭവം വര്‍ഷങ്ങള്‍ക്കു മുന്‍പ് അകിര കുറസോവ തന്റെ "ഡ്രീംസ്‌ " എന്ന സിനിമയില്‍ ആവിഷ്കരിച്ചിട്ടുണ്ട് എന്നതായിരുന്നു ആ  വാര്‍ത്ത. ആ വാര്‍ത്തയാണ് ഈ സിനിമ കാണാന്‍ എന്നെ പ്രേരിപ്പിച്ച ആദ്യ ഘടകം. 


കുറസോവയുടെ എട്ട്‌ സ്വപ്നങ്ങളാണ് ഈ സിനിമയില്‍ എട്ട്‌ കഥകളായി ചിത്രീകരിച്ചിരിക്കുന്നത്. സിനിമയിലെ ചില കഥകള്‍ വളരെ വലിച്ചു നീട്ടിയ രംഗങ്ങള്‍ പോലെ തോന്നിയേക്കാം. പക്ഷെ ഓരോ  രംഗങ്ങളിലെയും  ദൃശ്യ മനോഹാരിത നമ്മളെ ആകര്‍ഷിക്കുകയും അതിശയിപ്പിക്കുകയും ചെയ്യും എന്ന കാര്യം ഉറപ്പ്.  ഇംഗ്ലീഷ് സബ് ടൈറ്റിലോട് കൂടി ഈ സിനിമ  കാണുകയായിരിക്കും ഉത്തമം. ഡയലോഗിന്‍റെ പ്രസക്തി അങ്ങിനെയെങ്കില്‍ മാത്രമേ അനുഭവപ്പെടുകയുള്ളൂ. 


ഈ സിനിമയിലെ എട്ട്‌ സ്വപ്നങ്ങള്‍ക്കും പേരുകളുണ്ട്. എനിക്കേറ്റവും ഇഷ്ടപെട്ടത് The tunnel , Crows , Village of the Watermills എന്നീ മൂന്ന് സ്വപ്‌നങ്ങള്‍ ആണ്. ഇഷ്ടപെട്ടാതെ പോയ ഒരേ ഒരു സ്വപ്ന കഥ The blizzard ആണ്. 


ബാക്കി കഥകളെല്ലാം  മികച്ചതു തന്നെയെങ്കിലും  മേല്‍പ്പറഞ്ഞ  കഥകളെ അപേക്ഷിച്ച് എവിടെയോ ഒരിത്തിരി ആസ്വാദന കുറവ് ഉണ്ടാക്കി . cinematography യിലെ മികവ് എടുത്തു പറയേണ്ട ഒന്നാണ്. 

ആകെ മൊത്തം ടോട്ടല്‍ = വളരെ നല്ല സിനിമ 
* വിധി മാര്‍ക്ക്‌ = 9/10
-pravin-

ധോണി

പ്രകാശ് രാജ് കഥയും തിരക്കഥയും എഴുതി സംവിധാനം ചെയ്ത ഈ തമിള്‍ സിനിമ ഈ അടുത്താണ് കാണുന്നത്. പേര് സൂചിപ്പിക്കുന്ന പോലെ ധോനിയുമായി ബന്ധപ്പെടുത്തി കൊണ്ടുള്ള ഒരു സിനിമ തന്നെയാണിത്. മികച്ച ഒരു സിനിമ എന്നൊന്നും അവകാശപ്പെടാന്‍ പറ്റില്ല എങ്കിലും സാമാന്യം ഭേദപ്പെട്ട അല്ലെങ്കില്‍ വലിയ കുറ്റം പറയാതെ തന്നെ കണ്ടിരിക്കാവുന്ന ഒരു സിനിമ. ആ അര്‍ത്ഥത്തില്‍ ഒരു നല്ല സിനിമ കണ്ടെന്നും പറയാം. 


പ്രകാശ് രാജ് തന്നെയാണ് കേന്ദ്ര കഥാപാത്രത്തെ അവതരിപ്പിച്ചിരിക്കുന്നത്. സിനിമയില്‍ വിഭാര്യനും രണ്ടു കുട്ടികളുടെ അച്ഛനുമാണ് നായകന്‍. സര്‍ക്കാര്‍ ജോലിക്കാരന്‍ ആണെങ്കിലും കുടുംബം നോക്കാനും മക്കളുടെ പഠനച്ചിലവിനും വേണ്ടി അയാള്‍ മറ്റ് ചില ചെറിയ വരുമാന മാര്‍ഗങ്ങളും കൂടി കണ്ടെത്തിയിരുന്നു. മൂത്ത മകനാകട്ടെ , സദാ സമയവും ധോനിയെയും ക്രിക്കറ്റ്‌ കളിയേയും മാത്രം സ്വപ്നം കണ്ടു നടക്കുന്നു. പഠിത്തത്തില്‍ പിന്നിലാകുന്ന മകനെ പല തവണ അച്ഛന്‍ ശാസിക്കുന്നു. പിന്നെ ഗന്ത്യന്തരമില്ലാതെ ഒരു തവണ ദ്വേഷ്യം വന്ന് അടിക്കുന്നതിനിടയില്‍ തലയില്‍ സാരമായി പരുക്കേല്‍ക്കുകയും മകന്‍ കോമയില്‍ ആകുകയും ചെയ്യുന്നു. 



തുടര്‍ന്നുള്ള ഭാഗങ്ങളില്‍ മകന്റെ കഴിവില്‍ അച്ഛന്‍ അഭിമാനം കൊള്ളുകയും പഴയ ആരോഗ്യ സ്ഥിതിയിലേക്ക് തിരിച്ചു കൊണ്ട് വരാനുള്ള ശ്രമങ്ങളില്‍ ഏര്‍പ്പെടുകയും ചെയ്യുന്നു. നാടകീയവും യാദൃശ്ചികവുമായ രംഗങ്ങള്‍ ഉള്‍പ്പെടുത്തി കൊണ്ട് കഥാവസാനം മകന്‍ പഴയ രീതിയില്‍ തിരിച്ചെത്തുകയും ക്രിക്കറ്റ്‌ കളിക്കാരനായി തുടരുകയും ചെയ്യുന്നതോട് കൂടി സിനിമ കഴിയുന്നു. ഈ പറയുന്ന രംഗങ്ങളില്‍ എല്ലാം പ്രേക്ഷകന് ചിലപ്പോള്‍ സംവിധായകനുമായി ഒത്തു പോകാന്‍ സാധിച്ചെന്നു വരില്ല. ഇടക്കുള്ള രംഗങ്ങളില്‍ സംവിധായകന്‍ സാമൂഹ്യ പ്രസക്തിയുള്ള ചില വിഷയങ്ങള്‍ (ഇന്നത്തെ വിദ്യാഭ്യാസ സമ്പ്രദായം) ശ്രദ്ധയില്‍ പെടുത്താന്‍ ശ്രമിക്കുന്നുണ്ടെങ്കിലും സിനിമയില്‍ എന്തോ അത് ഒരു അധിക പറ്റായോ എന്ന ഒരു സംശയം ഇല്ലാതില്ല. കഥയില്‍ നായികക്ക് അത്ര വലിയ പ്രാധാന്യം ഇല്ല എന്നത് നമുക്ക് മറക്കാം. പ്രകാശ് രാജ് പണം മുടക്കി സംവിധാനം ചെയ്ത ഈ സിനിമ ഒരു എടുത്തു ചാട്ടമായിരുന്നോ ? നിങ്ങള്‍ കണ്ട ശേഷം പറയൂ..




ആകെ മൊത്തം ടോട്ടല്‍ = ആദ്യ പകുതി നല്ല രീതിയില്‍ പോയിരിക്കുന്നു. അവസാന ഭാഗങ്ങള്‍ അതിശയോക്തിയില്‍ കെട്ടിപ്പടുത്ത് ഉണ്ടാക്കിയതിനാല്‍ കണ്ടിരിക്കുമ്പോള്‍ അല്പം വിരസത തോന്നും എന്നതൊഴിച്ചാല്‍ ഒരു ആവറേജ് പടം എന്ന്  സിനിമയെ. വിലയിരുത്താം 

*വിധി മാര്‍ക്ക്‌ = 6/10 

-pravin-

Tuesday, July 10, 2012

നിദ്രയില്‍ നിന്ന് നിദ്രയിലെക്കുള്ള ദൂരത്തില്‍ സംഭവിച്ച മാറ്റങ്ങള്‍



ഭരതന്‍ സംവിധാനം ചെയ്ത പഴയ "നിദ്ര "  , മകന്‍ സിദ്ധാർഥ്  ഭരതന്‍ പുതിയ 'നിദ്ര'യിലേക്ക് മാറ്റിയെടുത്തപ്പോള്‍ അതൊരു വെല്ലു വിളി ഉയര്‍ത്തിയിരുന്നു. അച്ഛനെ വെല്ലാന്‍ മകനാകുമോ എന്ന് പ്രേക്ഷകര്‍ ഉറ്റു നോക്കിയെന്നത് സത്യം. ആ പ്രതീക്ഷ വെറുതെയായില്ല. ആദ്യ സിനിമ സംവിധാനം ചെയ്തതിനോടൊപ്പം  അതിലെ നായക വേഷവും ഏറെക്കുറെ ഭംഗിയായി തന്നെ സിദ്ധാർഥ് നിര്‍വഹിച്ചിരിക്കുന്നു എന്ന് പറയാം.

പഴയ പതിപ്പില്‍ നായക വേഷം ചെയ്ത വിജയ്‌ മേനോന്‍ രൂപം കൊണ്ട് തന്നെ കഥാപാത്രത്തെ തനിക്കു അനുയോജ്യമാക്കിയിരുന്നു. പുതിയ പതിപ്പിൽ സിദ്ധാർഥ്  നായക വേഷത്തില്‍ എത്തുമ്പോൾ  കൈകാര്യം ചെയ്യാന്‍ പോകുന്ന വേഷം അനുയോജ്യമായോ എന്ന കാര്യത്തില്‍ അല്‍പ്പം ശങ്ക ഉണ്ടായേക്കാം. പക്ഷെ  ആദ്യ രംഗങ്ങളിലെ പ്രകടനത്തിൽ ഒരിത്തിരി പോരായ്മ എടുത്തു കാണിച്ചെങ്കിലും പിന്നീടുള്ള രംഗങ്ങളില്‍ അത് മറി കടന്ന് നല്ല പ്രകടനത്തിലേക്ക്  തിരിച്ചു വരുന്നതിൽ  സിദ്ധാർഥ് വിജയിച്ചു. അത് കൊണ്ട് തന്നെ   പ്രേക്ഷകനും മെല്ലെ മെല്ലെ  സിനിമയോട് അടുക്കാന്‍ തുടങ്ങും. 

കാലഘട്ടങ്ങളുടെ മാറ്റം പഴയ സിനിമയിലും പുതിയ സിനിമയിലും വളരെയധികം പ്രകടമാണ്. പഴയ  സിനിമയില്‍ സിനിമ തുടങ്ങുന്നത് നായകന്റെയും നായികയുടെയും കുടുംബ പശ്ചാത്തലം ഇട കലര്‍ത്തി കാണിച്ചു കൊണ്ടാണ്. പക്ഷെ പുതിയ സിനിമയില്‍ നായകന്‍റെ മനോവിഭ്രാന്തിയെ സൂചിപ്പിക്കുന്ന ഒരു രംഗത്തിലൂടെയാണ്‌ തുടക്കം. പഴയ സിനിമയില്‍ നായകന് വ്യക്തമായ മനോരോഗ പശ്ചാത്തലവും  അസുഖം പ്രകടമാകുന്ന സാഹചര്യങ്ങളും ഉണ്ടെങ്കില്‍ പുതിയ പതിപ്പില്‍ നായകന്‍ അസുഖത്തിന്‍റെ പേരില്‍ മറ്റുള്ളവരാല്‍ തുടരെ തുടരെ ക്രൂശിക്കപ്പെടുകയും സ്വന്തം   കുടുംബത്തില്‍ വരെ ഒറ്റപ്പെട്ടു പോകുന്ന ദുരവസ്ഥയെയുമാണ് കൂടുതല്‍ എടുത്തു കാണിക്കുന്നത്. മറ്റൊരു തരത്തില്‍ പറയുകയാണെങ്കില്‍  രംഗങ്ങള്‍ക്ക് കുറച്ചു കൂടി വ്യക്തത സംവിധായകന്‍ പുതിയ സിനിമയില്‍ ചാര്‍ത്തിയിരിക്കുന്നു. 

ആകെ മൊത്തം ടോട്ടല്‍ = പഴയ സിനിമയില്‍ നിന്ന് പുതിയ സിനിമയിലേക്ക് മാറ്റി എടുത്തപ്പോഴും  കഥയുടെ ആത്മാവ് ചോര്‍ന്നു പോകാതെ തന്നെ സാമാന്യം നല്ല നിലവാരത്തോടു കൂടി അവതരിപ്പിച്ചിരിക്കുന്നു. സംവിധായകന്‍റെ ആദ്യ സംരംഭമെന്ന നിലയില്‍ ഈ സിനിമയെ നല്ല സിനിമ എന്ന് തന്നെ പറയാം. 

*വിധി മാര്‍ക്ക്‌ = 6.5/10 
-pravin- 

ഓര്‍ഡിനറി



നവാഗതനായ സുഗീത് രചനയും സംവിധാനവും വഹിച്ച് ബിജു മേനോന്‍, കുഞ്ചാക്കോ ബോബന്‍ , ആസിഫ് അലി, ആന്‍ അഗസ്റ്റിന്‍, ശ്രിത ശിവദാസ് എന്നിവര്‍ അഭിനയിച്ച സിനിമയാണ് ഓര്‍ഡിനറി. 

പത്തനം തിട്ടയില്‍ നിന്ന് ഗവി വരെ ദിവസവും ഓരോ യാത്ര മാത്രം പോകുന്ന K.S.R.T.C ബസിലെ ഡ്രൈവറും കണ്ടക്ടരുമാണ് സുകുവും (ബിജു മേനോന്‍ ), ഇരവിയും (കുഞ്ചാക്കോ ബോബന്‍). ഈ ദിവസ യാത്രക്കിടയിലെ, യാത്രക്കാരുമായുള്ള ഇവരുടെ അടുത്ത പരിചയവും  ഗവി ഗ്രാമത്തിലെ വിശേഷങ്ങളുമാണ് സിനിമയില്‍ പ്രധാനമായും പങ്കു  വക്കുന്നത്. ഒരുപാട് നര്‍മ മുഹൂര്‍ത്തങ്ങള്‍ ഈ സിനിമയിലൂടെ പങ്കു വക്കപ്പെടുന്നു. അവിചാരിതമായി നടക്കുന്ന ഒരു കൊലപാതകത്തിന് സാക്ഷ്യം വഹിക്കേണ്ടി വരുന്ന സുകുവും ഇരവിയും കുറ്റവാളികളായി ചിത്രീകരിക്കപ്പെടുന്നു. ഗ്രാമത്തിലെ ജനങ്ങള്‍ ഒന്നടങ്കം ഇവര്‍ക്ക് നേരെ തിരിയുന്നു. തുടര്‍ന്നങ്ങോട്ട് ആകാംക്ഷ നില നിര്‍ത്തി കൊണ്ട് തന്നെ വളരെ നല്ല  രീതിയില്‍ കഥ പറഞ്ഞു പോയിരിക്കുന്നു. 

ഫൈസല്‍ അലിയുടെ cinematography വളരെയധികം മികവു പുലര്‍ത്തിയിരിക്കുന്നു. അത് പോലെ തന്നെ ഗ്രാമീണ മനോഹരിതയില്‍ ചിത്രീകരിച്ച പാട്ടുകളും ശ്രദ്ധേയമാണ്. ആദ്യ സിനിമയായിട്ടും, സംവിധായകന്‍ എവിടെയും പതറാതെ തന്നെ തന്‍റെ കടമ ഭംഗിയായി നിര്‍വഹിച്ചിരിക്കുന്നു. സിനിമയിലെ ഒരു പ്രധാന പോരായ്മ ആസിഫ് അലിയുടെ അഭിനയം ആണെന്ന് പറയേണ്ടി വരും. അവസാന രംഗങ്ങളില്‍ അല്ലറ ചില്ലറ പോരായ്മകള്‍ എടുത്തു കാണിക്കുന്നുണ്ടായിരുന്നു. പ്രത്യേകിച്ച് ആസിഫ് അലിയുടെ കഥാപാത്രം. ആ കഥാപാത്ര സൃഷ്ടിയില്‍ തന്നെ ചില ന്യൂനതകള്‍ ഉണ്ടെന്നു സ്ഥിരീകരിക്കുന്ന രീതിയിലാണ് അവസാന രംഗങ്ങള്‍. 

മേല്‍പ്പറഞ്ഞ കാര്യം ഒരു വലിയ പോരായ്മ അല്ലായെന്നിരിക്കെ ഓര്‍ഡിനറി ഒരു നല്ല സിനിമയെന്ന് തന്നെ പറയാം. 

*വിധി മാര്‍ക്ക്‌ = 7/10 
-pravin- 

Sunday, July 8, 2012

അസുരവിത്ത്‌

എ കെ സാജന്‍ സംവിധാനം ചെയ്ത അസുരവിത്ത്‌ സാജന്‍റെ തന്നെ സ്റ്റോപ്പ്‌ വയലന്‍സ് എന്ന സിനിമയെ പിന്തുടര്‍ന്ന് വന്ന സിനിമയാണ്. സിനിമയില്‍ അസിഫ് അലി ഡോണ്‍ മോസ്കോ എന്ന കഥാപാത്രം അവതരിപ്പിക്കുന്നതില്‍ സാമാന്യം ഭേദപ്പെട്ട പ്രകടനം കാഴ്ച വച്ചു എന്ന് മാത്രമേ പറയാന്‍ സാധിക്കൂ. തുമ്പിയെ കൊണ്ട് കല്ലെടുപ്പിക്കുന്ന ലാഘവത്തിലാണ് സാജന്‍ ഈ കഥാപാത്രം അസിഫിനോട് ചെയ്യാന്‍ ആവശ്യപ്പെട്ടതെന്ന് തോന്നി പോകുന്നു. സിനിമയുടെ ആദ്യ പകുതി വരെ നമുക്ക് കണ്ടിരിക്കാം. അസിഫിനോടുള്ള ഇഷ്ടമുള്ളത് കൊണ്ടാകാം സിനിമ കാണാന്‍ ഒരു വാശി ആദ്യമേ തോന്നി പോകും.

ക്രിസ്ത്യന്‍ സഭയെ ഇത്രക്കും അവഹേളിച്ച, കരി വാരി തേച്ച ഒരു സിനിമ മലയാളത്തില്‍ ഇത് വരെ ഉണ്ടായിട്ടില്ല എന്ന് പറയാം. പണ്ട് ക്രൈം ഫയല്‍ എന്ന സിനിമ വന്നപ്പോള്‍ സഭക്കുള്ളിലെ പുകിലുകള്‍ സ്ക്രീനില്‍ കാണിച്ച പോലെ അല്ല ഈ സിനിമയില്‍ കാണിച്ചിരിക്കുന്നത്. കഥയ്ക്ക് അനുയോജ്യമാക്കാനുള്ള തത്രപ്പാടില്‍ എന്തൊക്കെയോ സഭാ മേധാവികളെ കുറിച്ചു പറയാന്‍ ശ്രമിച്ചു എന്ന് മാത്രം.

അഭിനയത്തിന്‍റെ കാര്യത്തില്‍ ആരും വേണ്ട മികവു പുലര്‍ത്തിയില്ല. അതെ സമയം സിനിമയില്‍ ഏറ്റവും ശ്രദ്ധേയമായ പ്രകടനം കാഴ്ച വച്ച താരം ബാബു രാജ് ആയിരുന്നു. പള്ളിലച്ചന്‍ വേഷത്തില്‍ ബാബു രാജ് കലക്കി.

പല രംഗങ്ങളും നമ്മളെ ത്രില്ലടിപ്പിക്കാന്‍ തരത്തില്‍ ഒരുക്കാന്‍ സാജന് കഴിഞ്ഞെങ്കിലും  ഒരു സംവിധായകന്‍ എന്ന നിലയില്‍ സാജന്‍ പരാജിതനാകുന്ന കാഴ്ചയാണ് രണ്ടാം പകുതിയില്‍ നമുക്ക് കാണാന്‍ സാധിക്കുക. കൊച്ചിയെ ഒരു ക്രിമിനല്‍ പശ്ചാത്തലത്തില്‍ കാണിക്കാന്‍ വെമ്പുന്ന സംവിധായകന്‍, ഹിന്ദി സിനിമയിലെത് പോലെ അധോലോകത്തിന്റെ നിറപ്പകിട്ട് കാണിക്കാന്‍ ഈ സിനിമയില്‍ ഒരു ശ്രമം നടത്തി എന്ന് മാത്രം പറയാം.

ആകെ മൊത്തം ടോട്ടല്‍ = കഥയെ കുറിച്ചും മറ്റ് സാങ്കേതിക വശങ്ങളെ കുറിച്ചും കൂടുതല്‍ ഒന്നും ആലോചിക്കാതെ കണ്ടിരിക്കാന്‍ പറ്റുന്ന ഒരു ബിലോ ആവറേജ് സിനിമ. 

*വിധി മാര്‍ക്ക്‌ = 4/10 

-pravin-

സെക്കന്റ്‌ ഷോ


വളരെ വൈകിയാണ് ഈ സിനിമ കണ്ടത്. അതില്‍ നഷ്ടബോധം ഒന്നും തോന്നുന്നില്ല. ആകെ മൊത്തം സിനിമ കണ്ടപ്പോള്‍ ഇഷ്ടമായെങ്കിലും ഒരുപാട് ന്യൂനതകള്‍ എടുത്തു കാണിക്കുന്ന ഒരു സിനിമ എന്നേ പറയാന്‍ സാധിക്കുന്നുള്ളൂ. മമ്മൂട്ടിയുടെ മകന്‍ അഭിനയിച്ച ആദ്യ സിനിമ എന്ന വിശേഷണം തന്നെയാണെന്ന് തോന്നുന്നു ഈ സിനിമയുടെ വിജയത്തിന് വഴി തെളിയിച്ച ആദ്യ ഘടകം. ഈ സിനിമയില്‍ അഭിനയത്തില്‍ തന്റേതായ മികവു കാണിച്ച ഒരേ ഒരു നടന്‍, കുരുടി എന്ന കഥാപത്രം അവതരിപ്പിച്ച സണ്ണി വെയ്ൻ  മാത്രമാണ്. ദുല്ഖര്‍ സല്‍മാന്‍ ഒരു പരിധി വരെ മാത്രമേ അഭിനയ മികവു പുലര്‍ത്തിയുള്ളൂ . 




സിനിമയുടെ കഥയില്‍ അങ്ങിങ്ങായി മാത്രമേ നല്ല രംഗങ്ങള്‍ പോലും കടന്നു വരുന്നുള്ളൂ, പല ഭാഗങ്ങളിലും കോമഡിയും കഥയും കൂടിക്കുഴഞ്ഞു ചക്കപ്പായസം പോലെയായി. സംവിധായകന്‍ ശ്രീനാഥ് രാജേന്ദ്രന്‍ സിനിമയിലെ പല സ്ഥലങ്ങളിലും ഒരു പുതുമുഖം എന്ന നിലയില്‍ നോക്കി നില്‍ക്കുന്ന കാഴ്ചയാണ് നമുക്ക് കാണാൻ സാധിക്കുക. ശ്രീനാഥ് ഒരിത്തിരി കൂടി കാര്യഗൌരവത്തോടെ ഈ കഥയെ ആവിഷക്കരിക്കാന്‍ ശ്രമിച്ചിരുന്നെങ്കില്‍ നമുക്കെല്ലാവര്‍ക്കും എന്നും ഓര്‍ക്കാനുള്ള നല്ല സിനിമകളുടെ കൂട്ടത്തില്‍ ഇതും പെടുമായിരുന്നു. 



തൊഴില്‍ രഹിതരായ ചെറുപ്പക്കാര്‍ അവര്‍ പോലും അറിയാതെ കൊട്ടേഷന്‍ സംഘമായി മാറുന്ന കഥ പുതുമ നഷ്ടപെട്ട ഒന്നാണ്. ഇതേ പ്രമേയം തന്നെയാണ് സുബ്രഹ്മണ്യപുരത്തിലും മറ്റ് ചില മലയാള സിനിമകളിലും ഇതിനു മുന്നേ കാണിച്ചിരിക്കുന്നത്. ആ സ്ഥിതിക്ക് ഇത്തരം ഒരു പ്രമേയം കൈയ്യില്‍ കിട്ടുമ്പോള്‍ സംവിധായകന്‍ പ്രേക്ഷകന് വേറൊരു വ്യത്യസ്ത കാഴ്ചാനുഭവം സൃഷ്ടിക്കാന്‍ പരിശ്രമിക്കെണ്ടിയിരുന്നു. 



സിനിമയുടെ ആദ്യഭാഗവും അവസാന ഭാഗവും വളരെ നല്ല മികവു പുലര്‍ത്തി എന്നത് ശ്രദ്ധേയവും പ്രശംസനീയവും ആണ്. അവിടെയെല്ലാം ശ്രീനാഥ് എന്ന സംവിധായകന് ഭാവിയില്‍ മലയാള സിനിമയില്‍ തന്റേതായ സിംഹാസനം ഉണ്ടാകും എന്ന് ഉറപ്പ് തോന്നിക്കുന്നതായിരുന്നു. 

ആകെ മൊത്തം ടോട്ടല്‍ = കണ്ടിരിക്കാവുന്ന ഒരു സിനിമ . 

*വിധി മാര്‍ക്ക്‌ = 6/10 
-pravin-

Saturday, July 7, 2012

3 idiots & നന്ബന്‍


രാജ് കുമാര്‍ ഹിരാനി സംവിധാനം ചെയ്ത് 2009 ഇല്‍ റിലീസ് ആയ സിനിമയാണ് "3 Idiots" .ഇതേ സിനിമ തന്നെയാണ് 2012 ഇല്‍ സംവിധായകന്‍ ശങ്കറിന്‍റെ മേല്‍നോട്ടത്തില്‍ തമിഴില്‍ "നന്ബന്‍ " എന്ന പേരില്‍ റിലീസായതും. ചേതന്‍ ഭഗത് എഴുതിയ "Five Point someone - what not to do at IIT" എന്ന നോവലിനെ അടിസ്ഥാനമാക്കിയാണ് ഈ സിനിമ ജനിക്കുന്നത്. 

ഈ രണ്ടു സിനിമകള്‍ ഒരേ സമയം  കണ്ടു നോക്കിയാലും വലിയ വ്യത്യാസമൊന്നും നിങ്ങള്‍ക്ക് തോന്നില്ല. കാരണം, ഹിന്ദി സിനിമയില്‍ നിന്നും തമിഴ് സിനിമയിലേക്ക്കഥ പറിച്ചു നടുമ്പോഴും കഥയുടെ ആത്മാവിനു കോട്ടം തട്ടാത്ത രീതിയിലാണ്, സംവിധായകന്‍ ശങ്കര്‍ തന്‍റെ സംവിധാന മാസ്മരികത തമിഴ് പതിപ്പില്‍ പ്രകടിപ്പിച്ചിരിക്കുന്നത്.

ഈ രണ്ടു സിനിമകളും വെറും ഒരു വിനോദ സിനിമയായി മാത്രം കാണേണ്ട ഒന്നല്ല. സിനിമ കൈകാര്യം ചെയ്തിരിക്കുന്ന വിഷയം എന്താണെന്ന് ചോദിച്ചാല്‍ പലര്‍ക്കും പല ഉത്തരങ്ങള്‍  ഉണ്ടായിരിക്കും. ചിലര്‍ പറയും ഇതൊരു കോമഡി സിനിമയാണ്, അല്ല ഇതൊരു കൂട്ടം സുഹൃത്തുകളുടെ സിനിമയാണ്, ഏയ്‌ അതൊന്നുമല്ല ഇതൊരു ഗൃഹാതുരതയുള്ള സിനിമയാണെന്ന് പറയുന്നവരും ഉണ്ട്. ഈ പറഞ്ഞതൊന്നും വിശ്വസിക്കാതെ സിനിമ കാണുമ്പോള്‍ നിങ്ങള്‍ക്ക് തോന്നുന്നത് ചിലപ്പോള്‍ മറ്റൊരു കാഴ്ചപ്പാടായിരിക്കും. അതാണീ സിനിമയുടെ പ്രത്യേകതയും വിജയവും. ചുരുക്കത്തില്‍ ഈ സിനിമ ആര്‍ക്കും ഇഷ്ടമാകും എന്നര്‍ത്ഥം. അത്രക്കും ലളിതമായി ഗൌരവമുള്ള വിഷയങ്ങള്‍  നര്‍മത്തില്‍ ചാലിച്ച് കൊണ്ടാണ് കഥ പറഞ്ഞു പോയിരിക്കുന്നത്. 

എന്ജിനീയറിംഗ് കോളേജില്‍ എത്തിപ്പെടുകയും അവിടെ നിന്ന് നല്ല സുഹൃത്തുക്കളായി മാറുകയും ചെയ്യുന്ന മൂന്നു വിദ്യാര്‍ഥികള്‍, അവരുടെ ആഗ്രഹങ്ങള്‍, കാഴ്ചപ്പാടുകള്‍, ഇന്നത്തെ വിദ്യാഭ്യാസ സമ്പ്രദായത്തോടുള്ള ചില വിയോജിപ്പുകള്‍, അതിനിടയിലെ പ്രണയം, ആകാംക്ഷ.. അങ്ങനെ അങ്ങനെ സിനിമയില്‍ കഥ വികസിക്കുന്നു. ഈ വിഷയങ്ങളെല്ലാം തന്നെ അവതരണ രീതി കൊണ്ടാണ് പുതുമയുള്ളതാക്കി സംവിധായകന്‍ മാറ്റി മറക്കുന്നത്. അഭിനയത്തിന്‍റെ കാര്യത്തില്‍ ശ്രദ്ധേയമായ പ്രകടനം എല്ലാവരും കാഴ്ച വക്കുന്നെങ്കിലും, കൂട്ടത്തില്‍ ഏറ്റവും ശ്രദ്ധേയം അമീര്‍ ഖാനും  ബോമന്‍ ഇറാനിയും ആണെന്ന കാര്യത്തില്‍ സംശയമില്ല. 

താന്‍ ഇത് വരെ  സംവിധാനം ചെയ്ത മൂന്നു സിനിമകള്‍ക്കും മൂന്നു തവണയായി ദേശീയ  അവാര്‍ഡുകള്‍   വാങ്ങി കൊടുത്ത സംവിധായകനാണ് രാജ് കുമാര്‍ ഹിരാനി. Munnaa Bhai M.b.B.സ (2003), Lage Raho Munna Bhai(2006), 3 Idiots(2009) എന്നിവയായിരുന്നു ആ സിനിമകള്‍. മൂന്നു തവണയും മികച്ച ജനപ്രീതി നേടിയ സിനിമക്കുള്ള ദേശീയ അവര്‍ഡ് ഇദ്ദേഹത്തിന്റെ സിനിമയ്ക്കു കൊടുത്തതില്‍ ആര്‍ക്കും ഒരഭിപ്രായ വ്യത്യാസം ഉണ്ടാകില്ല. 

ചില രംഗങ്ങള്‍ നമുക്ക് അല്‍പ്പം അതിശയോക്തിയോട് കൂടെ കണ്ടിരിക്കേണ്ടി വരുമെങ്കിലും ഒരിക്കലും ആ രംഗങ്ങള്‍ നമ്മളെ മറ്റ് സിനിമകളിലെ ചില രംഗങ്ങളെ  പോലെ വെറുപ്പിക്കില്ല എന്ന് മാത്രം. 

ആകെ മൊത്തം ടോട്ടല്‍ = മൂന്നു മണിക്കൂര്‍ സമയം പോകുന്നത് അറിയില്ല. ഒരു നല്ല സിനിമ. 

*വിധി മാര്‍ക്ക്‌ = 8.5 /10 
-pravin-