പേട്രിയേറ്റ്

ഈ ഡിജിറ്റൽ കാലഘട്ടത്തിൽ എല്ലാം കൊണ്ടും പ്രസക്തമായ പ്രമേയം.

കണ്ടെന്റ്ലേക്ക് കണക്ട് ആയാൽ മാത്രം സാധ്യമാകുന്ന ആസ്വാദനമാണ് 'പേട്രിയെറ്റി'ന്റേത് എന്ന് പറയാം.

അത് കൊണ്ട് തന്നെ സിനിമയുടെ ഭാഗമായ സൂപ്പർ താരങ്ങളുടെയോ മറ്റു സഹ താര നിരകളുടെയോ പ്രകടനവും സ്ക്രീൻ സ്പേസും അളക്കാൻ നിന്നാൽ 'പേട്രിയേറ്റ്' തൃപ്‍തിപ്പെടുത്തണം എന്നില്ല.

ഭരണകൂട ഭീകരതയുടെ ഡിജിറ്റൽ പതിപ്പ് എന്ന് വിളിക്കാവുന്ന തരത്തിൽ കോർപ്പറേറ്റ് സംവിധാനങ്ങൾ വഴി രാജ്യത്തെ സാധാരണക്കാരന്റെ സ്വകാര്യത എങ്ങിനെ വിൽപ്പന ചരക്കാകുന്നു എന്ന് ലളിതമായി കാണിച്ചു തരുന്നുണ്ട് സിനിമ.

2018 ലിറങ്ങിയ P S മിത്രന്റെ 'ഇരുമ്പ്തിരെ' പടത്തിൽ അർജുന്റെ വില്ലൻ കഥാപാത്രം പറയുന്ന പോലെ "ഇൻഫർമേഷൻ ഈസ്‌ വെൽത്ത്".

നമ്മുടെ ഓരോ ഡാറ്റയും മാറ്റാർക്കോ കൈമാറി 'വെൽത്ത്' ഉണ്ടാക്കുന്ന ഒരു ഡിജിറ്റൽ മാർക്കറ്റ് സിസ്റ്റത്തിനുള്ളിൽ നമ്മൾ എന്നോ അടക്കപ്പെട്ടിരിക്കുന്നു എന്നതാണ് വസ്തുത.

പുറം ലോകമറിയാത്ത രാഷ്ട്രീയ ഗൂഢാലോചനകൾ, അന്താരാഷ്ട്ര അട്ടിമറികൾ, കൊലപാതകങ്ങൾ തൊട്ട് ലോകത്തെ പല ദുരൂഹമായ സംഭവ വികാസങ്ങളിലും ഈ പറഞ്ഞ ഡിജിറ്റൽ ക്രിമിനൽ ഗ്യാങ്ങിനു പങ്കുണ്ട്.

ഉർമീ ജുവേക്കറിന്റെ 'ലൈല' വെബ് സീരീസിലെയൊക്കെ പോലെ വരാനിരിക്കുന്ന ഭീതിജനകമായ ഒരു രാഷ്ട്രീയ സാമൂഹികാവസ്ഥയെ കുറിച്ചുള്ള അവബോധം പ്രേക്ഷകരിലേക്ക് എത്തിക്കാൻ 'പേട്രിയേറ്റ്' ശ്രമിച്ചു കാണാം.

ആരും എവിടെയും പറയാത്ത, ഒരിക്കലും നടക്കരുതാത്ത കഥ എന്ന സൂചന തരുമ്പോഴും ഈ സിനിമ പ്രമേയവത്ക്കരിച്ച യാഥാർഥ്യങ്ങളെ കാണാതെ പോകാൻ ആകില്ല.

'എമ്പുരാനി'ലെതിന് സമാനമായ മറ്റൊരു രാഷ്ട്രീയ കാഴ്ച ഈ സിനിമക്കുള്ളിൽ സമർത്ഥമായി ഒളിപ്പിച്ചു വച്ചിട്ടുണ്ട് മഹേഷ്‌ നാരായണൻ. ബാൻ ചെയ്യാതെ പോയതിൽ അത്ഭുതം. 

കഥാപാത്രങ്ങളുടെ ഇമോഷണൽ ഡെപ്ത്തോ, പരസ്പരമുള്ള കണക്ഷനോ ഒട്ടും ബോധ്യപ്പെടുത്താതെ പോകുന്ന സീനുകൾ പലതുണ്ട്.

ഒരു മാസ് സിനിമയുടെ ടെമ്പ്ലേറ്റ് ചിലയിടത്ത് പിന്തുടരുകയും എന്നാൽ അവിടെയൊന്നും അതിനൊത്ത രോമാഞ്ചിഫിക്കേഷൻ നൽകാതെയും പോകുന്ന അവസ്ഥ.

18 വർഷങ്ങൾക്ക് ശേഷം ബിഗ് 'M'സ് ഒന്നിച്ച് വരുമ്പോൾ പ്രതീക്ഷിക്കുന്ന പലതും സ്‌ക്രീനിൽ കാണാൻ കിട്ടിയില്ല എന്നതടക്കമുള്ള പരാതികളും കൂട്ടത്തിൽ പറയാം.

പക്ഷേ പ്രമേയപരമായും സാങ്കേതികപരമായും 'പേട്രിയെറ്റ്' വ്യക്തിപരമായി എന്നെ തൃപ്തിപ്പെടുത്തി.

©bhadran praveen sekhar

ചിരി രസമുള്ള 'മധുവിധു' !!

സ്ത്രീകളില്ലാത്ത / സ്ത്രീകൾ വാഴാത്ത 'ഗോഡ്ഫാദർ', 'മേലേപ്പറമ്പിൽ ആൺവീട്', 'കല്ല്യാണരാമൻ' പോലുള്ള സിനിമകളിലെ തറവാട് കഥാ പരിസരത്തെ ഓർമ്മപ്പെടുത്തുമ്പോഴുംആ സിനിമകളുമായൊന്നും ഒരു ബന്ധവുമില്ലാത്ത വിധം സമാനമായൊരു പ്ലോട്ടിൽ പുതിയൊരു കഥയെ രസകരമായി പറഞ്ഞവതരിപ്പിക്കാൻ ബിബിൻ മോഹൻ - ജയ് വിഷ്ണു - വിഷ്ണു അരവിന്ദ് ടീമിനു സാധിച്ചിട്ടുണ്ട്.

ആഞ്ഞിലിമൂട്ടിൽ കുടുംബത്തിന്റെ പാരമ്പര്യത്തിൽ നിന്ന് പറഞ്ഞു തുടങ്ങി നിലവിലെ അവസ്ഥയിലേക്ക് പറഞ്ഞെത്തുന്ന ഇൻട്രോയിൽ തന്നെയുണ്ട് സിനിമയുടെ രസച്ചരട്.

ചുമരിൽ ആണിയടിച്ചു വച്ച ഫോട്ടോകളിലെ പൂർവ്വികരെയൊക്കെ സിനിമയുടെ കഥാഗതിയിലേക്ക് ബന്ധപ്പെടുത്തിയ രീതിയൊക്കെ ശ്രദ്ധേയമായി.

രസകരമായ ഒരു കുടുംബ സിനിമയുടെ മൂഡിനൊപ്പം തന്നെ മൂന്ന് നാല് തലമുറക്കാരുടെ പ്രണയ കഥകൾ കൂടി ചേർത്ത് വച്ചിട്ടുണ്ട് സിനിമയിൽ.

പറയാതെയും തിരിച്ചറിയാതെയും പോയ പ്രണയങ്ങൾ.. നഷ്ട പ്രണയം.. പ്രണയം സാക്ഷാത്ക്കരിച്ചിട്ടും ഒന്നിക്കാനാകാത്ത അവസ്ഥ.. ആഞ്ഞിലി മൂട്ടിൽ തറവാട്ടിൽ സർപ്പ ശാപമുണ്ടോ എന്ന ചോദ്യത്തിന് ഉത്തരം തേടുകയാണ് സിനിമ.

ഇത്തരം സിനിമകളിൽ സാധാരണ നമ്മൾ കണ്ടു ശീലിച്ച സങ്കീർണ്ണതകളോ വില്ലന്റെ എൻട്രിയോ ഒന്നുമില്ലാതെ തന്നെ 'മധുവിധു'വിനെ കൈയ്യൊതുക്കത്തോടെ അവതരിപ്പിക്കാൻ വിഷ്ണു അരവിന്ദിന് സാധിച്ചിട്ടുണ്ട്.

ജഗദിഷ് - ഷറഫു - അസീസ് .. ഒരേ സമയം സിറ്റുവേഷണൽ കോമഡികളിലും സീരിയസ് രംഗങ്ങളിലും സ്‌കോർ ചെയ്തു കാണാം.

കുറച്ചു നേരമേ ഉള്ളൂവെങ്കിലും വിനീത് തട്ടിലിന്റെ സുര മാമനൊക്കെ സൂപ്പറായിരുന്നു.

കല്യാണി പണിക്കർ, വിജിത, ശ്രീജയ മൂന്നാളും അവരവരുടെ റോൾ നന്നായി തന്നെ ചെയ്തു.

സകുടുംബം കാണാവുന്ന ഒരു പടം. എന്റർടൈൻമെന്റ് തന്നെയാണ് രണ്ടു മണിക്കൂർ ദൈർഘ്യമുള്ള ഈ പടത്തിന്റെ ഗ്യാരണ്ടി.

ഈ കൊല്ലം ഇഷ്ടപ്പെട്ട 'ഫാമിലി എന്റർടൈനർ' സിനിമകളുടെ കൂട്ടത്തിലേക്ക് 'മധുവിധു' വിനെ കൂടി ചേർക്കുന്നു.

©bhadran praveen sekhar

ഒരു 'കൊല' ഫാമിലി എന്റെർറ്റൈനെർ !!

ഒരു കുടുംബ സിനിമയുടെ ട്രാക്കിൽ കഥ പറഞ്ഞു കൊണ്ടിരിക്കെ ഇടക്ക് വച്ചു നടക്കുന്ന കൊലപാതകം ആയിരുന്നല്ലോ 'ദൃശ്യ'ത്തിന്റെ അത് വരെയുണ്ടായിരുന്ന മൂഡ് മാറ്റി അതിനെ ഒരു ക്രൈം ത്രില്ലറാക്കി മാറ്റുന്നത്.

ആ കൊലപാതകത്തിന് ശേഷം ജോർജ്ജ് കുട്ടിയുടെ കുടുംബത്തിലുണ്ടാകുന്ന പ്രശ്നങ്ങളും അനുബന്ധ പിരിമുറുക്കങ്ങളുമൊക്കെ അതേ പടി നമ്മളെ കൂടി ബാധിക്കുന്നിടത്താണ് ദൃശ്യത്തിന്റെ ആസ്വാദനം.

എന്നാൽ ഇവിടെ 'മോഹിനിയാട്ട'ത്തിൽ മറ്റൊരു കുടുംബത്തിൽ മറ്റൊരു കഥാസാഹചര്യത്തിൽ നടക്കുന്ന കൊലപാതകം ഒരു മുഴുനീള സിനിമക്ക് വേണ്ട എന്റർടൈൻമെൻറ് ആയി മാറുകയാണ്.

ഒരു കുടുംബ സിനിമയുടെ രസകരമായ ആസ്വാദനം സമ്മാനിച്ച 'ഭരതനാട്യ'ത്തിന് ശേഷം അതേ ടീം വീണ്ടും വരുമ്പോൾ ഇങ്ങിനെ ഒരു ഴോനർ മാറ്റം പ്രതീക്ഷിച്ചിരുന്നില്ല. ട്രെയിലറിൽ നിന്നാണ് സംഗതി ഡാർക്ക് കോമഡി ആണെന്നുള്ളതിന്റെ സൂചന ആദ്യമായി കിട്ടുന്നത്.

വയലൻസിന്റെ ഒരു കണിക പോലുമില്ലാതെ ക്രൈം എന്ന സംഗതിയെ ഒരു കുടുംബ സിനിമയുടെ ചട്ടക്കൂടിനുള്ളിൽ നിന്ന് കൊണ്ട് രസകരമായ രീതിയിൽ കൈകാര്യം ചെയ്ത സംവിധാന മികവിന് തന്നെയാണ് ആദ്യത്തെ കയ്യടി.

സിനിമയിൽ ഗുരുതരമായ ഒരു ക്രൈം നടക്കുമ്പോൾ, കേന്ദ്ര കഥാപാത്രങ്ങളെല്ലാം പ്രതിസന്ധിയിലാകുമ്പോൾ കാണുന്ന നമുക്ക് മാത്രം അത് കോമഡിയായി മാറുന്ന അവസ്ഥ. അതാണ് 'മോഹിനിയാട്ട'ത്തിന്റെ ഫ്രഷ്‌നെസ്സ്.

ക്രൈം നടന്ന ശേഷമുള്ള ഭീകരമായ ചില സിറ്റുവേഷനുകളിൽ, കഥാപാത്രങ്ങളുടെ ഗൗരവപൂർണ്ണമായ സംഭാഷണ ശകലങ്ങളിൽ, അവരുടെ സ്വാഭാവികമായ ഭാവ പ്രകടനങ്ങളിൽ അങ്ങിനെ എല്ലായിടത്തും ഹാസ്യത്തിന്റെ സാധ്യതകളെ വിജയകരമായി അവതരിപ്പിച്ചു പ്രതിഫലിപ്പിക്കാൻ സാധിച്ചു എന്നത് ചെറിയ കാര്യമല്ല.

ഭരതൻ നായരുടെ കഥാപാത്രം ഇല്ലാതായി പോയിട്ടും ആ കഥാപാത്രത്തിന്റെ രസകരമായ ഒരു ഓർമ്മ-തുടർച്ച ഈ സിനിമയിലുമുണ്ട്. ഒരൊറ്റ സീനിൽ പോലും ആ കഥാപാത്രം നേരിട്ട് വരുന്നില്ലെങ്കിലും 'മോഹിനിയാട്ട'ത്തിലും ഭരതൻ നായർ അങ്ങിനെ നിറഞ്ഞു നിൽക്കുന്നുണ്ട്.

സൈജു കുറുപ്പ് - സുരാജ് വെഞ്ഞാറമൂട് - വിനയ് ഫോർട്ട് - ജഗദിഷ് അങ്ങിനെ നീളുന്ന ഒരു കൂട്ടം പേര് ഒരു ഭാഗത്ത് സ്‌കോർ ചെയ്തു പോകുമ്പോൾ മറു ഭാഗത്ത് കലാരഞ്ജിനി, നന്ദു പൊതുവാളൊക്കെ കരിയർ ബെസ്റ്റ് പെർഫോമൻസുമായി അഴിഞ്ഞാടുകയാണ്.

കലാരഞ്ജിനി - ഈ സിനിമയിൽ ഹൈ ലെവൽ പെർഫോമൻസ് ആണ്. ഡയലോഗ് ഡെലിവറി ആകട്ടെ ടൈമിംഗ് ആകട്ടെ അവര് കിടു ആയിരുന്നു. എക്സ്പ്രഷൻ കൊണ്ട് മാത്രം അവര് മൊത്തം സീനും തൂക്കുന്ന കാഴ്ച

സുരാജ് - ചത്ത് അഭിനയിക്കുക എന്നൊക്കെ വെറുതെ പറയുന്നതല്ല.. അമ്മാതിരി ഒരു ഐറ്റം. വളരെ സീരിയസായിട്ടുള്ള സംഭാഷണങ്ങളിൽ കൂടി ഹ്യൂമർ കൈമാറുന്ന പ്രതിഭാസം. കാര്യം പറഞ്ഞു വരുന്നതിനിടെ അനന്തരവനോട് സർബത്ത് അടിക്കുന്ന കാര്യം പറയുന്ന സീനൊക്കെ ആ ലെവൽ ഒന്നാണ്. അത് പോലെ അമ്പലം പണിഞ്ഞ കഥയുടെ വിവരണം. ആദ്യ ഭാഗത്തിൽ സൈജുവിന്റെ വേഷം ചെയ്യാൻ പറ്റാതെ പോയതിന്റെ എല്ലാ വിഷമവും രണ്ടാം ഭാഗത്തിൽ അങ്ങ് തീർത്തു.

നന്ദു പൊതുവാൾ..വഴി പോക്കൻ വേഷത്തിൽ ഒതുങ്ങേണ്ട ആളല്ല എന്ന് തെളിയിച്ച പ്രകടനം. മെയിൻ കഥാപാത്രങ്ങൾക്കൊപ്പം തിളങ്ങി നിക്കുന്നുണ്ട് മോഹിനിയാട്ടത്തിൽ.

അത് പോലെ ബേബി ജീൻ - ആ ചങ്ങായിയൊക്കെ സിനിമയുടെ രണ്ടാം പകുതി മൊത്തത്തിൽ തൂക്കി എന്ന് പറയാം.

സിനിമയിൽ ബേബി ജീന്റെ സുഭാഷ് പറയുന്ന പോലെ - ഇൻ ആയി കഴിഞ്ഞാൽ പിന്നെ ഒരേ ത്രില്ലാണ്.

എല്ലാം കൊണ്ടും പൈസ വസൂൽ പടം. Don't Miss to Watch !!

©bhadran praveen sekhar

തകർപ്പൻ വാഴ !!

ആദ്യ ഭാഗത്തിന്റെ അതേ ടെമ്പ്ലേറ്റിൽ കഥ പറയുമ്പോഴും പഴയതിനേക്കാൾ മികച്ച ഒരു പതിപ്പായി വാഴ 2 നെ മാറ്റാൻ സാധിച്ചിട്ടുണ്ട് സംവിധായകൻ സവിൻ സാക്ക്.

റീൽസ് പ്രകടനങ്ങൾ കൊണ്ട് ശ്രദ്ധേയരായ ഒരു പറ്റം ചെറുപ്പക്കാരെ മുൻ നിർത്തി കൊണ്ട് തിയേറ്റർ സ്‌ക്രീനിൽ ഓളം ഉണ്ടാക്കാൻ സാധിക്കുക എന്നത് ചെറിയ കാര്യമല്ല.

ഹാഷിർ - അലൻ - അജിൻ - വിനായക് -ദേവരാജ് ..ഗംഭീര പ്രകടനങ്ങൾ. കോമഡിയിൽ തുടങ്ങി ആക്ഷനും റിയാക്ഷനും ഇമോഷനുമൊക്കെയായി പരിചയ സമ്പത്തുള്ള നടന്മാരെ പോലെ സിനിമയുടെ ആദ്യാവസാനം വരെ അവർ തിളങ്ങി നിൽക്കുന്നു.

ചിരിയുടെ രസക്കൂട്ട് മാത്രമല്ല കഥാപാത്രങ്ങൾക്കിടയിലെ ബന്ധങ്ങളെയും മനോഹരമായി അടയാളപ്പെടുത്തുന്നുണ്ട് വാഴ 2.

ഓരോ കഥാപാത്രങ്ങളുടെയും ജീവിതത്തിൽ സംഭവിച്ച തിരിച്ചറിവുകളും നോവുകളും അത് വരെയുണ്ടായിരുന്ന കഥാപരിസരത്തെ വൈകാരികമാക്കി മാറ്റുന്നു.

അൽഫോൻസ് പുത്രന്റെ പോലീസ് കഥാപാത്രം എത്തുന്ന സീൻ ഒരു ബോധവത്ക്കരണ ക്ലാസ് പോലെ സിനിമക്കിടയിൽ മുഴച്ചു നിക്കുന്നതായി അനുഭവപ്പെടുമ്പോഴും സമകാലീന കേരളത്തിൽ ആ സീനിന് പ്രസക്തിയേറെയുണ്ട്.

സുധീഷ് - വിനോദ് കെടാമംഗലം - ബിജുക്കുട്ടൻ എന്നിവരുടെ അച്ഛൻ കഥാപാത്രങ്ങളെല്ലാം ശ്രദ്ധേയമായി തന്നെ അവതരിപ്പിക്കപ്പെട്ടു.

ഇമോഷണൽ ആയി അഭിനയിക്കാതെ തന്നെ ഒരു ചിരിയും കെട്ടിപ്പിടിത്തവുമൊക്കെ കൊണ്ട് വല്ലാത്തൊരു ഇമോഷണൽ ഫീൽ സമ്മാനിക്കുന്നുണ്ട് ബിജുക്കുട്ടൻ .

കണ്ണൻ സാഗർ, അലന്റെ പെങ്ങളായി അഭിനയിച്ച കുട്ടി, രണ്ടു മൂന്ന് സീനിൽ ദൈവത്തെ പോലെ വന്നു പോകുന്ന ചേട്ടൻ അങ്ങിനെ പറഞ്ഞു പോയാൽ കുറെയേറെ പേരുടെ കൂടി സിനിമയാണ് വാഴ 2.

വാഴയിലെ മുൻ താരങ്ങളെ ഈ സിനിമയിലേക്ക് പ്ലേസ് ചെയ്തിരിക്കുന്ന രീതിയും അതുണ്ടാക്കുന്ന ഓളവും വേറെ ലെവലാണ്. എന്റർടൈൻമെന്റിനൊപ്പം ഇമോഷണൽ കൂടിയാണ് വാഴ 2. പൈസ വസൂൽ. 

എന്തായാലും 'വാഴ' ഇനി ഒരു യൂണിവേഴ്‌സ് ആയി വിപുലീകരിക്കപ്പെടട്ടെ .

©bhadran praveen sekhar

ആടിന്റെ മൂന്നാം വരവും ടൈം ട്രാവലും !!

'ആട്' എന്ന ടൈറ്റിലിനോട് എല്ലാ തലത്തിലും കണക്റ്റായി കിടന്ന ഒരു കഥയായിരുന്നു ഒന്നാം ഭാഗത്തിന്റേത്.. രണ്ടാം ഭാഗത്തിൽ, ടൈറ്റിൽ കഥാപാത്രമായ ആട് ഇല്ലാതായപ്പോഴും ആദ്യ ഭാഗത്തിൽ നമ്മളെ രസിപ്പിച്ച കഥാപാത്രങ്ങളുടെ രണ്ടാം വരവ് ആഘോഷമായി മാറുകയായിരുന്നു.

ഇപ്പോൾ മൂന്നാം ഭാഗത്തിലേക്ക് എത്തിയപ്പോൾ ആദ്യ രണ്ടു ഭാഗങ്ങളിൽ നിന്നെല്ലാം വ്യത്യസ്തമായി വലിയൊരു കാൻവാസിലേക്ക് മാറ്റിയവതരിപ്പിക്കപെടുകയാണ് 'ആട്'.

ഷാജി പാപ്പനേയും കൂട്ടരെയും രണ്ടു കാലഘട്ടത്തിൽ വ്യത്യസ്ത ടൈം ലൈനിലൂടെ ഒരു കോമിക് മൂഡിൽ പറഞ്ഞവതരിപ്പിക്കുന്ന സാഹസമാണ് 'ആട് 3' എന്ന് പറയാം.

ഈ ടൈപ്പ് സിനിമകളിൽ ഇത് വരെ കണ്ടു ശീലിച്ചിട്ടില്ലാത്ത ഒരു ഴോനർ മാറ്റം കൊണ്ട് പുതുമയുള്ള അവതരണ സാധ്യതയെ പ്രയോജനപ്പെടുത്തുകയാണ് മിഥുൻ മാനുവൽ ചെയ്തിരിക്കുന്നത്.

ഈയൊരു സംഗതിയോട് താൽപ്പര്യം തോന്നുന്നവർക്ക് സിനിമ കണക്ട് ആകുകയും അല്ലാത്തവർക്ക് വർക് ഔട്ട് ആകാതെ പോകുകയും ചെയ്യുമെന്നത് കട്ടായം. ആട് 3 ആ തലത്തിൽ വളരെ റിസ്ക്കുള്ള ഒരു പരീക്ഷണം തന്നെയാണ്.

ആദ്യ ഭാഗത്തിൽ നീല കൊടുവേലിക്ക് വേണ്ടിയും രണ്ടാം ഭാഗത്തിൽ കമ്മട്ടത്തിനു വേണ്ടിയും നടത്തുന്ന അന്വേഷണത്തെ പോലെ ഇവിടെ നക്ഷത്ര ധൂളിക്ക് വേണ്ടിയുള്ള അന്വേഷണമാണ് സിനിമയുടെ രസച്ചരട് മുറുക്കുന്നത്.

ജയസൂര്യയുടെ പാപ്പനും വിനായകന്റെ ഡൂഡും തന്നെയാണ് ഈ ഫൺ റൈഡിന്റെ അമരക്കാർ. പത്മനാഭ തമ്പുരാനും, അസം ഖാനുമൊക്കെയായി അവർ രണ്ടു പേരും സ്‌കോർ ചെയ്തു. ധർമ്മജന്റെ കൗണ്ടർ അടിയും രസകരമായിരുന്നു.

2015 ൽ ആദ്യമായി കണ്ടപ്പോൾ എങ്ങിനെയിരുന്നോ അതേ രൂപത്തിൽ അതേ ഓളത്തിൽ ആട് ഫ്രാഞ്ചൈസിയിലെ ഓരോ കഥാപാത്രങ്ങളെയും വർഷങ്ങൾക്കിപ്പുറവും പുനരവതരിപ്പിക്കാൻ സാധിക്കുന്ന അപൂർവ്വതക്ക് കൈയ്യടി വേറെ കൊടുക്കണം. കഥാപാത്ര പ്രകടനങ്ങളിൽ പോലും ആ ഒരു തുടർച്ച അനുഭവപ്പെടുന്നുണ്ട് എന്നതാണ് ശ്രദ്ധേയം.

മൂന്നാം ഭാഗത്തിന്റെ അവസാന പതിപ്പിനായി കാത്തിരിക്കാൻ പാകത്തിലുള്ള ടെയ്ൽ എൻഡ് കൂടി സമ്മാനിച്ച് കൊണ്ടാണ് സിനിമ അവസാനിക്കുന്നത്.

അസ്ഥാനത്ത്‌ പ്ലേസ് ചെയ്ത പോലെ തോന്നിക്കാവുന്ന ചില കോമഡി രംഗങ്ങളും, ചില ചളി കോമഡികളും, സാത്താൻ സേവ്യറിന്റെ മുൻജന്മത്തിലെ സായിപ്പ് മലയാളവുമൊക്കെ പോലെയുള്ള കല്ല് കടികൾ ഒഴിച്ച് നിർത്തിയാൽ മേക്കിങ് മികവും സാങ്കേതിക മേന്മയുമുള്ള ഒരു വറൈറ്റി എന്റെർറ്റൈനർ തന്നെയാണ് 'ആട് 3'.

©bhadran praveen sekhar

ഒരു ഫീൽ ഗുഡ് ജയറാം സിനിമ !!

ക്രൈം / ഇൻവെസ്റ്റിഗേഷൻ / ആക്ഷൻ/ ഹൊറർ ത്രില്ലർ സിനിമകൾ കളം നിറഞ്ഞു നിൽക്കുന്ന സമയത്ത് സകുടുംബം പോയി കാണാവുന്ന ഒരു സിനിമ.

ഒരിടവേളക്ക് ശേഷം കുടുംബ സിനിമയിലൂടെ ജയറാം മലയാളത്തിലേക്ക് തിരിച്ചു വരുന്നു എന്നതിനേക്കാൾ പുതു തലമുറക്കൊപ്പം പുതിയ സിനിമാന്തരീക്ഷത്തിൽ ജയറാമെന്ന നടന്റെ സാധ്യതകൾ വീണ്ടും ചർച്ചക്ക് വെക്കുന്നുണ്ട് 'ആശകൾ ആയിരം'.

ഹരിഹരൻ എന്ന കഥാപാത്രത്തെ ആ തലത്തിൽ അദ്ദേഹം പക്വമായി അവതരിപ്പിച്ചിട്ടുണ്ട് സിനിമയിൽ. സിനിമയിലും സിനിമക്കുള്ളിലെ സിനിമയിലും ആ പെർഫോമൻസ് ശ്രദ്ധേയമായി അടയാളപ്പെടുന്നുണ്ട്.

കാളിദാസ് ജയറാമിന്റെ തമിഴ് സിനിമകളിലെ പ്രകടനത്തോളം എത്തില്ലെങ്കിലും ഹരിഹരന്റെ മകൻ വേഷം അയാളും നന്നായി ചെയ്തിട്ടുണ്ട്.

അതേ സമയം ജയറാം - കാളിദാസൻ ടീമിന്റെ അച്ഛൻ മകൻ വേഷങ്ങളും പ്രകടനങ്ങളുമൊക്കെ ഒന്നിച്ചു വിലയിരുത്തിയാൽ 'നല്ല നടൻ ഇപ്പോഴും അപ്പൻ തന്നെയാണ്' എന്ന് പറയാം.

അനുരാഗ കരിക്കിൻ വെള്ളത്തിലെ പോലെ ഒരു വീട്ടമ്മ വേഷം എന്നതിനപ്പുറത്തേക്ക് ആശാ ശരത്തിന് പ്രത്യേകിച്ച് ഒന്നും ചെയ്യാനുണ്ടായില്ല.

ഷറഫുദ്ധീൻ കൊള്ളാം. കോമഡിയും നെഗറ്റിവ് ഷെയ്ഡുമുള്ള കഥാപാത്രത്തെ നന്നായി ചെയ്തിട്ടുണ്ട്.

'സന്ദേശം', 'കൊച്ചു കൊച്ചു സന്തോഷങ്ങൾ', 'വീണ്ടും ചില വീട്ടുകാര്യങ്ങൾ', 'ഷാർജ റ്റു ഷാർജ' പോലുള്ള പഴയ കാല ജയറാം സിനിമകളിലെ റഫറൻസുകളൊക്കെ സിനിമയിൽ മനോഹരമായി തന്നെ ഉപയോഗപ്പെടുത്തിയിട്ടുണ്ട്.

ആ കൂട്ടത്തിൽ 'സലാം കശ്മീരി'ലെ മേജർ ശ്രീകുമാറിന്റെ വിഖ്യാതമായ ഭാവപ്രകടനവും പാപപ്പ ബാക്ഗ്രൗണ്ട് സ്കോറുമൊക്കെ രസകരമായി തന്നെ കടന്നു വരുന്നുണ്ട്.

അച്ഛൻ -മകൻ തമ്മിലുള്ള അടുപ്പവും ഈഗോ ക്ലാഷും അകൽച്ചയുമൊക്കെ പ്രമേയവത്ക്കരിക്കുന്ന ഒരു ടിപ്പിക്കൽ കുടുംബ കഥയുടെ ടെമ്പ്ലേറ്റിനുള്ളിലേക്ക് രണ്ടു തലമുറക്കാരുടെ സിനിമാ മോഹത്തിന്റെ കഥ കൂടി തുന്നി ചേർത്ത് അവതരിപ്പിക്കുന്നിടത്താണ് 'ആശകൾ ആയിര'ത്തിന്റെ ആസ്വാദനം. ക്ലൈമാക്സ് സീനുകളൊക്കെ ആ നിലക്ക് വൈകാരികമാക്കി മാറ്റാനും സാധിച്ചിട്ടുണ്ട്.

©bhadran praveen sekhar

ചിരിയുടെ 'പ്രകമ്പനം' !!

'അടി കപ്യാരെ കൂട്ടമണി' യും 'രോമാഞ്ച'വുമൊക്കെ വിജയിച്ചു കയറിയ അതേ പാതയിലൂടെ ഹൊറർ-കോമഡി ഴോണറിൽ മറ്റൊരു രസികൻ പടം.

ഹോസ്റ്റൽ ലൈഫും, സൗഹൃദവും, പ്രേത ബാധയുമൊക്കെ ഒരുമിച്ച് വീണ്ടും പ്രമേയവത്ക്കരിക്കപ്പെടുന്നു എന്നതൊഴിച്ചാൽ മേൽപ്പറഞ്ഞ സിനിമകളിൽ നിന്ന് വ്യത്യസ്തമായൊരു കഥയാണ് പ്രകമ്പനം പറയുന്നത്.

ഒരു ഹൊറർ-കോമഡി എന്റെർറ്റൈനെർ എന്ന നിലക്ക് തൃപ്തിപ്പെടുത്തുന്ന അവതരണം.

കണ്ണൂരിന്റെ പ്രാദേശികതയും, കമ്യൂണിസ്റ്റ് രാഷ്ട്രീയ പശ്ചാത്തലവുമൊക്കെ സിനിമയുടെ കഥാപരിസരത്തെ രസകരമാക്കി മാറ്റുന്നുണ്ട്.

ഭക്തിയും, കമ്യൂണിസവും, സദാചാരവും, അന്ധവിശ്വാസവുമൊക്ക കൂട്ടി ചേർത്ത് ആദ്യാവസാനം വരെ ചിരിക്കാനുള്ള വകുപ്പുകൾ എഴുതി വച്ചിട്ടുണ്ട് ശ്രീഹരി വടക്കൻ.

പുതുതലമുറക്കാരെ പ്രതിനിധീകരിക്കുന്ന കഥാപാത്രങ്ങൾ നിറഞ്ഞു നിൽക്കുന്ന സിനിമകളിൽ വീട്ടുകാർക്കും വയസ്സായവർക്കുമൊന്നും കാര്യപ്പെട്ട റോളുണ്ടാകാറില്ല എന്ന പരാതി തീർപ്പാക്കുന്നുണ്ട് 'പ്രകമ്പനം'.

മല്ലിക സുകുമാരന്റെ ചെമ്പകത്തമ്മ ആ നിലക്ക് ഈ സിനിമയുടെ നെടും തൂണാണ്.

പ്രകടനം കൊണ്ടായാലും ഡയലോഗ് ഡെലിവറി കൊണ്ടായാലും അവര് ഈ സിനിമയിൽ ഉണ്ടാക്കുന്ന 'പ്രകമ്പനം' ചെറുതല്ല. 

കണ്ണാ...എന്ന ഒരൊറ്റ വിളി തന്നെ ധാരാളം !!

സാഗർ - ഗണപതി - അമീൻ ടീമിന്റെ പ്രകടനങ്ങളും സൗഹൃദ കോംബോയുമൊക്കെ രസകരമായി തന്നെ വർക് ഔട്ട് ആയിട്ടുണ്ട്.

പ്രകടനത്തിൽ ഒന്ന് പാളിയാൽ സിനിമ തന്നെ മൊത്തത്തിൽ അടപടലം വീണു പോകാവുന്ന തരത്തിലുള്ള ഒരു കഥാപാത്രമായിരുന്നു സാഗറിന്റെ പുണ്യാളൻ. പക്ഷെ സാഗർ അത് കൃത്യതയോടെ അവതരിപ്പിച്ചു പ്രതിഫലിപ്പിച്ചു. പ്രത്യേകിച്ച് രണ്ടു കഥാപാത്രങ്ങളായി മാറി മറയുന്ന ട്രാൻസ്ഫോർമേഷൻ സീനുകളിൽ.

കലാഭവൻ നവാസിന്റെതും വേറിട്ടൊരു വേഷമായിരുന്നു. സ്‌ക്രീനിൽ അദ്ദേഹത്തെ കണ്ടപ്പോൾ ഇനിയും എത്രയെത്ര വേഷങ്ങൾ ചെയ്യേണ്ടിയിരുന്ന ആളായിരുന്നു എന്ന ചിന്തയിലാണ്ടു പോയി.

അസീസ് നെടുമങ്ങാട്, പ്രശാന്ത് അലക്‌സാണ്ടർ, കുഞ്ഞികൃഷ്ണൻ, രാജേഷ് മാധവൻ അടക്കം സിനിമയിൽ വന്നു പോയവരെല്ലാം ചിരി പടർത്തി.

ഹൊറർ-കോമഡി ഴോണറിൽ ഇനിയും തുടർച്ചയുണ്ടാകാനുള്ള സാധ്യതകൾ കൂടി അവശേഷിപ്പിച്ചു കൊണ്ടാണ് സിനിമ അവസാനിക്കുന്നത്. എന്തായാലും വിജേഷ് പാണത്തൂരിനു സധൈര്യം ചിരിയുടെ പ്രകമ്പനം തുടരാം.

©bhadran praveen sekhar

Sector 36

നോയ്ഡയിൽ അരങ്ങേറിയ കൊലപാതക പരമ്പരയാണ് സിനിമയുടെ ഇതിവൃത്തം എന്നൊക്കെ പറയുമ്പോൾ സ്വാഭാവികമായും നമ്മൾ പ്രതീക്ഷിക്കുന്ന ചില സംഗതികൾ ഉണ്ട്. പ്രത്യേകിച്ച് ഒരു ക്രൈം ത്രില്ലർ സിനിമയിൽ ഒഴിച്ച് കൂടാനാകാത്ത ചേരുവകൾ എന്ന് നമ്മൾ വിചാരിച്ചു വച്ചിരിക്കുന്ന കാര്യങ്ങൾ.

എന്നാൽ Sector 36 ലേക്ക് വന്നാൽ അതൊരു പൊളിച്ചെഴുത്താണ്. ഇവിടെ കുറ്റകൃത്യം വിശദീകരിക്കപ്പെടുന്നു..അന്വേഷണം വേണ്ട രീതിയിൽ നടക്കുന്നില്ല. ഇരകൾക്ക് നീതി കിട്ടുന്നില്ല. പോലീസിലാകട്ടെ ഒരാൾക്കും ഹീറോ പരിവേഷവുമില്ല .. യഥാർത്ഥ വേട്ടക്കാർ സിസ്റ്റത്തിന്റെ പഴുതുകളിൽ കൂടി രക്ഷപ്പെടുന്നു.

എന്നിട്ടും ഈ സിനിമയുമായി നമ്മൾ കണക്ട് ആയിപ്പോകുന്നത് വിവരിക്കപ്പെടുന്ന കേസിന്റെ ഭീകരത കൊണ്ടാണ് .. ഇവിടെ ത്രില്ലടിപ്പിക്കുന്ന സിനിമാറ്റിക് മുഹൂർത്തങ്ങളില്ല .. പകരം കേസിന്റെ സാമൂഹിക യാഥാർഥ്യത്തെ നിരാശയോടെ അംഗീകരിക്കേണ്ടി വരും.

'Sector 36' ന്റെ ഹൈലൈറ്റ് എന്നത് വിക്രാന്ത് മസ്സി - ദീപക് ഡോബ്രിയാൽ ടീമിന്റെ പ്രകടനമാണ്.

താൻ നടത്തിയ കൊലപാതക പരമ്പരയെ യാതൊരു കുറ്റബോധമോ ഭയമോ ഇല്ലാതെ അഭിമാനത്തോടെ വിശദീകരിക്കുന്ന ദൈർഘ്യമേറിയ സീനിൽ പ്രേം സിംഗിന്റെ

ശരീര ഭാഷയും നോട്ടവും ചിരിയുമൊക്കെ പടർത്തുന്ന ഭീകരത വിക്രാന്ത് മസ്സിയുടെ കരിയറിലെ മികച്ച അഭിനയ മുഹൂർത്തങ്ങളായി മാറുന്നു.

അതേ സീനിൽ വിക്രാന്തിന് അഭിമുഖമായി ഒരേ ഇരുപ്പാണ് ദീപക് ഡോബ്രിയാൽ .. ഒരു പോലീസുകാരൻ എന്ന നിലക്ക് ഈ കേസിൽ അയാൾ ചോദിക്കാൻ ഉദ്ദേശിച്ചിരുന്ന ചോദ്യങ്ങളൊക്കെയും അപ്രസക്തമായ അവസ്ഥ. ഒറ്റയാൾ പ്രകടനം കൊണ്ട് വിക്രാന്ത് സ്‌കോർ ചെയ്തു പോകുന്ന അതേ സീനിൽ റിയാക്ഷനുകൾ കൊണ്ട് ദീപക് മറ്റൊരു അഭിനയക്കളരി ഒരുക്കുന്ന ഗംഭീര കാഴ്ച. 

©bhadran praveen sekhar

അടിപിടിയുടെ രസികൻ പൊളിറ്റിക്സ് !!

സീൻ 1 A

രാഷ്ട്രീയത്തിൽ സജീവമായി നിറഞ്ഞു നിൽക്കുന്ന വിജയുടെ 'ജനനായകൻ' റിലീസ് വൈകുന്നു , പ്രധാന എതിരാളികളില്ലാതെ സുധ കൊങ്കരയുടെ 'പരാശക്തി' , നളൻ കുമാരസ്വാമിയുടെ 'വാ വാത്യാർ' പ്രതീക്ഷകളോടെ റിലീസാകുന്നു.

സീൻ 1 B

കാര്യമായ പ്രതികരണങ്ങൾ ഒന്നുമില്ലാതെ രണ്ടു പടങ്ങളും ബോക്സോഫിസിൽ അടപടലം പൊളിഞ്ഞ് വീഴുന്നു. അതിന്റെ കുറ്റം മുഴുവൻ പരോക്ഷമായി വിജയുടെ സിനിമാ രാഷ്ട്രീയത്തിന് മേൽ ചാർത്തുന്നു.

സീൻ 2. (പൊങ്കൽ ഹീറോ എൻട്രി )

ഒച്ചപ്പാടോ, പരസ്പ്പരം പഴി ചാരലോ ഒന്നുമില്ലാതെ സരസമായ ഭാഷയിൽ ആദ്യാവസാനം വരെ ആളുകളെ ചിരിപ്പിച്ചു കൊണ്ട് സമകാലീന രാഷ്ട്രീയാവസ്ഥ എന്താണെന്ന് ബോധ്യപ്പെടുത്തി കൊണ്ട് നിതിഷ് സഹദേവിന്റെ 'തലൈവർ തമ്പി തലൈമയിൽ' (TTT) ഇത്തവണത്തെ പൊങ്കൽ നൈസായി തൂക്കുന്നു.

പൊങ്കൽ റിലീസ് സിനിമകളിലെ കക്ഷി രാഷ്ട്രീയമല്ല, മറിച്ച് കണ്ടു രസിക്കാനും ഉൾക്കൊള്ളാനുമാകുന്ന രാഷ്ട്രീയ ബോധ്യങ്ങളെയാണ് പ്രേക്ഷകർ സ്വീകരിച്ചത് എന്ന് സാരം.

'TTT' യുടെ തുടക്കത്തിലും ക്ലൈമാക്സിലും ഒരു ശരാശരി ഇന്ത്യക്കാരന് ഏറ്റവും സുപരിചിതമായ അത്തരം രാഷ്ട്രീയ സാഹചര്യത്തെ കൃത്യമായി പറഞ്ഞു വെക്കുന്നുമുണ്ട്.

ഗ്രാമത്തിലെ പ്രാദേശിക കക്ഷി രാഷ്ട്രീയ മത്സരവും, രണ്ടു വീട്ടുകാർക്കിടയിലെ പരസ്പ്പര വൈരാഗ്യങ്ങളുമൊക്കെ ചേർത്ത് ഒരൊറ്റ ദിവസം മാത്രം ദൈർഘ്യമുള്ള സംഭവ വികാസങ്ങളിൽ കൂടിയാണ് TTT നമ്മളെ കൊണ്ട് പോകുന്നത്.

'അഴകിയ രാവണനി'ൽ അംബുജാക്ഷൻ പറയുന്ന 'അവിടെ താലികെട്ട് ..ഇവിടെ പാല് കാച്ചൽ' എന്ന പോലെ TTT യിൽ രണ്ടു വീടുകളിലായ് നടക്കുന്ന കല്യാണവും മരണവുമാണ് സിനിമയെ സംഭവ ബഹുലമാക്കുന്നത്.

ഒരു ഫെസ്റ്റിവൽ കോമഡി സിനിമയുടെ മൂഡാണെങ്കിലും അവസാനത്തേക്ക് എത്തുമ്പോൾ സിനിമയിൽ ഒരു വൈകാരിക കഥാപരിസരമുണ്ടാകുന്നുണ്ട്. വാട്ടർ ടാങ്ക്, ചെമ്പരത്തി ചെടി പോലുള്ള പ്രോപർട്ടികളെയൊക്കെ ആ നിലക്ക് പ്ലേസ് ചെയ്യുന്ന ഹൃദ്യമായ ചില ഷോട്ടുകളുണ്ട് സിനിമയിൽ.

ആ നാട്ടിലെ ഒരു ഭ്രാന്തന്റെ സീനിൽ തുടങ്ങി അതേ ഭ്രാന്തനിലേക്ക് അവസാനം കാമറ ചെന്നെത്തുമ്പോൾ നമ്മൾ ചിന്തിച്ചു പോകുന്ന കാര്യം തന്നെയാണ് സിനിമയും ചോദിക്കുന്നത് - ശരിക്കും ആർക്കാണ് ഭ്രാന്ത് ?

ചെറുതും വലുതുമായ കഥാപാത്രങ്ങളുടെ കാസ്റ്റിങ്ങും അവരുടെ പ്രകടനങ്ങളുമൊക്കെ സിനിമയുടെ രസക്കൂട്ട് ഗംഭീരമാക്കി. ജീവയൊക്കെ ആദ്യാവസാനം വരെ കളം നിറഞ്ഞാടി.

'ഫാലിമി' യുടെ അവതരണത്തിലെ അതേ കൈയ്യൊതുക്കം TTT യിലും നിതീഷ് സഹദേവ്‌ നിലനിർത്തി. വിഷ്ണു വിജയുടെ സംഗീതം, ബബ്‌ലു അജുവിന്റെ ഛായാഗ്രഹണം അടക്കം മൊത്തത്തിൽ മലയാളിത്തം നിറഞ്ഞു നിൽക്കുന്ന ഒരു രസികൻ തമിഴ് സിനിമ എന്ന് തന്നെ പറയാം.

©bhadran praveen sekhar

കഥയല്ല..ഇവിടെ ആക്ഷനാണ് താരം !!

സ്ഥിരം അടിയിടി പടങ്ങളിൽ നിന്നൊക്കെ വ്യത്യസ്തമായി മട്ടാഞ്ചേരിയുടെ കഥാപശ്ചാത്തലത്തിൽ കോസ്റ്റ്യൂം റെസ്ലിങ്ങിന്റെ അവതരണ സാധ്യതകളെ മേക്കിങ് മികവ് കൊണ്ട് ഗംഭീരമാക്കാൻ സാധിച്ചയിടത്താണ് 'ചത്താ പച്ച' തിയേറ്റർ എക്സ്പീരിയൻസ് സമ്മാനിക്കുന്നത്.

തൊണ്ണൂറുകളുടെ മദ്ധ്യേ കേബിൾ ടിവി സജീവമായ കാലത്ത് കണ്ട് രസിച്ചിരുന്ന WWF ഉം അന്നത്തെ റെസ്ലിങ് താരങ്ങളെയുമൊക്കെ ഓർമ്മപ്പെടുത്തി കൊണ്ടുള്ള തുടക്കം കൊണ്ട് തന്നെ ചത്താ പച്ചയുടെ വൈബ് ബോധ്യപ്പെടുന്നുണ്ട്.

മട്ടാഞ്ചേരിയിലെ പഴയ കാല ഗാട്ടാ ഗുസ്തിക്കാരായിരുന്ന വാൾട്ടർ - മാണി മാരുടെ കഥക്ക് സിനിമയിൽ പ്രസക്തിയില്ലെങ്കിലും പുതിയ തലമുറക്കാരിലേക്ക് ഗുസ്തിയുടെ ആവേശം പകർന്ന് കിട്ടിയതിന്റെ കാരണക്കാരായി ആ രണ്ടു കഥാപാത്രങ്ങളെ സിനിമയിൽ ആദ്യമേ പ്രതിഷ്ഠിക്കുകയാണ്.

'വാൾട്ടറിന്റെ പിള്ളേർ' എന്ന ഹൈപ്പ് ഉണ്ടാക്കാൻ ആ കഥ തന്നെ ധാരാളമാണ്. ആ ഹൈപ്പിനൊത്താണ് പിന്നീടങ്ങോട്ടുള്ള ഓരോ സീനും പുരോഗമിക്കുന്നത്.

റെസ്ലിങ് പരിപാടി കളറക്കാൻ വേണ്ടിയുള്ള ഇടി ഗ്യാങ്ങിന്റെ ഉത്സാഹമൊക്കെ സ്‌ക്രീനിൽ ആവേശമുണ്ടാക്കി.

വെള്ളിയാഴ്ച രാത്രി നടക്കാൻ പോകുന്ന ഗുസ്തിയിലെ പുതുമ എന്താണെന്ന് അറിയാനുള്ള മട്ടാഞ്ചേരിക്കാരുടെ അതേ ആകാംക്ഷ തന്നെയാണ് സിനിമ കാണുമ്പോൾ നമുക്കും ഉണ്ടാകുന്നത്.

വിനായക് ശശികുമാറിന്റെ വരികൾ, ശങ്കർ -എഹ്സാൻ -ലോയുടെ സംഗീതം, മുജീബ് മജീദിന്റെ സ്‌കോർ ..ഈ മൂന്നും കൂടി ഹൈ വോൾട് പവർ ആണ് 'ചത്താ പച്ച'ക്ക് കൊടുക്കുന്നത്.

അർജുൻ അശോകൻ - റോഷൻ മാത്യു - ഇഷാൻ ഷൗക്കത് ടീമിന്റെ സാവിയോ -വെട്രി - ലിറ്റിൽ കോംബോ ഗംഭീരമായിരുന്നു. പ്രത്യേകിച്ച് പറഞ്ഞാൽ ആ മൂന്ന് പേരുടെയും കോസ്റ്റ്യൂം ഗുസ്തി സീനുകളിൽ. അതിൽ തന്നെ അർജുൻ അശോകൻ - റോഷന്റെയൊക്കെ എൻട്രി സീനിലെ പവർ വേറെ ലെവൽ ആയിരുന്നു.

വിശാഖ് നായർ - ഒരു കോമിക് റോളെന്ന പോലെ തുടങ്ങി, പിന്നെ വില്ലനിലേക്കുള്ള രൂപ മാറ്റവും, ഒടുക്കം 'സർപ്പട്ട പരമ്പരെ'യിലെ ഡാൻസിംഗ് റോസിനെയൊക്കെ അനുസ്മരിപ്പിക്കുന്ന രീതിയിലുള്ള റിംഗിലെ പ്രകടനമൊക്കെ ശ്രദ്ധേയമായി. 

നിട്രോ കിളി, കടൽക്കൊമ്പൻ, ജാങ്കോ സുൽത്താൻ, ഭസ്മാസുരൻ അടങ്ങുന്ന എല്ലാവരും 'ചത്താ പച്ചയി'ലെ ഇടി റിങ്ങിൽ തിളങ്ങി എന്ന് പറയാം. 

വാൾട്ടറുടെ പിള്ളേര് എല്ലാം തിളങ്ങി നിക്കുന്ന സീനിലേക്ക് പക്ഷെ വാൾട്ടർ ആയി മമ്മുക്ക എത്തുമ്പോൾ നമ്മൾ സ്വാഭാവികമായും പ്രതീക്ഷിച്ചു പോകുന്ന ഒരു പഞ്ച് ഇല്ലാതെ പോകുന്നുണ്ട്.

ശരീര ഭാഷയിൽ മാത്രമല്ല, ശബ്ദത്തിലും ഉണ്ടായിരുന്നു വാൾട്ടർ എന്ന ഇടിവെട്ട് കഥാപാത്രത്തിന് ചേരാതെ പോകുന്ന ഒരു അവശത. എങ്കിലും രോഗവിമുക്തനായി മമ്മുക്ക വീണ്ടും സ്‌ക്രീനിൽ പ്രത്യക്ഷപ്പെട്ടു കാണുമ്പോൾ ഇഷ്ടം. 

©bhadran praveen sekhar

Aap Jaisa Koi

ജംഷഡ്പൂരിന്റെയും കൊൽക്കത്തയുടെയുമൊക്കെ കഥാപശ്ചാത്തലത്തിൽ ഒരു വേറിട്ട ഫീൽ ഗുഡ് സിനിമ.

പ്രായം 42 കഴിഞ്ഞിട്ടും അവിവാഹിതനായി തുടരേണ്ടി വരുന്ന നായകൻറെ കഥയെന്നോണം പറഞ്ഞു തുടങ്ങി ഒരു ഘട്ടമെത്തുമ്പോൾ 'ഗ്രേറ്റ് ഇന്ത്യൻ കിച്ചനി'ലെ പോലെയുളള സ്ത്രീ ജീവിതങ്ങളുടെ കൂടി കഥ പറയുന്നുണ്ട് സിനിമ.

ഭക്ഷണം വച്ച് കൊടുക്കാനും വീട്ടിലെ കാര്യങ്ങൾ നോക്കാനുമായി ഒരാൾ. അതുമല്ലെങ്കിൽ ഭാര്യ, അമ്മ, മരുമകൾ, ഏട്ടത്തിയമ്മ എന്ന പദവികളിൽ മാത്രം വിശേഷിപ്പിക്കപ്പെടുന്നവർ. അതിനപ്പുറത്തേക്ക് സ്വന്തമായി ഒരു ഐഡന്റിറ്റിയും രേഖപ്പെടുത്താൻ സാധിക്കാതെ പോകുന്ന സ്ത്രീകൾക്ക് വേണ്ടി സംസാരിക്കുന്നുണ്ട് ആയശാ രസാ മിശ്രയുടെ കുസും ത്രിപാഠി.

വിവാഹിതനാകാത്ത നായകൻ നേരിടുന്ന ഏകാന്തതയും അപകർഷതാ ബോധങ്ങളും ഒറ്റപ്പെടലുമൊക്കെ ദൃശ്യവത്ക്കരിക്കപ്പെടുന്ന അതേ സിനിമയിൽ തന്നെ ആണധികാര കുടുംബ വ്യവസ്ഥിതികളിലും വീടകങ്ങളിലും സ്വത്വം നഷ്ടപ്പെട്ട് ഒറ്റപ്പെട്ടു പോകുന്ന സ്ത്രീ ജീവിതങ്ങളെ പ്രമേയവത്ക്കരിക്കാൻ സാധിച്ചത് ശ്രദ്ധേയമായി തോന്നി.

മധ്യവയസ്‌ക്കരുടെ വിവാഹം, പ്രണയം, ലൈംഗികത തുടങ്ങിയ വിഷയങ്ങളൊക്കെ ഒരു കുടുംബ സിനിമക്കുള്ളിലൂടെ മനോഹരമായി പറഞ്ഞവതരിപ്പിക്കാൻ സംവിധായകന് സാധിച്ചു .

മാധവൻ - ഫാത്തിമ സന ഷെയ്ഖിന്റെ കോംബോയിൽ ശ്രീ - മധു കഥാപാത്രങ്ങളെ കാണാൻ ഒരു പ്രത്യേക ഭംഗിയുണ്ടായിരുന്നു .

ജസ്റ്റിൻ പ്രഭാകരൻ - രോചക് കൊഹ്‌ലി ടീമിന്റെ സംഗീതത്തിലുണ്ട് ഈ സിനിമയുടെ മൊത്തം ഫീൽ .

തെരെ ദിൽ സെ നികലെ

ജായേൻ തോ ജായേൻ കഹാം..

സാരെ ജഗ് മേൻ കൈസേ

ഹം ഫിർ മാരെ മാരെ...

ലോട്ട് ആനേദോ ഹംകോ

ഫിർ സെ ദിൽ മേൻ തുമാരെ..

©bhadran praveen sekhar

ഒരു ഫീൽ ഗുഡ് പ്രേത പടം!!

വലിയ സംഭവ വികാസങ്ങളോ ട്വിസ്റ്റുകളോ ഒന്നുമില്ലാതെ സരസമായി പറഞ്ഞു പോകുന്ന കഥ.

ഒരു പ്രേത കഥയെ നർമ്മത്തിന്റെ അകമ്പടിയിൽ പറഞ്ഞവതരിപ്പിക്കുന്നതോടൊപ്പം അതിൽ ഇമോഷണൽ സിറ്റുവേഷൻസിനു കൂടി പ്രാധാന്യം കൊടുക്കുന്നുണ്ട് 'സർവ്വം മായ'.

'സർവ്വം മായ' എന്ന ടൈറ്റിൽ സിനിമക്ക് എല്ലാം കൊണ്ടും അനുയോജ്യമായി.

സത്യൻ അന്തിക്കാട് സ്ക്കൂളിന്റെ സ്വാധീനമുള്ള അവതരണമെന്ന് പറയിപ്പിക്കുമ്പോഴും ഒരു സംവിധായകന്റെ ജോലി ഭംഗിയായി ചെയ്തിട്ടുണ്ട് അഖിൽ സത്യൻ.

കുറച്ചു കാലങ്ങളായി നമുക്ക് മിസ്സായി പോയിരുന്ന നിവിൻ പോളി വൈബ് ഈ പടത്തിലൂടെ തിരിച്ചു കൊണ്ട് വരാൻ അഖിൽ സത്യനു സാധിച്ചു.

നിവിൻ പോളി -അജു വർഗീസ് കോമ്പോ ഒക്കെ രസകരമായി തന്നെ വന്നു. നിവിൻ പോളി- റിയ ഷിബു - പ്രീതി മുകുന്ദൻ കോമ്പോ സീനുകളും കൊള്ളാം.

ചെറിയ വേഷങ്ങളെങ്കിലും ജനാർദ്ദനൻ, മധു വാര്യർ, രഘുനാഥ്‌ പാലേരി, അൽത്താഫ് സലിം, മണികണ്ഠൻ പട്ടാമ്പി, വിനീത്, മേതിൽ ദേവിക, ഒക്കെ നന്നായി ചെയ്തിട്ടുണ്ട്.

സ്ഥിരം പ്രേത -യക്ഷി കഥാപാത്രങ്ങളിൽ നിന്ന് വേറിട്ടു നിൽക്കുന്ന കഥാപാത്ര സൃഷ്ടിയാണ്‌ ഡെലേലുവിന്റേത്.

കളർ സാരി ഉടുക്കുന്ന, ഇഡ്ഡലിയും സാമ്പാറുമൊക്കെ കഴിക്കുന്ന 'മേഘസന്ദേശ'ത്തിലെ പ്രേതത്തെയും, 'വിസ്മയത്തുമ്പത്തി'ലെ റീത്താ മാത്യൂസിനെയുമൊക്കെ ഓർമ്മപ്പെടുത്തുമ്പോഴും പ്രകടനം കൊണ്ട് ഡെലേലുവിനെ മികവുറ്റതാക്കി റിയ ഷിബു.

വലിയ അവകാശ വാദങ്ങൾ ഒന്നുമില്ലാതെ തന്നെ കുടുംബ പ്രേക്ഷകരെ അനായാസേന തൃപ്‍തിപ്പെടുത്തുന്ന ഒരു മാജിക് ഈ സിനിമയിൽ ഒളിപ്പിച്ചു വച്ചിട്ടുണ്ട് അഖിൽ സത്യൻ.. 'സർവ്വം മായ' സമ്മാനിക്കുന്ന ഫീലും അതാണ്.

©bhadran praveen sekhar

കളം നിറഞ്ഞു നിൽക്കുന്ന കഥാപാത്ര പ്രകടനങ്ങൾ !!

സയനേഡ് മോഹന്റെതടക്കമുളള കുപ്രസിദ്ധി നേടിയിട്ടുള്ള ഏത് റിയൽ സൈക്കോ പാത്തുകളുടെ കേസായാലും അത് സിനിമയാക്കി മാറ്റുമ്പോൾ അവിടെ സസ്പെന്സിനു പ്രസക്തിയില്ല. ആരാണ് നായകൻ ആരാണ് വില്ലൻ എന്ന് നമുക്ക് ആദ്യമേ അറിയാൻ പറ്റും.

'കളങ്കാവലി'ലേക്ക് വരുമ്പോഴും ആദ്യത്തെ പത്തു മിനുട്ടിനുള്ളിൽ തന്നെ മമ്മൂക്കയുടെ സൈക്കോ കഥാപാത്രത്തെ ഭീകരമായി പ്രതിഷ്ഠിക്കുകയാണ്. കുറഞ്ഞ സമയം കൊണ്ട് ആ സൈക്കോ കഥാപാത്രത്തെ എസ്റ്റാബ്ലിഷ്‌ ചെയ്യുന്ന ഗംഭീര സീൻ എന്ന് പറയാം.

കൊതുകിനെ കൊല്ലുന്നതിന്റെ രസം പറഞ്ഞു തുടങ്ങി മനുഷ്യനെ കൊല്ലുന്നതിലാണ് ഏറ്റവും സുഖം കിട്ടുന്നത് എന്നതിലേക്ക് പറഞ്ഞെത്തുന്ന തിരുവനന്തപുരം ശൈലിയിലുള്ള സംഭാഷണ ശകലങ്ങൾക്കിടയിൽ വോയ്‌സ് മോഡുലേഷൻ കൊണ്ട് ഭീകരതയൊരുക്കുന്ന നടന മികവ് കാണാൻ സാധിക്കും.

എന്തിനേറെ അയാൾ ഊതി വിടുന്ന വട്ടത്തിലുള്ള സിഗരറ്റ് പുകക്ക് പോലും സ്‌ക്രീനിൽ ഭീതി പടർത്താൻ സാധിക്കുന്നുണ്ട്. ഹോണ്ടാ കാറും, ചായ ഗ്ലാസും, നോക്കിയാ മൊബൈൽ ഫോണുകളും, സിഗററ്റുമൊക്കെ ആ കഥാപാത്രത്തിന്റെ കിങ്കരന്മാരാകുന്നു.

സമാനതകളില്ലാത്ത കഥാപാത്ര പ്രകടനമാണ് എന്ന് പറയാമെങ്കിലും അടിസ്ഥാനപരമായി സ്റ്റാൻലിദാസെന്ന സൈക്കോ കഥാപാത്രത്തിനുള്ളിൽ ഒരു CK രാഘവനിസത്തെ സമർത്ഥമായി ഒളിപ്പിച്ചു വെക്കുന്നുണ്ട് മമ്മുക്ക.

സയനേഡ് മോഹന്റെ ക്രൈം സ്റ്റോറിയെ അവലംബിക്കുമ്പോഴും 'കളങ്കാവലി'ലെ സ്റ്റാൻലിദാസിനെ വേറിട്ടൊരു കഥാ ഭൂമികയിൽ മറ്റൊരു രൂപത്തിലാണ് അവതരിപ്പിക്കുന്നത്. ഭാഷയിലും ജോലിയിലും മാത്രമല്ല പ്രായത്തിലും സ്റ്റാൻലിദാസ് സയനേഡ് മോഹനിൽ നിന്ന് വേറിട്ട് നിൽക്കുന്നു.

അക്കൂട്ടത്തിൽ സ്റ്റാൻലി ദാസിന്റെ പ്രായം കഥയിലെ ചില സാഹചര്യങ്ങളിൽ കല്ല് കടികളുണ്ടാക്കുന്നുണ്ട്. ഉദാഹരണത്തിന് തന്നെക്കാൾ ഏറെ പ്രായം കുറഞ്ഞ സ്ത്രീകളുമായുള്ള കോംബോ സീനുകളിൽ. മുഴുനീള സിനിമയെ അതൊരു പ്രശ്നമായി ബാധിക്കുന്നില്ലെങ്കിലും അത്തരം കഥാ സാഹചര്യവും കഥാപാത്രങ്ങളും വേണ്ടത്ര ബോധ്യപ്പെടാതെ പോകുന്നുണ്ട്.

വിനായകൻ നായകനാണെന്ന് പറയുമ്പോഴും അയാളുടെ കഥാപാത്ര പ്രകടനത്തിന് ഈ സിനിമയിൽ ഒരു അതിർത്തി വരച്ചിട്ട് കാണാം. തീരുമാനിക്കപ്പെട്ട ആ മീറ്ററിനപ്പുറമോ ഇപ്പുറമോ പോകാത്ത കൃത്യതയുള്ള പ്രകടനം കൊണ്ട് വിനായകൻ അപ്പോഴും തന്റെ കഥാപാത്രത്തെ ഗംഭീരമാക്കിയിട്ടുണ്ട് എന്നത് വേറെ കാര്യം.

വി.കെ പ്രകാശിന്റെ 'ഒരുത്തീ'യിലെ എസ്.ഐ ആന്റണിയായിട്ടുള്ള വിനായകന്റെ പ്രകടനമൊക്കെ കണക്കിലെടുക്കുമ്പോൾ 'കളങ്കാവലി'ൽ എസ്.ഐ ജയകൃഷ്ണനായി ശോഭിക്കാനുള്ള സ്പേസ് ഒരുപാടുണ്ടായിരുന്നു. പക്ഷെ പ്രതിനായക വേഷത്തിൽ ആടി തിമിർക്കുന്ന മമ്മുക്കക്ക് മുന്നിൽ സ്‌കോർ ചെയ്യാനുള്ള കഥാ മുഹൂർത്തങ്ങൾ കുറച്ചു മാത്രമേ അയാൾക്ക് കിട്ടുന്നുള്ളൂ.

ആ കിട്ടിയ കുറച്ചു മുഹൂർത്തങ്ങളിൽ മമ്മുക്കയെന്ന നടനോടും താരത്തോടും മല്ലിട്ട് കൊണ്ട് അയാൾ പ്രേക്ഷകരുടെ കൈയ്യടി വാങ്ങുകയും ചെയ്യുന്നു.

സ്ത്രീ കഥാപാത്രങ്ങളെ അവതരിപ്പിച്ച മിക്കവരും നന്നായിരുന്നു. കൂട്ടത്തിൽ ശ്രദ്ധേയമായി തോന്നിയത് ശ്രുതി രാമചന്ദ്രൻ, N.P. നിസ, ധന്യ അനന്യ, ഗായത്രി അരുൺ, രജിഷ വിജയൻ എന്നിവരാണ്.

പോലീസ്കാരനായി വിനായകനൊപ്പം നിറഞ്ഞു നിന്ന ജിബിൻ ഗോപിനാഥ്‌, SP വേഷത്തിൽ ബിജു പപ്പൻ, അത് പോലെ ചെറിയൊരു വേഷത്തിൽ എത്തുന്ന കുഞ്ചൻ അടക്കമുള്ളവരും കൊള്ളാം.

മുജീബ് മജീദിന്റെ പശ്ചാത്തല സംഗീതം ഈ സിനിമക്ക് ഉണ്ടാക്കുന്ന മൂഡ് ഗംഭീരമാണ്. ഇന്റർവെൽ സീനിലും ക്ലൈമാക്സ് സീനിലേക്ക് അടുക്കുന്ന ഘട്ടത്തിലുമൊക്കെ അത് എടുത്തു പറയേണ്ടതാണ്. 'നിലാ കായും .' എന്ന പാട്ടിന്റെ ഉപയോഗവും അതിനെ പ്ലേസ് ചെയ്ത രീതികളൊക്കെ സിനിമയിലെ ബെസ്റ്റ് സീക്വൻസുകളായി തന്നെ മാറി.

ഫ്ലാറ്റായ കഥ പറച്ചിലും, ഊഹിക്കാവുന്ന കഥാഗതിയുമൊക്കെ ഉള്ളപ്പോഴും ആദ്യാവസാനം വരെ പ്രേക്ഷകരെ സിനിമയുമായി ബന്ധിപ്പിച്ചിടുക എന്നത് ശ്രമകരമായ ദൗത്യമാണ്. സസ്പെൻസ് ഇല്ലാതെ തന്നെ കഥയെ ത്രില്ലിംഗ് ആക്കി അവതരിപ്പിക്കുക എന്ന ദൗത്യത്തിൽ സംവിധായകൻ വിജയിച്ചു കാണാം.

ഒരു ഡീസന്റ് ക്രൈം ഡ്രാമ ത്രില്ലർ എന്ന നിലക്ക് 'കളങ്കാവൽ' ഇഷ്ടപ്പെട്ടു എന്ന് പറയുമ്പോഴും ഈ കഥയുടെ മികച്ച അവതരണ സാധ്യതകൾ വേണ്ട വിധം പരിഗണിക്കപ്പെട്ടോ എന്ന ചിന്ത ബാക്കിയാകുന്നു.

©bhadran praveen sekhar

വേറിട്ട സിനിമാ പ്രതിഭാസം !!

വെറുമൊരു സിനിമ എന്നതിനപ്പുറത്തേക്ക് തിയേറ്ററിനുളളിൽ കാഴ്ചയുടെയും കേൾവിയുടെയുമൊക്കെ വ്യത്യസ്തമായൊരു അനുഭവ ലോകം സൃഷ്ടിക്കുന്നുണ്ട് 'എക്കോ'.

മലയാളത്തേയും മലയ് ഭാഷയേയുമൊക്കെ പരസ്പ്പരം ബന്ധിപ്പിക്കുന്ന വിശാലമായ കഥാഭൂമിക. കാടും മലയും നിറഞ്ഞു നിൽക്കുന്ന തീർത്തും വന്യമായ കഥാപശ്ചാത്തലം. ഒപ്പം ദുരൂഹമായ കഥാവഴികളും കഥാപാത്ര സൃഷ്ടികളും. സർവ്വയിടത്തും സജീവ സാന്നിധ്യമായി നിലകൊള്ളുന്ന നായ്ക്കൾ.

സിനിമ തുടങ്ങി അവസാനിക്കും വരെ ഈ പറഞ്ഞ പ്ലോട്ടിനുള്ളിൽ നമ്മളെ ലോക്കാക്കുന്ന ഒരു മാജിക് ഉണ്ട് അവതരണത്തിൽ.

തിയേറ്ററിനുള്ളിലും നായ്ക്കൾ ഉണ്ടോ എന്ന് സംശയിപ്പിക്കുന്ന വിധമുള്ള മേയ്ക്കിങ്. സ്‌ക്രീൻ കാഴ്ചക്കപ്പുറം ആ കാടും മലയുമൊക്കെ അത്രത്തോളം അനുഭവഭേദ്യമാകുന്നുണ്ട്.

രണ്ടാം ലോക മഹായുദ്ധ കാലത്ത് മലേഷ്യയിലേക്ക് ജപ്പാൻ നടത്തിയ അധിനിവേശമൊക്കെ പരാമർശ വിധേയമാകുന്നിടത്താണ് കഥ നടക്കുന്ന ഒരു കാലഘട്ടം വെളിപ്പെടുന്നത്. അത് പോലെ മണിയോർഡർ അയച്ചതിന്റെയും സാധനങ്ങൾ വാങ്ങിയതിന്റെയുമൊക്കെ പൈസ കണക്കും , മല കയറുന്ന ജീപ്പിന്റെയും തടി കയറ്റി പോകുന്ന ലോറിയുടേയുമൊക്കെ മോഡലും, കഥാപാത്രങ്ങളുടെ വസ്ത്രധാരണവുമൊക്കെ കൂടി വായിച്ചെടുക്കുമ്പോൾ കിട്ടുന്നതാണ് കഥയിലെ മറ്റൊരു കാലഘട്ടം.

സംരക്ഷണവും തടവുമൊക്കെ എങ്ങിനെ ഒരേ അർത്ഥത്തിൽ വായിച്ചെടുക്കാൻ സാധിക്കുമെന്ന ചിന്തയുടെ വിത്തിൽ നിന്ന് പടർന്ന് പിടിച്ച നിഗൂഢമായ ഒരു കാടാണ് 'എക്കോ' എന്ന് നിരീക്ഷിക്കാം . മനുഷ്യ മനസ്സുകളുടെ വന്യതയും സങ്കീർണ്ണതയും നിസ്സഹായതയും ഒരു പോലെ പടർന്ന് പിടിച്ചുണ്ടായ കാട്.

കഥാപാത്ര സൃഷ്ടികളിലെ സൂക്ഷ്മത എടുത്തു പറയേണ്ട കാര്യമാണ്. പകയും, സ്വാർത്ഥതയും, ചതിയും, ദുരൂഹതയും , ദയനീയതയും, ക്രൗര്യവും, പ്രതികാരവും, വിധേയത്വവും, കുറ്റബോധവുമൊക്കെ പേറി നടക്കുന്ന, പല ഷെയ്ഡുകളിൽ പ്രത്യക്ഷപ്പെടുന്ന കഥാപാത്രങ്ങൾ.

സന്ദീപ് പ്രദീപ്, വിനീത്, സൗരഭ് സച്ദേവ, നരേൻ, അശോകൻ, ബിനീഷ് പപ്പു, സഹീർ മുഹമ്മദ്, രഞ്ജിത്ത് ശേഖർ, പിന്നെ മറ്റു മലേഷ്യൻ നടീനടന്മാർ അടങ്ങുന്നവരുടെ കാസ്റ്റിങ്ങും പ്രകടനങ്ങളുമൊക്കെ ഗംഭീരമായിരുന്നു.

ഒരു പദപ്രശ്നം പൂരിപ്പിച്ച് ഉത്തരം കണ്ടെത്തുമ്പോഴുണ്ടാകുന്ന മോമെന്റ്റ് പോലെ സിനിമയെ മറ്റൊരു ലെവലിൽ കൊണ്ടെത്തിക്കുന്ന ക്ലൈമാക്സ്.

ഛായാഗ്രഹണം, പശ്ചാത്തല സംഗീതം, ഓഡിയോഗ്രാഫി, കലാസംവിധാനം, എഡിറ്റിങ് അടക്കമുള്ള ഏത് വിഭാഗം നോക്കിയാലും പൂർണ്ണ തൃപ്തി തരുന്ന സിനിമ.

ബഡ്ജറ്റിന്റെ കോടി കിലുക്കമോ , സൂപ്പർ താരങ്ങളുടെ സാന്നിധ്യമോ ഒന്നുമല്ല കാമ്പുള്ള കഥയും പുതുമയുള്ള അവതരണവുമൊക്കെ തന്നെയാണ് മലയാള സിനിമയുടെ തലയെടുപ്പ് എന്ന് ഒരിക്കൽ കൂടി ബോധ്യപ്പെടുത്തി തരുന്നു 'എക്കോ'.

നന്ദി ദിൻജിത് അയ്യത്താൻ - ബാഹുൽ രമേശ്.. മലയാള സിനിമയ്ക്ക് നിങ്ങൾ നൽകിയ വേറിട്ട സിനിമാപരിഷ്‌കരണങ്ങൾക്കും സംഭാവനകൾക്കും. !!

©bhadran praveen sekhar

നടിപ്പ് ചക്രവർത്തിയുടെ ക്ലാസ്സ് സിനിമ !!

1950 കളിലെ തെന്നിന്ത്യൻ സിനിമാ ലോകത്തിന്റെ കഥാപശ്ചാത്തലത്തിൽ ഒരുക്കിയ ഒരു ക്ലാസ് പീരീഡ് ഡ്രാമ എന്ന് പറയാം.1934 ൽ തുടങ്ങി 1944 വരെയുള്ള ചെറിയ കാലയളവിൽ ചെയ്ത സിനിമകളിലൂടെ അന്നത്തെ സൂപ്പർ താരമായി തിളങ്ങിയ എം.കെ ത്യാഗരാജ ഭാഗവതരുടെ ജീവിതവുമായി ഈ സിനിമക്ക് ബന്ധമില്ലെന്ന് പറയുമ്പോഴും DQ വിന്റെ TK മഹാദേവൻ എന്ന കഥാപാത്ര സൃഷ്ടിയിൽ MK ത്യാഗരാജ ഭാഗവതരുടെ സ്വാധീനം കാണാം.

സാധാരണക്കാരനിൽ നിന്ന് സൂപ്പർ താരത്തിലേക്കുള്ള അദ്ദേഹത്തിന്റെ വളർച്ചയും, പ്രശസ്തിയുടെ കൊടുമുടിയിൽ നിന്നുള്ള വീഴ്ചയുമൊക്കെ ഫിക്ഷന്റെ സ്വാതന്ത്ര്യത്തിൽ മറ്റൊരു തരത്തിൽ സിനിമയിൽ പറഞ്ഞവതരിപ്പിക്കുകയാണ്.

സിനിമാ ജേർണലിസ്റ്റ് ലക്ഷ്മികാന്തന്റെ കൊലപാതക കേസിനു പകരം ഇവിടെ കുമാരിയെന്ന നായികയുടെ കൊലപാതകമാണ് TK മഹാദേവന്റെ ജീവിതത്തെ പിടിച്ചുലക്കുന്നത്.

കഥ നടക്കുന്ന 1950 കാലവും സിനിമാ സ്റ്റുഡിയോയുടെ കഥാപശ്ചാത്തലവുമൊക്കെ വളരെ ഭംഗിയായി സിനിമക്ക് വേണ്ടി ഉപയോഗപ്പെടുത്തി കാണാം.

ഒരു കാലഘട്ടത്തിലെ സിനിമാ ചിത്രീകരണ രീതികളും, വസ്ത്രാലങ്കാരവും, അഭിനയ ശൈലിയുമൊക്കെ മികവുറ്റ രീതിയിൽ പുനരവതരിപ്പിക്കുന്നതിൽ 'കാന്താ' വിജയിച്ചിട്ടുണ്ട്.

'മഹാനടി'യിൽ കുറഞ്ഞ സീനുകളിലൂടെ തന്നെ ജെമിനി ഗണേശനായി സ്‌ക്രീൻ സ്പേസ് കൈയ്യേറിയ ദുൽഖർ സൽമാനെ സംബന്ധിച്ച് 'കാന്താ'യിലെ TK മഹാദേവനായി മാറുക എന്നത് കരിയറിലെ തന്നെ മികച്ച അവസരമായി.

ആ കഥാപാത്രത്തിന്റെ എല്ലാ വിധ പ്രകടന സാധ്യതകളെയും ദുൽഖർ സൽമാൻ പ്രയോജനപ്പെടുത്തി കാണാം.

TK മഹാദേവനെന്ന കഥാപാത്രത്തിന്റെ വിവിധ മാനസികാവസ്ഥകളിലൂടെ സഞ്ചരിച്ചു കൊണ്ടുള്ള സൂക്ഷ്മവും ഭാവസമ്പുഷ്ടവുമായ പ്രകടനങ്ങൾ. ശബ്ദം കൊണ്ടും രൂപം കൊണ്ടും സംഭാഷണത്തിലെ വാക് ചാതുര്യം കൊണ്ടുമൊക്കെയുള്ള അസാധ്യ പകർന്നാട്ടം. ആദ്യാവസാനം വരെ ആ കഥാപാത്രത്തെ DQ ഭദ്രമായി കൈകാര്യം ചെയ്തു.

സിനിമയിലെ ഒരു സീനിൽ തന്റെ ക്ലോസപ് ഷോട്ട് എടുക്കാൻ ദ്വേഷ്യ ത്തോടെ ആവശ്യപ്പെടുന്ന ടി.കെ മഹാദേവനെ കാണാം. തന്റെ മുഖത്തിനോട് ചേർന്ന് ക്യാമറ കൊണ്ട് വെപ്പിച്ച ശേഷം പിന്നെയൊരു പ്രകടനമാണ്. കണ്ടു നിക്കുന്നവരെ കൊണ്ട് കൈയ്യടിപ്പിക്കുന്ന പ്രകടനം.

സീൻ ഏതായാലും തന്റെ പ്രകടനം കൊണ്ട് ആ സീനിനെ മറ്റൊരു തലത്തിലേക്ക് കൊണ്ടെത്തിക്കാൻ സാധിക്കുമെന്ന് ഉറച്ചു വിശ്വസിക്കുന്ന TK മഹാദേവൻ എന്ന കഥാപാത്രത്തിന്റെ അതേ ആത്മവിശ്വാസം തന്നെയാണ് DQ എന്ന നടനിലും നമുക്ക് കാണാൻ കിട്ടുക.

അത് കൊണ്ടൊക്കെ തന്നെ TKM ന്റെ നടിപ്പ് ചക്രവർത്തി എന്ന സിനിമക്കുള്ളിലെ വിളിപ്പേര് സിനിമക്ക് ശേഷം DQ വിന് കൊടുത്താലും അതിശയമില്ല.

ഭാഗ്യശ്രീ ബോർസെ - DQ കോംബോ നന്നായി വർക് ഔട്ട് ആയിട്ടുണ്ട് . കുമാരിയിലേക്കുള്ള ഭാഗ്യശ്രീയുടെ കാസ്റ്റിങ് കൃത്യമായിരുന്നെന്ന് ബോധ്യപ്പെടുത്തുന്ന വിധം മനോഹരമായി തന്നെ ആ റോൾ കൈകാര്യം ചെയ്തിട്ടുണ്ട്.

സമുത്തിരക്കനിയെ സംബന്ധിച്ച് അയ്യ എന്ന കഥാപാത്രം വലിയ ഒരു ടാസ്ക് അല്ലായിരുന്നു. TK മഹാദേവനുമായുള്ള വുമായുള്ള ഈഗോ ക്ലാഷും

മറ്റു കോംബോ സീനുകളൊക്കെ അനായാസേന പുള്ളി ചെയ്തിട്ടുണ്ട്.

രണ്ടാം പകുതിയിലെ കേസ് അന്വേഷണ സീനുകൾ കുറച്ചു കൂടി ചടുലമായിരുന്നെങ്കിൽ, അതുമല്ലെങ്കിൽ റാണക്ക് പകരം ആ ഒരു റോൾ SJ സൂര്യ, അരവിന്ദ് സ്വാമി, കാർത്തി പോലുള്ള ആർക്കെങ്കിലും കിട്ടിയിരുന്നെങ്കിൽ സിനിമയുടെ ഗ്രാഫ് വീണ്ടും ഉയർന്നേനെ എന്ന് തോന്നിപ്പോയി.

ഓരോ കഥാപാത്രത്തിനും കൊടുത്ത വ്യത്യസ്ത ഷെയ്ഡുകളും അതു ബന്ധപ്പെടുത്തി കൊണ്ടുള്ള കഥ പറയുന്ന രീതിയും ക്ലൈമാക്സ് സീനുകളുമൊക്കെ 'കാന്താ' ക്ക് ഒരു ക്ലാസ്സിക് പരിവേഷം സമ്മാനിക്കുന്നുണ്ട്.

എല്ലാവരെയും തൃപ്തിപ്പെടുത്തുന്ന സിനിമ അല്ലായിരിക്കാം. പക്ഷേ ഒരു ബ്ലാക്ക് ആൻഡ് വൈറ്റ് കാലത്തെ സിനിമാ നിർമ്മാണത്തിൻറെ പാശ്ചാത്തലത്തിൽ ഈഗോ പോരാട്ടവും, പ്രണയവും, ദുരന്തവുമൊക്കെ പ്രമേയവത്ക്കരിച്ചു കൊണ്ട് കഥ പറഞ്ഞ, വേറിട്ട തിയേറ്റർ എക്സ്പീരിയൻസ് സമ്മാനിക്കുന്ന സമ്മാനിക്കുന്ന സിനിമയെന്ന നിലക്ക് 'കാന്താ' ശ്രദ്ധേയമാണ്.

©bhadran praveen sekhar

സംഭവ ബഹുലമായ 'മൈദാൻ'

ഇന്ത്യൻ ഫുട്ബാളിനു സുവർണ്ണ കാലം സമ്മാനിച്ച പരിശീലകൻ സയ്യിദ് അബ്ദുൾ റഹീം സാബിന് നൽകാവുന്ന ഗംഭീര സമർപ്പണം തന്നെയാണ് ഈ സിനിമ.

സംഭവബഹുലമായ അദ്ദേഹത്തിന്റെ പരിശീലന ജീവിത കാലത്തിലേക്ക് നമ്മളെ കൂട്ടിക്കൊണ്ടു പോകുന്ന മികവുറ്റ സിനിമാവിഷ്ക്കാരം.

പരിധികളും പരിമിതികളും മറി കടന്ന് കൊണ്ട് അന്നത്തെ ഇന്ത്യൻ ഫുട്ബാളിന് വേണ്ടി റഹീം സാഹിബ് നടത്തിയ ഒറ്റയാൾ പോരാട്ടത്തെ സിനിമ കൃത്യമായി തന്നെ അടയാളപ്പെടുത്തി.

സമാനതകളില്ലാത്ത അദ്ദേഹത്തെ പോലൊരു പരിശീലകന് അക്കാലത്ത് നേരിടേണ്ടി വന്ന അനിഷ്ട സംഭവങ്ങൾ വെറും സ്‌ക്രീൻ കാഴ്ചകൾ മാത്രമായിരുന്നില്ലല്ലോ എന്നോർക്കുമ്പോൾ വിഷമം തോന്നും.

ആ തലത്തിൽ എന്ത് കൊണ്ട് ഇന്ത്യൻ ഫുട്ബാളിന് പിന്നീടൊരു നല്ല കാലമുണ്ടായില്ല എന്ന ചോദ്യത്തിന്റെ ഉത്തരം കൂടിയായി മാറുന്നുണ്ട് 'മൈദാൻ'.

അജയ് ദേവ്ഗണിൻറെ മികച്ച പ്രകടനം, എ.ആർ റഹ്മാന്റെ സംഗീതം, എല്ലാത്തിലുമുപരി ഹൃദ്യമായ അവതരണം.

എന്നിട്ടും പല കാരണങ്ങൾ കൊണ്ട് ബോക്സ്  ഓഫിസിൽ പരാജയപ്പെട്ട സിനിമ..പക്ഷേ തീർച്ചയായും സിനിമാ - ഫുട്ബാൾ പ്രേമികളുടെ ഹൃദയത്തിൽ 'മൈദാൻ' എന്നും ഉണ്ടാകും.  

©bhadran praveen sekhar

ഗംഭീര തിയേറ്റർ എക്സ്പീരിയൻസ് !!

ഓരോ സീനിലും മെയ്കിങ് നിലവാരം അനുഭവപ്പെടുത്തി കൊണ്ടുള്ള കഥ പറച്ചിൽ.

ഒരു ടിപ്പിക്കൽ ഹൊറർ സിനിമയുടെ റൂട്ടിൽ തന്നെയാണല്ലോ കഥ പോകുന്നത് എന്ന് ചിന്തിപ്പിക്കുന്നിടത്ത് നിന്ന് പൊടുന്നനെയുള്ള ഒരു ഗിയർ മാറ്റം. ഇന്റർവെൽ ബ്ലോക്ക് ഒക്കെ സെറ്റ് ചെയ്തു വച്ചിരിക്കുന്നത് ആ ഒരു ലെവലിലാണ്. തരിപ്പ് സീൻ.

ഹൊറർ പടത്തിനുള്ളിൽ ത്രില്ലടിപ്പിക്കുന്ന ഒരു ഇൻവെസ്റ്റിഗെഷൻ സെഗ്മെന്റ് കൂടി ഉൾപ്പെടുത്തിയത് ആകാംക്ഷ വർദ്ധിപ്പിച്ചു. Visual ആയാലും Sound ആയാലും Background Score ആയാലും Dies Irae യിൽ എല്ലാം ഒന്നിനൊന്നു ഗംഭീരം.

ഷെഹ്‌നാദ് ജലാലിൻറെ ക്യാമറ, ക്രിസ്റ്റോ സേവ്യറിന്റെ മ്യൂസിക്.. രണ്ടും തിയേറ്റർ എക്സ്പീരിയൻസിന്റെ വീര്യം കൂട്ടുന്നു. കൂട്ടത്തിൽ എടുത്തു പറയേണ്ട മറ്റൊരു കാര്യം സിനിമയിലെ ചില ആർട്ട്‌ വർക്കുകൾ ആണ്.

സാങ്കേതിക നിലവാരം കൊണ്ട് എങ്ങിനെ ഇക്കാലത്ത് ഹൊറർ സിനിമകളുടെ ആസ്വാദനം വർധിപ്പിക്കാൻ സാധിക്കും എന്ന് അനുഭവഭേദ്യമാക്കുന്ന സംവിധാനം മികവ്.

പ്രേത രൂപങ്ങൾ കൊണ്ടുള്ള ഭയപ്പെടുത്തലിനെക്കാൾ, കഥാപാത്രങ്ങൾക്ക് അനുഭവപ്പെടുന്ന ഭയത്തെ പ്രേക്ഷകനിലേക്ക് പകർത്തുകയാണ് രാഹുൽ സദാശിവൻ ചെയ്യുന്നത്.

രാഹുൽ സദാശിവന്റെ ഹൊറർ സിനിമാ വീക്ഷണങ്ങൾക്ക് കൈയ്യടി കൊടുക്കാതെ പാകമില്ല.

പ്രണവ് മോഹൻലാലിലെ നടനെ തന്റെ സിനിമയിലേക്ക് കൃത്യമായി പാകപ്പെടുത്താൻ രാഹുൽ സദാശിവനു സാധിച്ചു. ജിബിൻ ഗോപിനാഥ്‌, ജയ കുറുപ്പ്, അരുൺ അജികുമാർ എന്നിവരുടെ പ്രകടനങ്ങൾ എടുത്തു പറയേണ്ടതാണ്.

'ഭൂതകാല'ത്തിലെ ജോർജ്ജെന്ന കഥാപാത്രത്തെ 'ഡീയസ് ഈറെ'യിലേക്ക് ബന്ധിപ്പിച്ചതൊക്കെ കൗതുകമുണർത്തി.

തിയേറ്റർ എക്സ്പീരിയൻസ് ആഗ്രഹിക്കുന്നവരെ എല്ലാ തലത്തിലും തൃപ്തിപ്പെടുത്തുന്ന പടം.

©bhadran praveen sekhar

രസികൻ ഡിറ്റക്ടീവ് !!

എൺപതുകളിൽ പ്രിയദർശൻ തുടങ്ങി വച്ച്, തൊണ്ണൂറുകളിൽ സത്യൻ അന്തിക്കാടും, സിദ്ധീഖ് ലാലും, രാജസേനനും, റാഫി മെക്കാർട്ടിനും, രണ്ടായിരത്തിൽ ഷാഫിയും, ജോണി ആന്റണിയുമടക്കം പല സംവിധായകരും പരീക്ഷിച്ചു വിജയിച്ച കോമഡിയുടെ ചില അപൂർവ്വ രസക്കൂട്ടുകളുണ്ട്. അതിനോളം പോന്നതല്ലെങ്കിലും അവരുടെയൊക്കെ സിനിമകളിൽ നിന്ന് പ്രചോദനം ഉൾക്കൊണ്ട തിരക്കഥയും അവതരണ ശൈലിയുമാണ് 'പെറ്റ് ഡിറ്റക്ടീവി'ന്റെത് എന്ന് പറയാം.

ഡിറ്റക്ടീവ് - പോലീസ് അന്വേഷണങ്ങളും, അധോലോകവും, കൊലപാതകവും, തട്ടി കൊണ്ട് പോകലും, കള്ളക്കടത്തും, ചേസിംഗും, ആക്ഷനുമൊക്കെ കൂടി മിക്സ് ചെയ്തുണ്ടാക്കിയ കഥയെ തീർത്തും ഒരു കോമഡി എന്റെർറ്റൈനെർ ആക്കി മാറ്റാൻ പ്രനീഷ് വിജയൻ - ജയ് വിഷ്ണു ടീമിന് സാധിച്ചിട്ടുണ്ട്.

ടോണി ജോസ് അലൂല, കൈകേയി, യാഖത് അലി, ദിൽരാജ്, തിലക് തോമസ് അഥവാ TT, കാട്ടാളൻ സുനി, ലോലിത അങ്ങിനെ നീളുന്ന കഥാപാത്രങ്ങളുടെ പേരുകളിൽ തന്നെ ഒരു കോമിക് സ്വഭാവമുണ്ട്.

രാജേഷ് മുരുഗേശന്റെ സംഗീതം സിനിമയുടെ തുടക്കത്തിൽ തന്നെ ഉണ്ടാക്കിയെടുക്കുന്ന ഒരു മൂഡ് ഉണ്ട്. അത് ക്ലൈമാക്സിലെ കൂട്ടപ്പൊരിച്ചിലിലേക്ക് എത്തുമ്പോഴേക്കും ഒരു തായമ്പക മേളം പോലെ മുറുകുന്നു.

സ്ലാപ്സ്റ്റിക് കോമഡിയുടെ കാലം കഴിഞ്ഞു എന്നൊക്കെ പറയുന്നത് വെറുതെയാണ്. നല്ല രീതിയിൽ അവതരിപ്പിച്ചു ഫലിപ്പിക്കാൻ സാധിച്ചാൽ ചിരിക്കാൻ ആളുണ്ട് എന്ന് 'പെറ്റ് ഡിറ്റക്ടീവ്' സാക്ഷ്യപ്പെടുത്തുന്നു.

ഏത് വേഷത്തിലും സ്‌ക്രീനിൽ നിറഞ്ഞാടാൻ സാധിക്കുന്ന നടനാണെന്ന് ഷറഫുദ്ധീൻ വീണ്ടും തെളിയിച്ചു. ഗിരി രാജനിൽ തുടങ്ങി ടോണി ജോസ് അലൂല വരെ എത്തി നിൽക്കുന്ന ഫിലിമോഗ്രാഫിയിൽ അയാളുടെ ഗ്രാഫ് ഒരിടത്തും താഴേക്ക് പോയില്ല എന്നത് ശ്രദ്ധേയമാണ്. ഷറഫുദ്ധീൻ - അനുപമ കോംബോയും കൊള്ളാം.

വിനയ് ഫോർട്ട്, വിനായകൻ, വിജയരാഘവൻ ഒക്കെ സമാന വേഷങ്ങൾ മുന്നേയും കൈകാര്യം ചെയ്തിട്ടുണ്ടെങ്കിലും എവിടെയും ബോറടിപ്പിച്ചില്ല. ശ്യാം മോഹൻ, നിഷാന്ത് സാഗർ ഒക്കെ കിട്ടിയ വേഷത്തിൽ സ്കോർ ചെയ്തു. ജോമോൻ ജ്യോതിർ എല്ലാ പടത്തിലും ഒരു പോലെ രസികനാണ്.

'പെറ്റ് ഡിറ്റക്റ്റീവ്' എന്ന ടൈറ്റിൽ സിനിമക്ക് കൈ വരുന്നതിന്റെ കാര്യ കാരണങ്ങൾ ബോധ്യപ്പെടുത്തിയവർ പിന്നീട് പെറ്റ്സിനു സിനിമയിൽ കാര്യമായി ഒരു റോൾ കൊടുക്കാതെ പോയത് എന്താണെന്ന് ആലോചിച്ചു പോയി.

കുറ്റമറ്റതല്ലെങ്കിൽ കൂടിയും ഒരു എന്റെർറ്റൈനർ സിനിമയെന്ന നിലക്ക് കുട്ടികളടക്കം കുടുംബ സമേതം ആസ്വദിക്കാവുന്ന ഒരു പടം തന്നെയാണ് 'പെറ്റ് ഡിറ്റക്റ്റീവ്'.

©bhadran praveen sekhar

'കാന്താര'യുടെ വിസ്മയ ലോകം !!

ഭൂതക്കോലവുമായി ബന്ധപ്പെട്ട തുളുനാടൻ ജനതയുടെ ആചാരാനുഷ്ടാനങ്ങളും വിശ്വാസങ്ങളുമൊക്കെ കോർത്തിണക്കി കൊണ്ടുള്ള മിത്തോളോജിക്കൽ ഫാന്റസി കഥയും അതിന്റെ മേയ്ക്കിങ് മികവുമാണ് 'കാന്താര'യെ ശ്രദ്ധേയമാക്കിയത്. 

1847 - 1970 - 1990 എന്നിങ്ങനെ മൂന്ന് കാലഘട്ടങ്ങളിലൂടെ പറഞ്ഞു തുടങ്ങിയ കാന്താരയുടെ ആദ്യ പതിപ്പിനേക്കാൾ വലിയ കാൻവാസിലാണ് രണ്ടാം പതിപ്പിലെ കാന്താര ഒരുക്കിയിരിക്കുന്നത്.

1970 ൽ നിന്ന് കാദംബ രാജവംശത്തിന്റെ ഭരണകാലഘട്ടത്തിലുള്ള 'കാന്താര' യുടെ കഥയിലേക്ക് ചെറിയൊരു കണക്ഷൻ കൊടുത്തു കൊണ്ടുള്ള തുടക്കം തന്നെ ഗംഭീരമായിരുന്നു.

ബംഗ്‌റയുടെ രാജാവായ വിജയേന്ദ്രയിൽ തുടങ്ങി രാജശേഖരയും കുലശേഖരയും വരെ നീണ്ടു നിൽക്കുന്ന രാജ ഭരണ കാലയളവിൽ കാന്താരയുമായി ബന്ധപ്പെട്ട് നടക്കുന്ന സംഭവ വികാസങ്ങളാണ് സിനിമയെ സംഭവ ബഹുലമാക്കുന്നത്.

ആദ്യ പതിപ്പിൽ പഞ്ചുരുളിയും, ഗുളികനും, വരാഹ മൂർത്തിയുമായിരുന്നു കാന്താരയിലെ പ്രധാന ദൈവീക പരിവേഷങ്ങളെങ്കിൽ

രണ്ടാം പതിപ്പിലേക്ക് എത്തുമ്പോൾ ശിവനും പാർവ്വതിയും നന്ദികേശനും ഗുളികനും ചാമുണ്ഡിയും തൊട്ട് സർവ്വ ഭൂത ഗണങ്ങൾക്കും പ്രാധാന്യം കൊടുത്തു കൊണ്ടുള്ള തിരക്കഥയാണ് ഋഷഭ് ഷെട്ടി ഒരുക്കിയിരിക്കുന്നത്.

'ഭൂതക്കോല'വുമായി ബന്ധപ്പെട്ട മിത്തിനേക്കാൾ ഋഷഭ് ഷെട്ടിയുടെ ഭാവനാ ലോകത്തിലെ സൃഷ്ടികൾ ആണ് 'കാന്താരാ' യൂണിവേഴ്‌സിനെ വിപുലീകരിക്കുന്നത്.

തിരക്കഥയും സംവിധാനവും അഭിനയവും ഒരുമിച്ചൊരാൾ ചെയ്യുന്നതിലെ സർവ്വ സ്വാതന്ത്ര്യം ഋഷഭ് ഷെട്ടി പരിപൂർണ്ണമായി ആസ്വദിച്ചതിന്റെ ഫലം തന്നെയാണ് ഈ സിനിമയുടെ മികവ്. 

സൂര്യയുടെ 'കങ്കുവ; വിഷ്ണു മാഞ്ചുവിന്റെ 'കണ്ണപ്പ' പോലുള്ള സിനിമകളെ അനുസ്മരിപ്പിക്കുന്ന ചില സീനുകൾ കടന്ന് വരുമ്പോഴും ആ സിനിമകളിൽ പറ്റിയ പോലുളള പാളിച്ചകൾ 'കാന്താര'യിൽ സംഭവിക്കാതെ പോയത് ഋഷഭ് ഷെട്ടിയുടെ മികവുറ്റ സിനിമാ വീക്ഷണങ്ങൾ കൊണ്ടാണ്.

'ബാഹുബലി'യിലെ യുദ്ധത്തിന് സമാനമെന്ന് തോന്നിക്കുന്ന സീനുകളിൽ പോലും അത്തരമൊരു കല്ല് കടി അനുഭവപ്പെട്ടില്ല എന്നത് ശ്രദ്ധേയമാണ്.

ആദ്യ പതിപ്പിലെ ഗുളികൻ സീൻ ഓർമ്മയിൽ തങ്ങി നിൽക്കുന്നത് കൊണ്ട് തന്നെ ഇത്തവണ ഗുളികന്റെ വരവിൽ പുതുമ തോന്നിയില്ല. അത് കൊണ്ട് തന്നെയാണോ ഗുളികനേക്കാൾ കൂടിയ ഡോസിലുള്ള മറ്റു രൂപങ്ങളെ ഇത്തവണ കൂട്ടി ചേർത്തത് എന്നും ആലോചിച്ചു പോയി.

ചില സീനുകൾ ഒരൽപ്പം ഓവറാണോ എന്ന് തോന്നിപ്പോയിടത്തും പ്രകടനം കൊണ്ട് ഋഷഭ് ഷെട്ടി അഴിഞ്ഞാടി തിമിർക്കുന്ന കാഴ്ച. ക്ലൈമാക്സ് സീനുകളൊക്കെ ആ കൂട്ടത്തിൽ എടുത്തു പറയാം. അമ്മാതിരി ഐറ്റം. 

ജയറാമിനെ സംബന്ധിച്ച് രാജശേഖര രാജാവിന്റെ വേഷം നടനെന്ന നിലക്ക് ഈ അടുത്തൊന്നും മൂപ്പർക്ക് കിട്ടിയിട്ടില്ലാത്ത വേറിട്ട ഒരു വേഷം തന്നെയാണ്. രുക്മിണി വസന്ത്, ഗുൽഷൻ ദേവൈയാ അടക്കമുള്ളവരുടെ പ്രകടനവും കാന്താരയുടെ ഹൈലൈറ്റാണ്. 

പശ്ചാത്തല സംഗീതം, ഛായാഗ്രഹണം, ഗ്രാഫിക്സ്, കലാ സംവിധാനം അങ്ങിനെ എല്ലാം കൊണ്ടും തിയേറ്റർ കാഴ്ചയിൽ ത്രസിപ്പിക്കുന്നു 'കാന്താര'.

ഭൂതക്കോലം കെട്ടിയാടി കൊണ്ട് അപ്രത്യക്ഷമാകുന്ന ശിവയും, ശിവയുടെ അച്ഛനും, ബെർമിയുമൊക്കെ അവശേഷിപ്പിക്കുന്ന കാന്താരയിലെ ദുരൂഹ വൃത്തത്തിന് ഇനിയും തുടർ കഥകളുണ്ട്.

Waiting for Kantara Chapter 2 !!

©bhadran praveen sekhar

ബൾട്ടി പൊളിയാണ് !!

കബഡി കളിയും, സൗഹൃദവും, പ്രണയവും, ആക്ഷനും, പ്രതികാരവും വയലൻസുമൊക്കെ ചേർത്ത് കൊണ്ടുള്ള ഒരു സ്പോർട്സ് ആക്ഷൻ ഗ്യാങ്‌സ്റ്റർ സിനിമയെന്ന നിലക്കാണ് ഉണ്ണി ശിവലിംഗം 'ബൾട്ടി'യെ ചിട്ടപ്പെടുത്തിയിരിക്കുന്നത്.

'സുബ്രമഹ്‌ണ്യപുരം', 'ആടുകളം', 'വെണ്ണിലാ കബഡി കുഴു', പോലുള്ള തമിഴ് സിനിമകളെ ഓർമ്മപ്പെടുത്തി കൊണ്ടുള്ള അവതരണം.

കേരളാ- തമിഴ് നാട് അതിർത്തി ഗ്രാമത്തിന്റെ കഥാപരിസരവും അവിടത്തെ ആഘോഷങ്ങളും കബഡി മത്സരവും, ഗ്യാങ്സ്റ്റർ പോരാട്ടാവുമൊക്കെ ചേർന്നുള്ള കഥ പറച്ചിലിൽ എവിടെയും മുഷിവ് അനുഭവപ്പെട്ടില്ല.

കഥയിൽ പുതുമയില്ലെങ്കിലും ചടുലമായ അവതരണവും ആക്ഷൻ സീനുകളും പാട്ടും ബാക്ഗ്രൗണ്ട് സ്കോറുമൊക്കെ കൊണ്ട്

തിയേറ്റർ കാഴ്ചയിൽ 'ബൾട്ടി' ത്രസിപ്പിക്കുന്നുണ്ട്.

'RDX' ന് ശേഷം ഷൈൻ നിഗത്തിന്റെ ആക്ഷൻ ഹീറോ പരിവേഷത്തെ ഒന്ന് കൂടി പരിപോഷിപ്പിക്കാൻ സാധിച്ചിട്ടുണ്ട് 'ബൾട്ടി'ക്ക്. അടിമുടി ബൾട്ടി സ്റ്റാറായി ഷൈൻ നിഗം നിറഞ്ഞാടി എന്ന് പറയാം.

ഷൈൻ നിഗം - ശന്തനു ഭാഗ്യരാജ് - ശിവ ഹരിഹരൻ - ജെക്സൻ ജോൺസൺ ടീമിന്റെ ഫ്രണ്ട്ഷിപ് കോമ്പോ ഒക്കെ നന്നായി. പ്രീതി അസ്രാനിയും കൊള്ളാം. പക്ഷേ സിനിമയിൽ പ്രീതിയുടെ നായികാ കഥാപാത്രത്തിന് കാര്യമായി ഒന്നും ചെയ്യാനില്ല.

അൽഫോൻസ് പുത്രന്റെ സോഡാ ബാബു, പൂർണ്ണിമയുടെ ജീമാ പോലുള്ള കഥാപാത്രങ്ങൾക്ക് കൊടുത്ത ബിൽഡ് അപ് വച്ച് നോക്കുമ്പോൾ ആ രണ്ടു കഥാപാത്രങ്ങൾക്ക് ഒരുപാട് സാധ്യതകൾ ഉണ്ടായിരുന്നു. പക്ഷേ ചിലയിടത്ത് അത് അമ്പേ പാളിപ്പോയതായി തോന്നി.

അക്കാര്യത്തിൽ സെൽവ രാഘവന്റെ പോർത്താമരെ ഭൈരവനാണ്‌ സ്‌കോർ ചെയ്തത്. അധികം ആറ്റിട്യൂട് ഒന്നും ഇടാതെ തന്നെ സെൽവ രാഘവൻ ആ കഥാപാത്രത്തിന് കൊടുത്ത വില്ലനിസം ഗംഭീരമായി.

അലക്സ് ജെ പുളിക്കലിന്റെ ഛായാഗ്രഹണവും സായ് അഭ്യങ്കറിന്റെ സംഗീതവും 'ബൾട്ടി'ക്ക് കൊടുക്കുന്ന പവർ എടുത്തു പറയേണ്ടതാണ്. കൊള്ളാം..മൊത്തത്തിൽ നല്ല ഓളമുണ്ടായിരുന്നു പടത്തിന്.

©bhadran praveen sekhar

ഹൃദയപൂർവ്വം കണ്ടിരിക്കാവുന്ന സിനിമ !!

പഴയ കാല സത്യൻ അന്തിക്കാട് പടങ്ങളുടെ പ്രസരിപ്പൊന്നുമില്ലെങ്കിലും കുടുംബ സമേതം കാണാവുന്ന ഒരു പടം.

അദ്ദേഹത്തിന്റെതായി ഏറ്റവും അവസാനം വന്ന 'മകൾ' ഒക്കെ വച്ച് നോക്കിയാൽ 'ഹൃദയപൂർവ്വം' തൃപ്‍തികരമായ ആസ്വാദനം സമ്മാനിക്കുന്നുണ്ട്.

ഹൃദയവും ഹൃദയബന്ധവും ഹൃദ്യമായി പ്രമേയവത്ക്കരിച്ച സിനിമക്ക് 'ഹൃദയപൂർവ്വം' എന്ന പേര് അനുയോജ്യമായി.

കമലിന്റെ 'ആയുഷ്ക്കാല'ത്തിലെ ബാലകൃഷ്ണനെയും എബി മാത്യുവിനെയും ഓർമ്മപ്പെടുത്തുന്നുണ്ടെങ്കിലും 'ഹൃദയപൂർവ്വ'ത്തിലെ സന്ദീപ് ബാലകൃഷ്ണനും കേണൽ രവീന്ദ്രനാഥനും മറ്റൊരു കഥാപശ്ചാത്തലത്തിലാണ് അവതരിപ്പിക്കപ്പെടുന്നത്.

'മറവത്തൂർ കനവി'ലെ കോര സാറും, 'മനസ്സിനക്കരെ'യിലെ മാത്തുക്കുട്ടിച്ചായനുമൊക്കെ പോലെ ഒരിടത്തും പ്രത്യക്ഷപ്പെടാത്ത കഥാപാത്രമായി 'ഹൃദയപൂർവ്വ'ത്തിൽ നിറഞ്ഞു നിൽക്കുന്നു കേണൽ രവീന്ദ്രനാഥ്.

പഴയ സത്യൻ അന്തിക്കാട് സിനിമകളിലെ കഥാഘടകങ്ങളും കഥാപാത്രങ്ങളുമൊക്കെ റഫർ ചെയ്തു കൊണ്ടുള്ള എഴുത്താണ് സോനു ടി.പി - അഖിൽ സത്യന്റേത്.

സത്യൻ അന്തിക്കാടിന്റെ മിക്ക സിനിമകളിലും കാണാവുന്ന 'അച്ഛനെ അന്വേഷിച്ചെത്തുന്ന മകൻ / മകൾ' എന്ന ത്രെഡിനെ ഇവിടെ മറ്റൊരു രീതിയിൽ അവതരിപ്പിക്കുന്നത് കാണാം.

OK പണിക്കർ എന്ന അളിയൻ വേഷത്തെ സിദ്ധീഖ് രസകരമായി കൈകാര്യം ചെയ്തിട്ടുണ്ടെങ്കിലും ആ കാരക്ടർ ഇന്നസെന്റ്, മാമുക്കോയ പോലുള്ളവരെ ഓർമ്മപ്പെടുത്തുന്നു.

ഒരു കാലത്തെ സത്യൻ അന്തിക്കാടൻ സിനിമകളിലെ സജീവ സാന്നിധ്യമായിരുന്നവരുടെ വേർപാടുകൾ ഇപ്പോൾ അദ്ദേഹത്തിന്റെ സിനിമയിൽ ഉണ്ടാക്കുന്ന ശൂന്യത ചെറുതല്ല.

മോഹൻലാൽ -സംഗീത് പ്രതാപ് കോമ്പോ നന്നായി വർക് ഔട്ട്‌ ആയി എന്ന് പറയാം. ഒരർത്ഥത്തിൽ 'ഹൃദയപൂർവ്വ'ത്തിലെ എന്റർടൈൻമെന്റും അതാണ്‌.

ഗംഭീര സിനിമാനുഭവം എന്നൊന്നും പറഞ്ഞു വക്കാനുള്ള സംഗതികൾ ഒന്നുമില്ലെങ്കിൽ കൂടിയും കണ്ടിരിക്കാവുന്ന ഒരു ചെറിയ സിനിമ.

©bhadran praveen sekhar